Amerika yatanze inkunga ya miliyoni hafi 50 Frw yo gufasha abagizweho ingaruka n’ibiza

Yanditswe na Habimana James
Kuya 16 Gicurasi 2020 saa 07:15
Yasuwe :
0 0

Ambasade ya Leta Zunze Ubumwe za Amerika, yatanze ibihumbi 50 by’amadolari, ni hafi miliyoni 50 z’amafaranga y’u Rwanda yo gufasha abagizweho ingaruka n’ibiza byatewe n’imvura.

Iki gihugu cyatangaje ko iyi nkunga izifashishwa mu gutanga ubutabazi bw’ibanze ku bantu basenyewe n’imvura mu karere ka Ngororero.

Ambasaderi wa Leta Zunze Ubumwe za Amerika mu Rwanda, Peter Vrooman, yavuze ko kubera imvura nyinshi imaze iminsi igwa, Minisiteri y’ibikorwa by’ubutabazi (Minema), ivuga ko ibihumbi byinshi by’abaturage bagizweho ingaruka zatewe n’umwuzure kandi yangiza n’ibintu byabo.

Yagize ati “Uyu munsi nemeye miliyoni hafi 50 z’amafaranga y’u Rwanda, azifashishwa gutanga ubutabazi ku bantu basenyewe n’imvura, azafasha imiryango yagaragajwe na Minema ngo babone ibikoresho bikenewe.”

“Ni inkunga ya USAID izahabwa umuryango Care International, kugira ngo itange ubutabazi bwihuse mu karere ka Ngororero, ibyo bikoresho birimo amasafuriya, ibiringiti, inzitaramibu, matera, ibikoresho by’isuku n’ibindi.”

Leta Zunze Ubumwe za Amerika kandi biciye muri Ambasade yayo mu Rwanda, iherutse gutanga miliyari enye z’amafaranga y’u Rwanda, yo gufasha guhangana n’icyorezo cya Coronavirus.

Minema ivuga ko imvura nyinshi imaze iminsi igwa yahitanye ubuzima bw’abaturage 72 hirya no hino mu gihugu, ikangiza ibikorwa remezo birimo ibiraro n’inzu.

Hangiritse kandi ibikorwa remezo birimo imihanda nk’umuhanda Gakenke-Vunga- Musanze, inzu 91 zasenyutse, ibiraro bitanu byacitse ndetse n’imyaka yatwawe n’imyuzure.

Raporo ya Minisiteri ishinzwe ibikorwa by’ubutabazi (Minema), igaragaza ko hagati ya Mutarama na Mata 2020, ibiza byishe abantu bagera ku 140 abandi 225 bagakomereka.

Hegitari 3117 z’imyaka zangijwe n’ibiza hagati ya Mutarama na Mata uyu mwaka, imihanda 124 n’ibiraro 64 birasenyuka bihungabanya ibikorwa by’iterambere abaturage bakora buri munsi. Inzu zirenga 3082 zarangiritse, imiryango ibariwa mu bihumbi ijya gucumbikishwa.

Minema itangaza ko amatungo yo mu rugo 3227 arimo inka 60 yishwe n’ibiza. Amashuri 36 yarasenyutse, ikigo nderabuzima, insengero 12, inzu z’ubuyobozi 10, ibikorwa remezo by’amazi 13 n’isoko rimwe, byarangiritse hirya no hino mu gihugu.

Ibikorwa remezo by’amashanyarazi 61 byarangiritse biteza ibura ry’umuriro mu bice bimwe na bimwe by’igihugu.

Ambasaderi wa Leta Zunze Ubumwe za Amerika mu Rwanda, Peter Vrooman, yavuze ko iyi nkunga izafasha abagizweho ingaruka n'ibiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .