Ba rwiyemezamirimo icyenda bafunzwe bakurikiranyweho miliyari 9 Frw zari zigenewe kugeza ifumbire ku bahinzi

Yanditswe na IGIHE
Kuya 8 Nyakanga 2020 saa 10:38
Yasuwe :
0 0

Urwego rw’Igihugu rushinzwe Ubugenzacyaha, RIB, rwatangaje ko rwataye muri yombi ba rwiyemezamirimo icyenda ndetse ko dosiye zabo zashyikirijwe ubushinjacyaha, aho bakurikiranyweho uburiganya muri gahunda yo kugeza ku baturage ifumbire mvaruganda.

Hashize igihe Leta ikorana n’abikorera ku giti cyabo mu kugeza inyongeramusaruro ku bahinzi binyuze muri gahunda ya Nkunganire, aho umuhinzi yishyura igice leta nayo ikamwishyurira ikindi.

Iyi ’Nkunganire’ ni gahunda ya leta ifasha abahinzi kubona inyongeramusaruro bishyuye amafaranga make ku buryo ibatangira 40% y’ikiguzi nabo bakiyishyurira 60% asigaye.

Mu bihe byashize, “Nkunganire” yakunze kugaragaramo uburiganya aho usanga hari ba rwiyemezamirimo batangaga ifumbire itujuje ubuziranenge cyangwa se bakabeshya ko bayitanze kandi atari ko byagenze.

RIB magingo aya iri gukora iperereza kuri ba rwiyemezamirimo 12, aho muri bo icyenda bafunzwe ndetse dosiye zabo zamaze gushyikirizwa Ubugenzacyaha.

Umuvugizi wa RIB, Dominique Bahorera, yabwiye IGIHE ati “Mu bantu 12 dukurikiranye, abantu icyenda barafashwe barafungwa bakorerwa amadosiye, bashyikirijwe ubushinjacyaha. Bishyuzwaga arenga miliyari icyenda.”

Ibyaha aba bagabo bakurikiranyweho, bishingiye ku ifumbire batangiye gufata mu myaka ya 2009 kugera mu 2010, bagombaga gutangira gutanga raporo zigaragaza abo bayahaye bikarangirana na 2012 ariko raporo zigaragaza ko batigeze babikora.

Muri abo icyenda dosiye zabo zamaze gushyikirizwa ubushinjacyaha, harimo rwiyemezamirimo witwa Nkubiri Alfred ufite sosiyete yitwa Enas ltd. Uyu yigeze gufungwa mu 2016 na none ku bibazo by’ifumbire.

Icyo gihe itabwa muri yombi rye ryari rifitanye isano n’ibibazo by’ifumbire yinjije mu gihugu ikaza kunengwa ko itujuje ubuzirange. Yari ifumbire yo mu bwoko bwa DAP Nkubiri yari yakuye muri Arabie Saudite ariko Minagri isanga ifite ikibazo cy’ubuhehere buri hejuru ugereranyije n’ubwemewe mu Rwanda no ku rwego mpuzamahanga.

Muri Nzeri 2016, Minisitiri w’Ubuhinzi n’Ubworozi, Dr Gerardine Mukeshimana, yabwiye itangazamakuru ko ubu bucuruzi bw’inyongeramusaruro ku bahinzi harimo amafumbire n’imbuto, bwakunze kugaragaramo amanyanga.

Ati “Twagiye tubonamo amanyanga cyane cyane ashingiye ku kuba leta yatangiraga igura inyongeramusaruro ikaziha abaturage biza kugera aho leta ibiha abikorera, hakaba abazinjiza mu gihugu, bakaziha abazikwirakwiza mu bahinzi (agro dealers). Haje kubamo ibibazo bishingiye ku bwiza bw’ibyo tubona, ikindi ku kwishyura ibitakoreshejwe, aho abo bakorana n’abahinzi bashobora kuduha urutonde rw’ibyakoreshejwe kandi bitakoreshejwe.”

Mukeshimana yavuze ko ubu bucuruzi burimo amafaranga menshi ya leta agomba gukoreshwa neza, ariko hari nk’aho umuntu atanga ibilo 50 akandika ko ari 500 leta akaba ari nabyo yishyura.

Nkubiri Alfred ni umwe muri ba rwiyemezamirimo batawe muri yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .