Bane Perezida Kagame yagize abasenateri ni bantu ki?

Yanditswe na Iradukunda Serge
Kuya 16 Ukwakira 2020 saa 08:28
Yasuwe :
0 0

Mu gitondo cyo kuri uyu wa 16 Ukwakira, nibwo Perezida Paul Kagame yashyize mu mwanya w’Ubusenateri abantu bane aribo Prof Dusingizemungu Jean Pierre, Uwizeyimana Evode, Dr Twahirwa André na Kanziza Epiphanie.

Aba basenateri basimbuye Prof. Karangwa Chrysologue, Kalimba Zephyrin, Uwimana Consolée na Nyagahura Marguerite bari barashyizweho na Perezida wa Repubulika nyuma y’abandi, ari nayo mpamvu basoje manda nyuma ya bagenzi babo.

Amwe muri aya mazina asanzwe amenyerewe muri Politiki y’u Rwanda, mu gihe andi yumvikana nk’aho ari mashya ku bantu bamwe na bamwe.

IGIHE yakusanyije amwe mu mateka y’abasenateri bashya n’inshingano zitandukanye bagiye bakora mbere yo kugirirwa icyizere n’Umukuru w’Igihugu.

Uwizeyimana Evode

Me Evode Uwizeyimana ni umunyamategeko wamenyekanye cyane muri politiki y’u Rwanda dore ko yagiye ahabwa n’imyanya ikomeye, ariko yose ifite aho ihurira n’ubutabera.

Uyu mugabo yatangiye kumenyekana cyane ubwo yari muri Canada nyuma yo kugenda yumvikana kuri za radiyo nka BBC n’Ijwi rya Amerika anenga cyane amwe mu mategeko n’ibyemezo byafatwaga na Leta y’u Rwanda mu gukemura ibibazo bitandukanye.

Nyuma y’imyaka irindwi yari amaze muri Canada mu 2014, Uwizeyimana yaje gutahuka mu Rwanda, aho we ubwe yivugiye ko "aje gutanga umusanzu w’ubwenge afite mu gufatanya n’abandi kubaka igihugu’’ yumvaga akumbuye cyane.

Nyuma yo kugera mu Rwanda yahawe inshingano zitandukanye zirimo kuba Komiseri muri Komisiyo yo kuvugurura amategeko, umwanya yavuyeho ku wa 4 Ukwakira 2016.

Uwizeyimana kandi yabaye Umunyamabanga wa Leta muri Minisiteri y’Ubutabera Ushinzwe ibyerekeye Itegeko Nshinga n’andi mategeko, gusa aza kuva muri izi nshingano muri Gashyantare 2020 yeguye. Nyuma y’amezi asaga umunani yongeye kugirirwa icyizere agirwa Senateri.

Uwizeyimana abinyujije kuri Twitter yashimiye Perezida Kagame wongeye kumugirira icyizere, avuga ko agifite imbaraga nyinshi zo gukorera igihugu.

Uyu mugabo wamenyekanye cyane nk’intiti mu mategeko, afite Impamyabumenyi y’Icyiciro cya Gatatu cya Kaminuza mu bijyanye n’Amategeko yakuye muri Canada.

Evode Uwizeyimana, afite Impamyabumenyi y'Icyiciro cya Gatatu cya Kaminuza mu Mategeko

Prof Dusingizemungu Jean Pierre

Prof Dusingizemungu Jean Pierre yamenyekanye mu burezi bw’u Rwanda kuko yakoze mu mashuri makuru na kaminuza zitandukanye. Uretse ibijyanye n’uburezi yanayoboye Umuryango Uharanira Inyungu z’Abarokotse Jenoside yakorewe Abatutsi (IBUKA).

Mu gihe cya Jenoside yakorewe Abatutsi mu 1994, uyu mugabo yari Umuyobozi ushinzwe Amasomo mu Ishuri ry’Abaforomokazi i Rwamagana. Nyuma ya Jenoside gato yabaye Burugumesitiri w’iyahoze ari Komini Rukara ndetse mu 1995 ubwo Kaminuza y’u Rwanda yongeraga gusubukura ibikorwa yahawe inshingano zo kuyobora Komisiyo yo kwinjiza abanyeshuri muri kaminuza, inshingano yafatanyaga no kuba umwarimu mu Ishami ry’Uburezi.

Mu zindi nshingano Prof Dusingizemungu yakoze harimo kuba Umuyobozi wa Kaminuza ya East African University i Nyagatare, kuyobora Ishuri rikuru ry’i Gitwe riherereye mu Karere ka Ruhango (ryari Kaminuza ya Gitwe mbere yo gufungwa) ndetse no kuba Umuyobozi ushinzwe Amasomo muri Kaminuza Kibungo (UNIK).

Mbere yo guhabwa izi nshingano z’Ubusenateri n’Umukuru w’igihugu yari yiyamamarije uyu mwanya ahagarariye Intara y’Amajyepfo, ariko ntiyabasha gutsinda.

Prof Dusingizemungu yari asanzwe ari Umuyobozi wa IBUKA

Kanziza Epiphanie

Mbere yo guhabwa izi nshingano nshya, Kanziza Epiphanie yari Umuhuzabikorwa w’Umuryango w’abagore baharanira ubumwe, Women’s Organization For Promoting Unity.

Kanziza yavukiye i Nyagatare ari naho yize amashuri abanza kuri Groupe Scolaire Mutumba, mu gihe ayisumbuye yayize muri Notre Dame du Bon Conseil i Byumba, mbere yo gukomereza aya kaminuza muri Kaminuza yigenga ya Kigali, ULK aho yize ibijyanye n’Imibanire y’Ibihugu (International Relations).

Ubwo yigaga muri ULK yarihirirwaga na Minisiteri y’Ubutegetsi bw’Igihugu, MINALOC, kubera amanota menshi yagize.

Mu zindi nshingano yagiye akora harimo kuba Umwarimu muri Groupe Scolaire Cyabayaga i Nyagatare na Groupe Scolaire Bibare i Gatsibo. Yakoze kandi mu Mushinga African Initiative for Making Progress Organization ashinzwe Imibereho myiza y’Abaturage.

Kanziza Epiphanie yabaye umwarimu mu mashuri yisumbuye

Dr Twahirwa André

Uyu mugabo ni umuhanga mu Ndimi, afite Impamyabumenyi y’Ikirenga mu bijyanye n’Indimi yakuye muri Université Sorbonne Nouvelle iherereye i Paris mu Bufaransa.

Dr Twahirwa ni umwarimu mu bijyanye n’Indimi wabiherewe Impamyabushobozi na Académie de Paris. Hagati ya 1970 na 1983 yabaye umwarimu w’indimi mu Rwanda no mu Burundi.

Uyu mugabo usanzwe uba mu Bufaransa ni Perezida w’Icyubahiro w’Ihuriro ry’Abanyarwanda baba muri iki gihugu (CRF).

Dr Twahirwa André kandi yigishije Madamu Jeannette Kagame mu mashuri yisumbuye ndetse mu 2018 ubwo yitabiraga ikiganiro nsangirabwenge “Café Litéraire” uyu mugabo yari yagizemo uruhare yagarutse kuri aya mateka.

Muri iki kiganiro cyabaye ku wa 27 Gicurasi 2018, Madamu Jeannette Kagame, yashimiye Dr André Twahirwa wamubereye umwarimu mu mashuri yisumbuye.

Yagize ati “Ndashimira abatanze ibiganiro muri uyu mugoroba w’ingenzi, barimo André Twahirwa wanyigishije mu mashuri yisumbuye. Uku guhura hagati y’umwarimu n’umunyeshuri ni iby’agaciro.”

Aba basenateri baje bakurikira abandi bane Perezida Kagame yashyizeho Ku wa 20 Nzeri 2019, barimo Dr. Iyamuremye Augustin (ubu ni Perezida wa Sena), Nyirasafari Espérance (ubu ni Visi Perezida wa Sena ushinzwe iby’Amategeko no kugenzura ibikorwa bya Guverinoma), Habiyakare François na Dr Mukabaramba Alvera (Visi Perezida wa Sena ushinzwe Imari n’Abakozi).

Mu busanzwe Perezida yemererwa n’itegeko gushyiraho abasenateri umunani baza buzuza abandi 12 batorwa mu ntara na bane bashyirwaho n’Ihuriro nyunguranabitekerezo ry’Imitwe ya politiki yemewe mu Rwanda na babiri baturuka muri za Kaminuza cyangwa ibigo by’ubushakashatsi.

Dr Twahirwa André ni umuhanga mu bijyanye n'Indimi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .