Imbwirwaruhame 10 zikomeye zavuzwe na Gen James Kabarebe

Yanditswe na Rabbi Malo Umucunguzi
Kuya 24 Kanama 2020 saa 07:29
Yasuwe :
0 0

Gen James Kabarebe amaze kumenyekana nk’inararibonye mu bijyanye n’amateka y’u Rwanda, cyane ajyanye n’urugamba rwo kubohora igihugu, akagira umwihariko mu kuvuga, ku buryo iyo abara inkuru hari ubwo ushiduka ubirebera mu ntekerezo nk’aho ari filime.

Ni mu gihe kuko yabaye mu myanya ingamba zose zategurirwagamo, byinshi biba areba ku buryo biba atari inkuru mbarirano kuri we, ahubwo byinshi yarabyiboneye.

Gen Kabarebe yabaye mu myanya itandukanye aho yabaye Umugaba Mukuru Wungirije w’Ingabo z’u Rwanda, aza kuzibera Umugaba Mukuru, aba Minisitiri w’Ingabo, ubu ni Umujyanama Mukuru wa Perezida wa Repubulika mu bya gisirikare n’umutekano.

Mu nshingano zose yagiye ahabwa, hari imbwirwaruhame yakoze zakunze kugarukwaho, yaba ubutumwa yageneraga abashaka guhungabanya umutekano w’u Rwanda, ubutumwa ku rubyiruko cyangwa igihe yavugaga amateka, ngo buri wese akuremo inyigisho ashaka.

1. FDLR iteye ntiyamara iminota itanu mu gihugu

Ubwo yari akiri Minisitiri w’Ingabo, ku wa 11 Ukuboza 2017, Gen Kabarebe yavuze ko abarwanyi FDLR babarizwa mu mashyamba ya Congo, baramutse bateye u Rwanda batamara iminota itanu ku butaka bwarwo.

Ni nyuma y’uko tariki ya 4 Ukuboza 2012, Kabarebe na bagenzi be barimo uwari Minisitiri w’Imari n’Igenamigambi ndetse n’uw’Ububanyi n’Amahanga bagezaga ku Nteko Ishinga Amategeko ikibazo cy’umutekano mu karere ndetse no guhagarikirwa inkunga, yavuze ko FDLR idashobora gufata u Rwanda ndetse ko nta n’isaha yahamara.

Yagize ati “Ntabwo FDLR yakwinjira mu Rwanda ngo imaremo isaha, ibyo ndabibasezeranyije rwose, uko yaza ingana kose, wenda kubera imipaka, utarinda buri metero y’umupaka amanywa n’ijoro, wenda hari abashaka aho baca bakinjira, baba magana atatu, baba igihumbi, ntabwo FDLR yamara isaha mu Rwanda, ni ibintu bidashoboka.”

Ubwo yagezaga ikiganiro ku Ntore z’Inkomezamihigo zari mu Itorero Urunana rw’Urungano mu kigo cya gisirikare cya Gabiro mu Karere ka Gatsibo, mu 2017, bwo yagize ati “Mu Nteko twavuze ko FDLR itamara isaha imwe mu Rwanda, ubu byabaye iminota itanu, ntabwo bikiri isaha imwe.”

Yakomeje ati “Ubwa nyuma FDLR itsindwa byari mu 2002 muri Gicurasi. Uruhare runini FLDR yatsinzwe n’abaturage bo mu Majyaruguru, za Rubavu, Nyabihu, Ngororero, Musanze, Gakenke, kubera ko ababyeyi nibo bafataga abana babo, kenshi bakababeshya ngo nimuze mu rugo tubahe ibiryo, umubyeyi yaha umwana w’umucengezi ibiryo, umwana yaba arimo kurya umubyeyi akamwaka imbunda, akamufata akamuzirika agahamagara ingabo ati bari hano. Ni uko Intambara y’igicengezi yarangiye.”

2. Kayumba Nyamwasa ni igisambo n’umuhemu

Mu kiganiro Gen. James Kabarebe yahaye urubyiruko rugera kuri 200 rubarizwa mu muryango w’abanyeshuri barokotse Jenoside yakorewe Abatutsi mu 1994, AERG, mu Ukwakira 2016, ubwo yari akiri Minisitiri w’Ingabo, yagarutse ku buryo abacamanza babiri b’Abafaransa, Jean-Marc Herbaut na Nathalie Poux baherukaga gutangaza isubukurwa ry’iperereza ku ihanurwa ry’indege ya Habyarimana, bikurikirwa n’ubuhamya bwa Kayumba Nyamwasa wahunze igihugu washinje abayobozi b’u Rwanda uruhare muri icyo gikorwa.

Yababwiye ko ipfundo ry’ubucuti bwa Kayumba n’Abafaransa nta kindi kibwihishe inyuma, uretse ubusambo no gushaka guhirika ubutegetsi buriho mu Rwanda ngo babone uko bakora Jenoside.

Yagize ati “Biriya bagiye muri Afurika y’Epfo bagashaka ibisambo nka ba Kayumba bakamugira inama, sinzi ibyo bamusezeranyije niba ari amafaranga, kuko na we yabonye ko intambara ze ntaho ziva ntaho zigana, bati ‘noneho bishyire kuri Perezida, ya dosiye yo kuvuga abantu 40 ngo barashe indege ya Habyarimana, oya vuga ko ari Perezida, Kabarebe na Kayonga, batatu, nibyo biri bushoboke kuko uwo dushaka ni Perezida.”

“Bagomba kuba baramuhaye amafaranga menshi, ariko icyo bashaka ni uguhirika ubutegetsi buriho, bagamije guca intege uburyo abaturage bayobowe. Niba ushaka Perezida, urashaka igihugu, niba ubigezeho, Jenoside irabaye!”

Ubu butumwa bujya gusa n’ubwo yatanze umwaka ushize, mu kiganiro yahaye Inkeragutabara zisaga 1000 zo mu Turere twa Rubavu na Musanze, zari zikoraniye muri Nyabihu.

Yagize ati “Niba hari umuntu w’umuhemu ubaho, watangaho urugero rw’ubuhemu, ni Kayumba Nyamwasa. Kubera ko Kayumba Nyamwasa icyo yabaye cyo mu Ngabo za RPA, yarakigizwe ntabwo yacyigize. Nta n’igitangaza yakoze mu ngabo za RPA nko mu rugamba rwo kubohora igihugu cyacu, nta na kimwe yavuga ati ‘nakoze aka kantu aha n’aha’, ku buryo nagahemberwa. Nta na kimwe afite yavuga.”

“Ahubwo yagiriwe neza igihe cyose, hari ukuntu umuntu agira amahirwe mu bihe bitandukanye, bitewe n’ibihe uko biteye, akagira amahirwe akagendera ku bandi, akagirwa icyo aricyo, ariko iyo ari umunyabwenge buke, iyo ari umuhemu mu buzima bwe, iyo nta burere agira, iyo ari umunyamusozi, ibyo byose abipfusha ubusa. Kayumba ni umuhemu.”

3. Mwitegure kugira ibibazo – Yabwiraga Joseph Kabila

Urugamba rwo kubohora Congo rwanahiritse ubutegetsi bwa Mobutu, rwatangiye binyuze mu guhuriza hamwe abarwanyaga Mobutu no kubongerera imbaraga, barimo Deogratias Bugera wayoboraga ADP (Alliance démocratiques des Peuples), bashinga AFDL (Alliance de forces démocratiques pour la libération du Congo).

Colonel James Kabarebe (ubu ni Jenerali w’inyenyeri enye) ni we wari ushinzwe ibikorwa bya gisirikare muri AFDL.

Kabarebe aheruka kuvuga uburyo nubwo abaturage bari bishimiye impinduka zari zirimo kuba mu gihugu cyabo, yaburiye Laurent Désiré Kabika ko nibadakorera abaturage, nabo bazabatera umugongo.

Ati "Bari bishimiye cyane impinduka zari zirimo kuba. Ariko kuri Kabila by’umwihariko, icyari guhindura uko ibintu byari bimeze cyose cyari cyemewe. Baririmba rero ngo harakabaho ukwibohora, ukwibohora."

"Ariko ndibuka icyo gihe icyo nabwiye umuhungu we Joseph Kabila, nti ‘ntimuhumwe amaso n’izi ndirimbo, aba baturage uyu munsi baririmba ukwibohora, ukwibohora, ejo cyangwa undi munsi nibo bashobora kuzajya mu mihanda bigaragambya kubera mwe. Iby’ingenzi ni ibyo muzabaha. Aba bantu batsikamiwe imyaka myinshi, bafite icyizere ko umunsi umwe tuzabazanira ikintu gishya. Rero utagize icyiza ubakorera, mwitegure kugira ibibazo.”

Ubwo ibintu byari bikomeye, Mobutu yahise ava mu gihugu, Laurent Désiré Kabila akomeza gusatira Umurwa Mukuru Kinshasa.

Kabarebe ari "Nahamagaye Kabila kuri telefoni y’icyogajuru, ndamubwira nti Kinshasa twayifashe. Ati Ni byo? Ibyishimo biramurenga, araseka, arishima cyane ndamubwira nti ibintu byose biri ku murongo, ushobora kuza. Akomeza kumbaza niba ndimo kuvugisha ukuri. Yari mu nzu ye i Lubumbashi ari kumwe na Lt Col Murokore. Murokore yatatse asaba ubufasha kubera ko Kabila yari yamutuye hasi."

"Ibaze Kabila na Lt Col Murokore barimo kwibarangura hasi n’ibilo bya Kabila, yari atangiye kubura umwuka. Kabila yari arimo gusakuza ati ubu mbonye ubutegetsi, ndi perezida wa Congo, ndi byose …"

4. Uko Ntawunguka yamubwiye ko azagaruka mu Rwanda nta Mututsi ukirurimo

Mu Ukwakira 2016 mu kiganiro yahaye urubyiruko rugera kuri 200 rubarizwa mu muryango w’abanyeshuri barokotse Jenoside yakorewe Abatutsi mu 1994, Umujyanama wa Perezida wa Repubulika mu by’umutekano, Gen James Kabarebe, yagarutse kuri Gen Ntawunguka wamubwiye ko azagaruka mu Rwanda nta mututsi ukirurimo.

Nyuma y’uko Ingabo za Repubulika ya Demokarasi ya Congo (FARDC), zishe umuyobozi wa FDLR-FOCA, Gen Sylvestre Mudacumura, uyu mutwe washyizeho Gen Maj Pacifique Ntawunguka ngo awoyobore.

Gen. Kabarebe ati "Njye ubwanjye naramwihamagariye nti ’Pacifique ko wize, uri umupilote wigiye mu Bufaransa, ntabwo uri injiji, ayo mashyamba ya Congo urimo imyaka makumyabiri n’ingahe, ntugeraho ugashishoza ibyo urimo? N’intambara yarananiranye ntabwo uzayitsinda, ntugeraho ukibwira? Icyo tugusaba kandi turabizi nta nubwo wakoze Jenoside kuko iba wari mu Bufaransa waragiye mu mahugurwa y’indege, urarwanira iki ko udatinya urubanza?"

"Aranyumvaaa, ati ’Jenerali, reka nkubwire ikintu kimwe. Njyewe kugaruka mu Rwanda, nzagaruka mu Rwanda nta mututsi n’uyu n’umwe uri muri icyo gihugu’. Ati ’niba hari ikindi washakaga kongeraho, kumbwira, ikiganiro tukirekere ahangaha’. Mva kuri Ntawunguka, kuva icyo gihe sinongeye kuvugana nawe."

Gen. Kabarebe avuga ko yamubwiye ko Se yamwise nabi (Ntawunguka), kuko amaze imyaka myinshi mu ntamabara aba mu mashyamba, ariko akaba adateze kuyitsinda cyangwa ngo agire indi yunguka.

Ati "Imyaka 20 umaze mu mashyamba ya Congo, utagira aho uba, unyagirwa buri munsi, Maï-Maï zikwirukansa, FARDC ikwirukansa, natwe tukaza tukakwirukansa, ugahera muri ibyo uri umupilote, warize amashuri, imyaka 20 muri ibyo bishyamba, ntacyo wungutse nk’izina ryawe, nta nicyo uzunguka, uzagwa muri ayo mashyamba, ahubwo ibyago ufite nta n’umututsi uzongera kubona, nuwo kwica ntawe uzabona kuko ntuzava muri iryo shyamba."’

5. Umwarimu wamwangishije kuririmba yishwe n’inkuba

Muri Mutarama 2020 nibwo Gen Kabarebe yagejeje ikiganiro ku barimu bo mu mashuri yisumbuye bigisha amateka, bari mu itorero mu Karere ka Nyanza. Yavuze amateka ye akiri ku ntebe y’ishuri, aho umwarimu umwe yamukundishije ururimi rw’Icyongereza, undi akamwangisha kuririmba burundu.

Icyo gihe yabihuzaga n’uko abarimu bakwiye iteka kuba abayobozi b’abo bigisha, bityo bagakora ibyiza kugira ngo babafatireho urugero.

Yasobanuye ko byamubayeho ari muri Uganda aho bari barahungiye, yiga mu ishuri ribanza. Icyo gihe ngo bari barimo kuririmba mu Kiliziya, baririmbishwa n’umwarimukazi wangaga Abanyarwanda.

Ati "Turirimba ndi ku murongo w’imbere, arankubita, arambwira ngo ntashaka no kubona nasamura umunwa. Ngo ntashaka no kumbona imbere ye ’ngo genda ujye ku murongo w’inyuma’. Iyo ndirimbo twaririmbaga uwo munsi ni yo ndirimbo naririmbye bwa nyuma, kugeza uyu munsi sindongera.”

Yakomeje abasangiza ibyabaye uwo munsi n’uko inkuba yaje gukubita uwo mwarimu agapfa, kuko imvura yagwaga cyane.

Ati "Ngiye ku murongo w’inyuma, imvura yaragwaga, irakomeza iragwa, inkuba irakubita iterura mwarimukazi n’umurongo wa mbere, uwa kabiri n’uwa gatatu, hasigara imirongo itatu y’inyuma. Mwarimu imucisha mu idirishya agwa hanze ari umurambo, n’abana 16 bari imbere barapfa, dusigara turi imirongo y’inyuma, mponoka muri abo ngabo."

6. Guhagarika Jenoside byasabye icyemezo cy’umuntu umwe

Mu kiganiro n’Abanyarwanda batandukanye batuye ku mugabane wa Aziya, Uburasirazuba bwo hagati na Pasifika, haganirwa ku rugendo rwo Kwibohora rumaze imyaka 26, muri Nyakanga 2020, Kabarebe yagaragaje uburyo ubutwari bwa Perezida Kagame wayoboye urwo rugamba ari rwo musingi w’instinzi imaze iyi myaka yizihizwa.

Ubwo urugamba rwari rwahinanye i Gikoba muri Nyagatare, ingabo za Habyarimana zigakora ibishoboka byose ngo zibakure mu myobo barwaniragamo bikananirana, ingabo barwanaga ngo zari zazanye ibikoresho byose bishoboka, umwanzi baramunaniye, ariko ngo ntibagombaga kuguma mu myobo.

Gen Kabarebe yavuze ko igitekerezo cyo kuva aho hantu cyari gifitwe n’umuntu umwe ari we Kagame, aza kubabwira ko bahava bagaba igitero i Byumba, bakomereza ku Mulindi.

Yakomeje ati "Buriya guhagarika Jenoside byasabye umuntu umwe gusa, gufata icyemezo, buriya iyo tutagira umuyobozi ufata icyemezo nka kiriya, Jenoside yari kuba tukaguma ku Mulindi, tukaguma mu birindiro byacu dutegereje Minuar, dutegereje iki. Ariko murabona Jenoside yatangiye ku itariki zirindwi, mu matariki umunani Inkotanyi zari zamanutse zaje, icyemezo cyafashwe."

7. Yakebuye "abahunahuna" muri Uganda

Mu gihe umubano mubi hagati y’u Rwanda na Uganda wari ukomeje gufata indi ntera, muri Kamena 2018, Gen Kabarebe wari Minisitiri w’Ingabo yavuze ko u Rwanda ruturanye n’ibihugu birufitiye ishyari, ku buryo bitarwifuriza ibyiza.

Yakomeje agira ati "Reba u Bugande uko bumeze buri munsi, mwirirwa mujyayo babafata bafunga, bakubita, bacunaguza, buri munsi barakubise, barakubiiise, ariko ntimwumva. Barahondagura buri munsi bagakubita, bagacunaguza Abanyarwanda, ubu ambasade yacu nta kintu igikora, ambasade yacu muri Uganda icyo ikora ni ukwirirwa ishaka abanyarwanda bafashwe, bafunzwe, bakubiswe…"

"Muhunahuna Uganda, muhunahunayo mushaka iki? Mwakubatse igihugu cyanyu! Murinda kujya gukubitirwa hariya mushakayo iki? Uganda ko twayivuyemo, ko twayibayemo, twayihunzemo, tugatanga amaraso yacu tukabohora igihugu cyanyu?"

Gen. Kabarebe yakomeje avuga ko Abanyarwanda bakomeje kwicirwa muri Uganda, abasore bamaze gukorerwa iyicarubozo ndetse ngo ikibaye cyose muri Uganda gisigaye cyitirirwa umunyarwanda cyangwa u Rwanda.

Yagize ati "Agakomye kose muri Uganda ni u Rwanda. Umuntu wapfuye wishwe n’Umugande ku mpamvu zabo cyangwa Leta yabo, ngo ni umunyarwanda [wabikoze], ikibaye cyose, ngira ngo biraza kugera aho Umugande narwara grippe (ibicurane) bati ni Umunyarwanda, narwara malariya bati ni Umunyarwanda, buri kintu cyose, ariko ibyo biba bifite icyo bihatse, ni uko batishimiye uko dutekanye, tumeze neza, tukaba dutera imbere, n’ubuyobozi bwacu bugeze ku rundi rwego, ni ishyari! Ni ishyari nta kindi! Ubwo se tuba tugiyeyo kumara iki? Twakubatse igihugu cyacu n’abandi bakaza hano? N’abagande bazaze, ntabwo tuzabangira!”

8. Uko yarwanye n’Intare

Mu rugendo ruganisha ku rugamba rwo kwibohora ingoma yavanguraga Abanyarwanda, Gen. Kabarebe yavuze ko Abanyarwanda bahuye n’ibigeragezo byinshi, akaba hari aho yageze we akarwana n’Intare.

Muri Nyakanga 2013, Gen. James Kabarebe yavuze ko mu mwaka 1982 ubwo yari impunzi muri Uganda, umunsi umwe yari agiye ku ishuri anyura ku ngabo za Milton Obote zirimo gukina amakarita, imbunda zirambitse iruhande rwabo.

Zikimukubita amaso aho yari mu muhanda hafi yabo, ngo bateruye imbunda baravuga bati "Kariya ni akanyarwanda", batangira kumwigiraho kurasa amasasu amwe agwa iruhande rwe, andi agwa aho avanye ibirenge, kugeza arenze. Uyu munsi ngo ni wo watumye ibitekerezo bya Gen James Kabarebe bihinduka, yishyiramo ko agomba kuba umusirikare.

Ubwo Abanyarwanda bari impunzi muri Uganda bari bafashe umwanzuro wo gutaha mu Rwanda mbere y’itangira ry’urugamba rwo kwibohora mu 1990, batashye mu Rwanda binjirira mu Mutara n’inka zabo, bakambika hafi y’ikiraro cya Kazaza.

Saa sita zijoro ngo batewe n’Intare yari iturutse Nyarupfubire, Kabarebe atangira kurwana nayo, we n’abandi basore 12 bari kumwe.

Ahereye ku byo abantu bavugaga ko umuntu urwana n’Intare atajya asubira inyuma, Kabarebe ngo yafashe inkoni atangira kurwana nayo afatanyije na bagenzi be, kugera saa kumi n’imwe za mugitondo, Intare iragenda.

9. Ntabwo ingabo z’u Rwanda zagiye muri Congo kwica Abanyarwanda

Ku wa 18 Nyakanga kuri televiziyo y’igihugu, Gen James Kabarebe, yatanze ikiganiro cyagarukaga ku rugendo rwo Kwibohora, agaruka ku buryo Ingabo z’u Rwanda zagize uruhare mu gucyura impunzi zari zaraheze mu nkambi muri Congo.

Yasobanuye ko ubwo Guverinoma yakoze Jenoside yari imaze gutsindwa n’Inkotanyi, yahungiye muri Zaire hamwe na miliyoni z’abaturage, bagenda bavanze n’abasirikare bahunganye imbunda zabo uko zakabaye, maze bashinga inkambi hafi y’umupaka, aho wahagarara ugatera ibuye mu Rwanda.

Nubwo abaturage bari impunzi, ngo hari ababyungukiyemo nk’imiryango mpuzamahanga "bumva ko ari ikiraka, ari amakiriro, aribo batanga buri kintu cyose guhera ku mazi kugera kuri biscuits, bityo ntibifuzaga ko impunzi zataha."

Izo mpunzi zakomeje imyitozo hamwe n’Interahamwe, kugeza ubwo mu 1995 bongeye kwica abantu ku bice byegereye Congo, leta y’u Rwanda ifata icyemezo cyo gucyura impunzi byanze bikunze.

Gen Kabarebe yagize ati "Mu gikorwa cyo gucyura abantu kuva muri Zaire, nta nkambi n’imwe uhereye Katale, Kahindo, Kibumba, Mugunga, Katana, Gashusha, Kansanyo na Kamanyola mu majyepfo ya Kivu, zose uko zari ku murongo nta nkambi n’imwe yabereyemo imirwano, nta nkambi n’imwe yatewe”.

"Icyakozwe ni ukuzenguruka izo nkambi zose Ex-FAR ikava mu nkambi ikaza gutera ingabo z’u Rwanda noneho ingabo zikabona uko zicyura impunzi. Ntabwo ingabo z’u Rwanda zagiye muri Congo kwica abanyarwanda, zagiye muri Congo gucyura abanyarwanda bari bafashwe bugwate n’iyo mitwe yari yarakoze amahano mu Rwanda.”

Yavuze ko kuvuga ko ingabo z’u Rwanda zagiye muri Congo kwica abantu ari icengezamatwara ry’abafite ipfunwe ry’uko batsinzwe urugamba, bagitsimbaraye kuri bya bitekerezo byabo. N’abantu ngo baba barapfuye cyangwa bagakomereka, yaba ari impanuka bagize mu kurasana kw’Ingabo z’u Rwanda n’Interahamwe, bagafatwa n’amasasu ariko atari bo bagambiriwe.

Ati "Miliyoni esheshatu zapfa ahantu ntihaboneke n’umurambo n’umwe? Miliyoni esheshatu ni abantu bapfa bakazimira ntubone n’umuntu? Icyo cya mapping report gihoraho. Iyo rero ni propaganda, ni nayo bakoresha mu gufata bugwate abana benshi b’urubyiruko, cyangwa se impunzi nyinshi zikiri za Brazaville, Zambia, Malawi, Mozambique, Zimbabwe, Lesotho, muri Afurika yose, kuko badafite ikintu bahimba, ntabwo bafite uko baguma bafashe izo mpunzi bugwate, kuko ntibashaka ko impunzi zibavaho.”

https://igihe.com/amakuru/u-rwanda/article/ntabwo-ingabo-z-u-rwanda-zagiye-muri-congo-kwica-abanyarwanda-zagiyeyo

10. "Uwiha kurwanya Perezida Kagame ndamubabarira"

Gen Kabarebe aheruka kuvuga ko abirirwa bavuga ko bashaka kurwana n’u Rwanda ntacyo bashobora kugeraho, ko icyo bakora gusa ari ukwirirwa bavuga ku mbuga nkoranyambaga n’ahandi.

Ku wa 7 Werurwe 2019, yari yitabiriye ibiganiro byateguwe na Minisiteri y’urubyiruko, byiswe ’Rubyiruko Menya Amateka Yawe’, byahabwaga urubyiruko ruturutse mu Ntara zitandukanye z’igihugu, mu kigo cy’urubyiruko cya Kimisagara.

Yagarutse ku butwari bwa Perezida Paul Kagame kuva urugamba rwo kubohora u Rwanda rwatangira, avuga ko mu buzima bwe yaranzwe no kurwana urugamba kandi ntatsindwe. Yavuze ko mu buzima bwe, mu gihe yabaga ari ku rugamba n’abo yabaga ayoboye, ijambo gutsindwa ritabagamo.

Ati "Ibintu byo kurwana intambara, mu mateka ye, Perezida Kagame nta mateka yo gutsindwa urugamba afite, mu myumvire ye gutsindwa ntabwo bijya bibamo, nta kintu cyitwa gutsindwa kiba mu myumvire ye, tunarebe no mu zindi ntambara, buri gihe yarateguraga, akagupangira intambara, akaguha gahunda kandi akaba azi ko ugomba gutsinda."

"Ibyo gutsindwa ntibijya biba mu myumvire ye, ntabwo yemera gutsindwa, n’aba bose mujya mwumva ko barwanya u Rwanda hirya no hino, uwakwiha kumurwanya ndamubabarira kuko njye mbizi, kuvuga ngo yatsindwa ni ukwibeshya, nta na hamwe yatsindwa."

"Nkatwe abasirikare yayoboye tuba tuzi ko bidashoboka, n’aba birirwa bakoresha za YouTube, ni umunwa gusa, ni urusaku gusa, ariko iby’intambara byo babyibagirwe, intambara zigira ba nyirazo."

Gen Kabarebe ni umuhanga mu kuganira, cyane iyo avuga inkuru z'urugamba
Gen Kabarebe yabaye Umugaba Mukuru w'Ingabo z'u Rwanda mu gihe kinini
Gen Kabarebe yanabaye Umugaba mu ngabo za RDC
Gen Kabarebe ubu ni Umujyanama Mukuru wa Perezida wa Repubulika mu bya Gisirikare n'Umutekano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .