Amerika n’u Bwongereza byongeye kuzamura inyito yakuweho ya Jenoside yakorewe Abatutsi

Yanditswe na Rabbi Malo Umucunguzi
Kuya 27 Gicurasi 2020 saa 08:48
Yasuwe :
0 0

Nyuma y’imyaka ibiri byemejwe ko itariki ya 7 Mata buri mwaka iba Umunsi Mpuzamahanga wo kuzirikana kuri Jenoside yakorewe Abatutsi mu 1994, ibihugu by’u Bwongereza na Leta Zunze Ubumwe za Amerika bikomeje kuzamura ubusabe bw’uko iyo mvugo ivugururwa, nubwo izo nzozi zitigeze zisohora.

Ku wa 23 Mutarama 2018 nibwo Inteko Rusange y’Umuryango w’Abibumbye yafashe umwanzuro ko tariki 7 Mata hazajya hibukwa Jenoside yakorewe Abatutsi, hahindurwa inyito yari isanzwe ko ari “Umunsi Mpuzamahanga wo kuzirikana kuri Jenoside yo mu 1994 mu Rwanda” yari yarashyizweho n’umwanzuro 58/234 wo ku wa 23 Ukuboza 2003, igatangira gukoreshwa mu 2004.

Ambasaderi w’u Rwanda mu Muryango w’Abibumbye, Valentine Rugwabiza, yasobanuye ko kongeramo “yakorewe Abatutsi”, bigamije gukuraho urujijo mu mvugo yari isanzwe ikoreshwa.

Ati “Kugaragaza ibyabaye n’amagambo akoreshwa ni ingenzi cyane igihe havugwa kuri jenoside. Amayeri yo guhakana no gupfobya Jenoside arazwi neza. Abantu barimo n’abayigizemo uruhare bakunze kuvuga ko habayeho Jenoside ebyiri bibwira ko kuvuga ibyo byabakuraho uruhare bayigizemo.”

Uwo mwanzuro icyo gihe watinzweho cyane, ibihugu bimwe bikawurwanya bivuga ko kongeramo ko ari jenoside “yakorewe Abatutsi”, byatuma hatazirikanwa abandi batari Abatutsi bishwe mu gihe Jenoside yakorwaga, bazizwa ko batari bashyigikiye uwo mugambi mubisha.

Mbere barifashe

Ubwo inyito y’umunsi wo Kwibuka yavugururwaga ku wa 23 Mutarama 2018, Leta Zunze Ubumwe za Amerika n’ibihugu byinshi bigize Umuryango w’Ubumwe bw’u Burayi, byashatse kuwubangamira, bivuga ko kongeramo ijambo “yakorewe Abatutsi”, bidatanga umwanya wo kwibuka abantu bose bishwe muri icyo gihe.

Mbere y’uko uyu mwanzuro utorwa ariko, Rugwabiza yahamije ko ibihugu byinshi bya Afurika byemeye kwifatanya n’u Rwanda, uhereye kuri Algeria, Bénin, Botswana, Burkina Faso, Repubulika ya Centrafrique, Tchad, Congo, Djibouti, Guinée équatoriale, Eritrea, Ethiopia na Gabon.

Harimo kandi Gambia, Ghana, Guinea, Israel, Kenya, Lesotho, Liberia, Madagascar, Mali, Mauritania, Mauritius, Monaco, Maroc, Namibia, Niger, Nigeria, Philippines, Sierra Leone, Afurika y’Epfo, Sudani, Swaziland, Togo, Turikiya, Uganda na Vietnam.

Byatumye umwanzuro wo guhindura iyo nyito ubona amajwi menshi cyane yari akenewe ngo utorwe, ndetse biriya bihugu ntibyirirwa bikoresha ububasha bw’ikirenga bihabwa ku kwemera cyangwa kwanga imyanzuro mu Muryango w’Abibumbye, buzwi nka ‘droit de veto”.

Amakuru yagiye hanze ni uko mu batoye uwo mwanzuro hatarimo Leta Zunze Ubumwe za Amerika n’ibihugu by’i Burayi, ahubwo Israel yakunze kenshi kwifatanya na Amerika yashyigikiye ubusabe bw’u Rwanda.

Kelley Eckels-Currie wari uhagarariye Amerika, icyo gihe, kimwe na mugenzi we w’ubu, yagaragaje ko guhindura inyito “bitagaragaza neza uburemere bwa Jenoside n’ubugizi bwa nabi bwakorewe andi moko”.

Amerika yongeye!

Mu nteko rusange y’Umuryango w’Abibumbye yabaye ku wa 20 Mata 2020, byongeye gushimangirwa ko tariki 7 Mata ari “Umunsi Mpuzamahanga wo kuzirikana kuri Jenoside yakorewe Abatutsi mu 1994 mu Rwanda.”

Nubwo iyo myanzuro yemejwe, bimwe mu bihugu ntibyanyuze ahubwo biza kuvuga ko mu buryo bw’ibiganiro hari aho bitagenze neza.

Intumwa ya Amerika mu Muryango w’Abibumbye, Kelly Craft, yavuze ko itariki ya 7 Mata yibutsa amahano akomeye yagwiriye ikiremwamuntu, ku buryo bikwiye ko kwibuka ibyabaye bitazigera bihagarara no kuzirikana ubukana bwabyo, nka bumwe mu buryo bwazatuma bidasubira ukundi.

Gusa azamura impungenge ku mwanzuro wemejwe n’Inteko Rusange y’Umuryango w’Abibumbye, ko ari Jenoside yakorewe Abatutsi.

Ati “Leta Zunze Ubumwe za Amerika ihangayikishijwe n’uko impinduka zakozwe ku nyito – guhera mu 2018 ikaba yashimangiwe uyu munsi – ikagabanya abarebwa n’umwanzuro ikaba gusa Jenoside yakorewe Abatutsi mu Rwanda, ntibashe kugaragaza ishusho yuzuye y’ubugizi bwa nabi bwakorewe ibindi byiciro.”

“Abahutu benshi hamwe n’abandi bishwe muri Jenoside, barimo abazize ko batemeranyaga n’amahano yakorwaga. Kutabasha guha icyubahiro no kwibuka aba bishwe bitanga isura ituzuye y’iki gice cy’amateka mabi.”

Ku bwa Amerika, ngo buri wese waguye muri Jenoside akwiye kwibuka.

Chargé d’Affaires w’u Bwongereza mu Muryango w’Abibumbye, Jonathan Allen, mu bisobanuro bye ku mwanzuro wasabaga gushimangira ko ari Jenoside yakorewe Abatutsi, yirinze gukoresha iyo nyito.

Ati “Dushyigikiye byimazeyo kwibuka abazize Jenoside yo mu 1994 mu Rwanda kandi twizera ko ari ngombwa guharanira ko ibyo bikorwa bizirikana abishwe bose.”

Yavuze ko bifuza kwifata kuri iyo nyito, hashingiye ku kuba impinduka batemera zo kwita Jenoside yabaye mu Rwanda ko ari “Jenoside yakorewe Abatutsi mu 1994”.

Yakomeje ati “Nk’uko bigaragara mu myanzuro yabanje, twemera ko Abahutu n’abandi bantu bishwe nabo bakwiye kuzirikanwa.”

Nubwo u Bwongereza bwifashe, ntibyabujije ko umwanzuro ukomeza kuba ko ku wa 7 Mata buri mwaka, hibukwa Jenoside yakorewe Abatutsi mu 1994.

U Rwanda rusanga nta shingiro bifite

Mu ibaruwa yo ku wa 28 Mata 2020, Ambasaderi w’u Rwanda mu muryango w’Abibumbye, Rugwabiza Valentine, yandikiye Umunyamabanga Mukuru w’uyu muryango, yavuze no nubwo ibyo bihugu byombi bibona akamaro ko gusigasira amateka no Kwibuka, hagamijwe ko Jenoside itazasubira, ibyo bavuga bitandukanye n’ibyo amateka agaragaza kandi byemeranywaho.

Yagaragaje imyanzuro itandukanye irimo uwo ku wa 9 Ukuboza 1948, ugaragaza ko ubwicanyi buba jenoside iyo bugamije kurimbura igice kimwe cy’abantu bafite icyo bahuriyeho.

Yakomeje ati “Ku bw’ibyo, kuba u Bwongereza butemeranya no kuvuga Jenoside yakorewe Abatutsi mu 1994, ni ukwirengagiza ibyo urukiko rwemeje.”

Yashimangiye ko ibyo biriya bihugu birimo gusaba ku Rwanda, bitandukanye n’amahame yo kwibuka y’Umuryango w’Abibumbye, kuko aba areba abantu bahigwaga.

Yakomeje ati “Aho gushyigikira ubwiyunge, ibisobanuro by’aho Amerika n’u Bwongereza bahagaze birazana urujijo rutiza umurindi ihakana rya Jenoside rikomeje kwiyongera mu Karere k’Ibiyaga bigari n’ahandi.”

Yavuze ko u Rwanda ariko rwakiriye neza ubusabe bwa Amerika bwo guta muri yombi abagize uruhare muri aya mahano, runasaba u Bwongereza gufata abakekwaho uruhare muri Jenoside bari ku butaka bwabwo ngo bagezwe imbere y’ubutabera.

Yashimangiye ko u Rwanda nta bubasha rufite bwo “guhatira” umunyamuryango uwo ari we wese kwemera ururimi rw’umwanzuro, ko ururimi rw’umwanzuro 74/273 rwemejwe nyuma y’ibiganiro bifunguye, nubwo ngo hari abagaragaje impungenge, mu biganiro bihuza ibihugu byinshi ngo si ko buri mpungenge zemerwa, kuko hakurikizwa igihuriweho na benshi.

IBUKA yamaganye iyo mitekerereze

Umunyamabanga Nshingwabikorwa wa Ibuka, Ahishakiye Naphtal, yavuze ko Jenoside yabaye amahanga arebera, ku buryo kugeza uyu munsi hatakabaye hari abagishidikanya kuri Jenoside yakorewe Abatutsi.

Yavuze ko na nyuma ya jenoside hari ibihugu byakomeje guha amatwi abakoze Jenoside ku buryo bibacumbikiye, ndetse bamwe bahawe ibyangombwa, ibintu ngo bidakwiye na busa.

Yakomeje ati "Ni ibintu bibabaje kubona nyuma y’imyaka 26, abantu bari ku rwego rwa ba ambasaderi b’ibihugu bikwiye kuba ari icyitegererezo mu kugira imyumvire iteye imbere, igihugu nka Amerika Ambasaderi Kelly Craft n’uyu w’u Bwongereza Jonathan Allen, ukabona imvugo zigayitse, inyandiko zigayitse bagejeje kuri Loni."

Mu yindi myanzuro, Inteko rusange yo ku wa 20 Mata ishishikariza ibihugu binyamuryango kujya byubahiriza umunsi wo Kwibuka Jenoside yakorewe Abatutsi, mu bikorwa byo guha icyubahiro abazize Jenoside.

Imyanzuro kandi isaba ibihugu guharanira ko nta yindi Jenoside yazabaho ukundi, yamagana ibikorwa byoguhakana Jenoside yakorewe Abatutsi mu Rwanda, ndetse igasaba ibihugu binyamuryango gufatanya n’u Rwanda mu “gukora iperereza, gufata, kuburanisha cyangwa kohereza abayigizemo uruhare basigaye.”

Amb Kelly Craft yasabaga ko n'abishwe kuko badashyigikiye Jenoside bajya bibukwa ku wa 7 Mata
Ambasaderi w'u Bwongereza mu Muryango w'Abibumbye, Jonathan Allen
Amb. Rugwabiza yagaragaje ko ibyavuzwe na Amerika n'u Bwongereza bidafite ishingiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .