00:00:00 IGIHE NETWORK KN KINYARWANDA EN ENGLISH FR FRANCAIS

Akari ku mutima wa Lt Gen Muhoozi nyuma yo guhura na Perezida Kagame

Yanditswe na Iradukunda Serge
Kuya 23 January 2022 saa 10:26
Yasuwe :

Umuhungu wa Perezida wa Uganda akaba n’Umugaba w’Ingabo z’iki gihugu zirwanira ku butaka, Lt Gen Muhoozi Kainerugaba yavuze ko u Rwanda na Uganda bifite byinshi bisangiye ku buryo abibona nk’igihugu kimwe, agaragaza ko byiyemeje gukemura ibibazo bifitanye kugira ngo umubano mwiza byahoranye wongere kubaho.

Ni amagambo Lt Gen Muhoozi Kainerugaba yatangaje nyuma y’umunsi umwe ahuye na Perezida w’u Rwanda Paul Kagame bakaganira ku buryo bwo kuzahura umubano w’ibihugu byombi.

Abinyujije kuri Twitter, yavuze ko u Rwanda na Uganda bifite byinshi bihuriyeho ku buryo abifata nk’igihugu kimwe.

Yavuze ko kubera amateka ibihugu byombi bifitanye, umuryango we wageze aho nawo witwa Abanyarwanda.

Yagize ati “Nabayeho igihe kinini gihagije kinyemerera kumenya ko u Rwanda na Uganda ari igihugu kimwe! Mu buhunzi muri za 1980 njye n’umuryango wanjye natwe batwitaga ‘Abanyarwanda’. Abanzi nibo bonyine bashobora kurwanya ubumwe bwacu. Mureke dukemure utu tubazo duto vuba ubundi dukomereze urugendo hamwe nk’uko byahoze.”

Ubwo Yoweri Kaguta Museveni yari mu rugamba rwo gufata ubutegetsi muri Uganda, umugore we, Janet Museveni n’abana babo bahungiye muri Kenya nyuma baza kuhava bajya muri Suède, aha niho bishoboka ko baba bariswe Abanyarwanda nk’uko Muhoozi yabivuze.

Gen Muhoozi yatangaje ko ashingiye ku biganiro yagiranye na Perezida Kagame, umubano w’ibihugu byombi ushobora gusubizwa ku murongo mu gihe cya vuba.

Ati “Ndashimira Perezida Paul Kagame, kubera uburyo uyu munsi njye n’itsinda ryanjye twakiriwe neza i Kigali . Twagiranye ibiganiro byimbitse byo kurebera hamwe uburyo bwo kunoza umubano. Ndahamya ko hashingiwe ku miyoborere y’abakuru b’ibihugu byacu tuzabasha kugarura umubano mwiza uri mu mateka yacu vuba bishoboka.”

Ibiro by’Umukuru w’Igihugu byatangaje ko Perezida Kagame na Gen. Muhoozi bagiranye ibiganiro byiza kandi “bitanga icyizere ku bibazo u Rwanda rwagaragaje” n’ibikwiye gukorwa kugira ngo umubano w’ibihugu byombi usubire mu buryo.

Uretse kuganira ku bibazo ibihugu byombi bifitanye, ibi biganiro byanasize Uganda isubijwe umusirikare wayo witwa Private Ronald Arinda wafatiwe ku butaka bw’u Rwanda.

Muhoozi yageze mu Rwanda ku wa Gatandatu tariki 22 Mutarama 2022, agirana ibiganiro na Perezida Kagame.

Ni ibiganiro byabaye nyuma y’uko uyu mugabo yanditse kuri Twitter agaragaza ko afata Perezida Kagame nk’umwe mu bagize umuryango we ko ndetse umurwanya na we amufata nk’umwanzi we.

Ni amagambo yatunguye benshi kuko Lt Gen Muhoozi yayavuze mu gihe Uganda n’u Rwanda bimaze iminsi birebana ay’ingwe.

U Rwanda rushinja Uganda guhohotera Abanyarwanda no gutera inkunga abashaka ku ruhungabanyiriza umutekano.

Lt Gen Muhoozi Kainerugaba yagaragaje ko ibiganiro yagiranye na Perezida Paul Kagame bishobora gutuma umubano wa Uganda n'u Rwanda usubira mu buryo
U Rwanda na Uganda bimaze igihe bidacana uwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .