Iri rushanwa rigarutse mu gihe bamwe mu banyempano barinyuzemo bakomeje gutera imbere mu bikorwa bitandukanye by’ubuhanzi, birimo umuziki, ubusizi, urwenya, sinema n’imideli.

Hari abamaze gushyira hanze album, abagejeje ibihangano byabo ku rwego mpuzamahanga, abayoboye amashusho y’indirimbo z’abahanzi bakomeye ndetse n’abashinze imishinga imaze guha abandi bantu akazi.

ArtRwanda-Ubuhanzi ni umushinga wa Imbuto Foundation watangijwe mu 2018, ugamije gufasha urubyiruko kugaragaza impano, kuzikarishya no kuzibyaza amahirwe y’akazi n’iterambere.

Binyuze mu marushanwa, amahugurwa no guhura n’abafite ubunararibonye mu buhanzi, bamwe mu banyempano bitabiriye iri rushanwa babonye amahirwe yabafashije kwagura ibikorwa byabo.

Icyakora, intambwe bagezeho zishingiye no ku muhate wabo, imishinga batangije ndetse n’ubufatanye bagiye bagirana n’abandi.

Mu gihe icyiciro cya kane cy’iri rushanwa gikomeje, IGIHE yagarutse kuri bamwe mu banyempano bagaragaye mu byiciro byaryo byabanje, n’ibikorwa byatumye bubaka amazina mu buhanzi.

Jean Chrétien Munezero (MJC)

Jean Chrétien Munezero, uzwi nka MJC, ni umwe mu banyempano bitabiriye icyiciro cya mbere cya ArtRwanda-Ubuhanzi mu 2018.

Muri uwo mwaka, yegukanye umwanya wa mbere mu cyiciro cyo gufotora no gutunganya amashusho, ahabwa igihembo cya miliyoni 1 Frw.

Nyuma y'irushanwa, yakomeje guteza imbere impano ye, kugeza ubwo mu 2022 yashingaga ikigo cya Uniquo Creations, gikora ibijyanye no gufata no gutunganya amashusho.

Raporo ya Imbuto Foundation ya 2024/2025 igaragaza ko MJC yari amaze gukora amashusho y’indirimbo zirenga 20.

Mu ndirimbo yayoboye amashusho yazo harimo ‘Nibido’ ya Christopher na ‘Beauty on Fire’ ya Bruce Melodie na Joeboy, yakoranye na Bahali Ruth.

MJC ni umwe mu banyempano babashije guhindura impano yo gufata no gutunganya amashusho umwuga, akorana n’abahanzi ndetse n’ibigo bitandukanye.

Carine Maniraguha (Carine Poet)

Carine Maniraguha, uzwi nka Carine Poet, yamenyekanye cyane binyuze mu busizi, aho mu 2018 yegukanye umwanya wa mbere mu cyiciro cy’ubwanditsi n’ubusizi muri ArtRwanda-Ubuhanzi.

Nyuma y’irushanwa, yakomeje guteza imbere ubusizi, abuhuza no gukina ikinamico, bituma ibikorwa bye bigera mu Rwanda no mu mahanga.

Mu 2025, Carine yari mu bakinnyi b’ikinamico ‘Gahugu Gato’, yerekanwe mu Iserukiramuco rya Festival d’Avignon ribera mu Bufaransa.

Muri uwo mwaka, yitabiriye ArtRwanda-Ubuhanzi All Stars, aho we na Gad Tuyizere banganyije ku mwanya wa kabiri mu cyiciro cy’ubuvanganzo, bagabana igihembo cya miliyoni 10 Frw.

Carine afite kandi umushinga witwa ‘Rangurura’, ugamije gufasha abagore n’abakobwa kumvikanisha amajwi yabo, binyuze mu buhanzi n’ubusizi.

Fally Merci

Ndaruhutse Merci, wamamaye nka Fally Merci, ni umwe mu banyarwenya bitabiriye icyiciro cya mbere cya ArtRwanda-Ubuhanzi mu 2018.

Nyuma yo kwigaragaza muri iri rushanwa, yakomeje gukora urwenya, aza no gutangiza ibikorwa bigamije gufasha abandi banyarwenya kumenyekanisha impano zabo.

Muri Werurwe 2022, yashinze Gen-Z Comedy, yatangiriye mu ihema ryari ku kigo cya ArtRwanda i Rugando.

Raporo ya UNDP yo muri Werurwe 2025 yagaragaje ko uyu mushinga wari umaze gufasha abanyarwenya barenga 100 guteza imbere impano zabo.

Icyo gihe, Gen-Z Comedy yari ifite abakozi batandatu bahoraho, ikanatanga akazi k’igihe gito ku bandi 47.

Mu Ugushyingo 2025, Gen-Z Comedy yasinyanye amasezerano na ZACU TV yo gutambutsa ibitaramo byayo.

Fally Merci yabashije kwagura ibikorwa bye ava ku kuba umunyarwenya, agera ku rwego rwo gushinga urubuga rufasha abandi banyempano kubona amahirwe mu mwuga.

Boukuru

Christiane Uwase Bukuru, wamamaye nka Boukuru, ni umuririmbyi wanyuze mu cyiciro cya mbere cya ArtRwanda-Ubuhanzi mu 2018.

Uyu muhanzikazi yamenyekanye mu muziki uhuza injyana za Soul na Jazz n’umuziki ushingiye ku muco nyarwanda.

Ku wa 6 Nzeri 2024, Boukuru yamuritse album ye ya mbere yise ‘Gikundiro’, igizwe n’indirimbo 11, mu gitaramo cyabereye muri Norrsken i Kigali.

Yaje no gutoranywa mu bahanzi bitabiriye Iserukiramuco rya Sauti za Busara ryo mu 2025, ribera muri Zanzibar.

Muri uwo mwaka, Boukuru yashyizwe mu bahanzi 10 bageze mu cyiciro cya nyuma cy’irushanwa rya Prix Découvertes RFI.

Izi ntambwe zamufashije kugeza ibihangano bye ku bakunzi b’umuziki bo mu Rwanda no mu mahanga.

Makembe

Ishimwe Michael, uzwi nka Michael Makembe, ni umuririmbyi, umucuranzi n’umutunganya muzika wanyuze muri ArtRwanda-Ubuhanzi mu 2018.

Makembe azwi cyane mu bikorwa byo gushakisha no gusigasira amajwi y’umuziki gakondo, akayahuza n’uburyo bugezweho bwo gukora umuziki.

Binyuze mu mushinga we yise ‘Sounds of Rwanda’, yagiye mu bice bitandukanye by’igihugu afata amajwi y’abaririmbyi n’ibicurangisho gakondo.

Mu 2022, yakoze umuziki wakoreshejwe muri filime ‘Father’s Day’ ya Kivu Ruhorahoza.

Yanagize uruhare mu muziki no mu bikorwa by’ikinamico n’imbyino, birimo ‘umuko’ ya Dorothée Munyaneza.

Mu bihangano bye harimo ‘Havumera Inka’, ‘Ikondera’ na ‘Bagore Beza’.

Makembe ni umwe mu bahanzi bakomeje kwerekana uko umuziki gakondo ushobora guhuza amateka n’umuco nyarwanda n’ubuhanzi bugezweho.

Munezero Jean Vainqueur

Munezero Jean Vainqueur ni umuhanga mu guhanga imideli, akaba ari na we washinze ikirango cya Maison Munezero.

Yitabiriye icyiciro cya mbere cya ArtRwanda-Ubuhanzi mu 2018, akomeza guteza imbere ibikorwa byo guhanga no gukora imyambaro.

Mu 2019, yerekanye ibihangano bye muri Rwanda Fashion Week.

Mu 2022, yari mu bahanga imideli batandatu bitabiriye igikorwa cya Austria–Rwanda Fashion Connect, cyabereye muri Expo 2020 i Dubai.

Mu 2025, yitabiriye ArtRwanda-Ubuhanzi All Stars, aho umushinga we wo guhanga imyambaro idozwe yiteguye kugurwa wamuhesheje umwanya wa kabiri mu cyiciro cy’imideli.

Munezero akomeje guteza imbere Maison Munezero, ari na ko yagura ibikorwa bye mu ruganda rw’imideli.

Tuyishime Anaclet

Tuyishime Anaclet ni umuhanga mu guhanga imideli n’ibikoresho byambarwa, uzwi binyuze mu mushinga we wa Umuringa Fashion Code.

Mu 2022, yegukanye umwanya wa mbere mu cyiciro cy’imideli cya ArtRwanda-Ubuhanzi.

Ibikorwa bye byibanda ku gukora inkweto, amasakoshi n’ibindi bikoresho yifashishije uruhu n’ibitambaro, akabihuza n’ibitekerezo bye byo guhanga.

Mu 2025, yongeye kwitwara neza muri ArtRwanda-Ubuhanzi All Stars, aho yegukanye umwanya wa mbere mu cyiciro cy’imideli.

Icyo gihe yari yatanze umushinga wo gukora inkweto hifashishijwe ibikoresho byakoreshejwe, bikongera kubyazwa umusaruro.

Uyu mushinga ugaragaza uko ubuhanzi bushobora kugira uruhare mu guteza imbere ubucuruzi, ari na ko bugabanya imyanda yangiza ibidukikije.

Musafiri James

Musafiri James ni umwanditsi akaba n’umuyobozi wa filime, wanyuze mu cyiciro cya kabiri cya ArtRwanda-Ubuhanzi cyatangijwe mu 2022.

Yasoje amahugurwa y’iri rushanwa mu Ukuboza 2024, nyuma yo guhabwa ubumenyi bwamufashije gukomeza guteza imbere impano ye muri sinema.

Mu bikorwa yakoze harimo kwandika inkuru za filime z’uruhererekane zizwi cyane mu Rwanda, zirimo ‘City Maid’ na ‘Indoto’.

Mu 2024, yanditse anayobora filime ‘Weaving Bonds’, igaruka ku mubyeyi ugenda asobanukirwa agaciro k’impano y’umwana we.

Mu 2025, Musafiri yari mu begukanye ibihembo mu cyiciro cya filime muri ArtRwanda-Ubuhanzi All Stars.

Yakomeje gukoresha ubunararibonye yungutse mu kwandika no kuyobora filime, by’umwihariko izishingiye ku nkuru zigaruka ku mibereho y’abantu.

Urugendo rw’aba banyempano rugaragaza ko ubuhanzi bushobora kuvamo imishinga itanga akazi, igateza imbere ba nyirayo kandi igafasha mu gusigasira umuco nyarwanda.

Ni urugero ku rubyiruko rwitabiriye icyiciro cya kane cya ArtRwanda-Ubuhanzi, rugaragaza ko impano ishobora kuba isoko y’iterambere igihe iherekejwe n’ubumenyi, umurava n’ubufatanye n’abandi.