Icyizere ni cyose ku ngamba zo kurwanya COVID-19 nyuma y’isubukurwa ry’ingendo z’indege

Yanditswe na Iradukunda Serge
Kuya 6 Kanama 2020 saa 11:49
Yasuwe :
0 0

Nyuma y’iminsi itandatu u Rwanda rwongeye gufungura ingendo z’indege na RwandAir igasubukura ibikorwa, abamaze gukora ingendo zinjira mu Rwanda barishimira serivisi bahabwa, n’uko igihugu kibakira kikabafasha kwipimisha Covid-19 kandi bakabonera ibisubizo ku gihe.

Ubwo RwandAir yasubukuraga izi ngendo ku wa 1 Kanama, Umunyarwanda utuye mu mujyi wa Dubai, Aime Musonerwa, yafashe indege y’iyi sosiyete asubira mu rwamubyaye, dore ko yari amaze igihe atabonana n’inshuti n’abavandimwe.

Aganira na Televiziyo Rwanda, Musonerwa yavuze ko ntacyari gutuma atagirira u Rwanda icyizere mu bijyanye no gufasha abarugana kwirinda Covid-19, cyane ko n’amahanga akirufitiye.

Ati “Ni uko amahanga yagiriye u Rwanda icyo cyizere, nanjye ndavuga nti nk’Umunyarwanda kubera iki ntagira icyo cyizere cy’uburyo u Rwanda rwashyizeho kugira ngo rurwanye Coronavirus? Bituma rero mfata umwanzuro wo kuza mu Rwanda.”

Mbere yo gufata urugendo, Musonerwa yabanje kwipimisha Covid -19 basanga ntayo afite, ndetse na nyuma yo kugera ku kibuga mpuzamahanga cy’indege cya Kigali, arongera arapimwa.

Musonerwa avuga ko abaganga batatinze ku mugezaho ibisubizo bye aho yari yabaye ashyizwe muri Kigali Marriot Hotel.

Yagize ati “Nahageze nka mu gitondo, bari bambwiye gutegereza amasaha 24 ariko nabibonye kare, ndabashimira uburyo bashyizeho bwo guhuza amakuru kuko ibibazo nabajijwe n’abaganga ku kibuga cy’indege, nibyo bibazo nabajijwe n’abaganga kuri Marriot.”

Umuyobozi Mukuru w’Ikigo cy’Igihugu cy’Ubuzima, RBC, Dr Sabin Nsanzimana, avuga ko kugeza ubu nta mbogamizi n’imwe bari bahura nayo mu buryo abava hanze bakirwa bigendanye no kwirinda Covid-19, ndetse bazakomeza kubahiriza amasaha 24 yashyizweho ngo umugenzi abe yamaze kubona ibisubizo bye.

Yagize ati “Bageze aha ku kibuga naho twabonye byaragenze neza, kugeza ubu ikindi twifuzaga ni uko kuva ku kibuga kugera mu mahoteli bategererezamo amasaha 24 mbere y’uko bataha, bapimwa kandi bagahabwa ibisubizo ku gihe, ndetse byagenze neza kurusha n’uko twari twabyiteguye, hari n’ababibonye mu masaha ari munsi ya 24, ku buryo nta muntu n’umwe wigeze arenza igihe cyari giteganyijwe.”

Dr Nsanzimana avuga ko kuva u Rwanda rwafungura ingendo z’indege, uko abagenzi biyongera ari nako inzego z’ubuzima zikomeza kongera ubushobozi mu gupima abantu benshi, kandi bakabona ibisubizo mu gihe gito.

Nubwo u Rwanda rukomeje gukora ibishoboka byose mu gukumira ubwandu bushya bwa Covid-19 yaba ubwava hanze y’igihugu n’imbere mu gihugu, umubare w’abandura iki cyorezo ukomeje kwiyongera dore ko kugeza uyu umunsi abagera kuri 2,104 bamaze kucyandura barimo 5 batanu bacyanduye ku wa 5 Kanama.

Abamaze gukira ariko nabo biyongera buri munsi kuko bamaze kuba 1237, mu gihe abo kimaze guhitana ari batanu.

Abamaze gukorana ingendo na RwandAir nyuma yo gusubukura ibikorwa byayo bishimira uburyo bakirwa ndetse n'igihugu kikabafasha kubona serivisi zo kwipimisha zihuse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .