Irengayobora ku bashaka gushyingirwa imbere y’amategeko

Yanditswe na Iradukunda Serge
Kuya 16 Ukuboza 2020 saa 01:30
Yasuwe :
0 0

Minisiteri y’Ubutegetsi bw’Igihugu yasabye abari bafite ubukwe muri iyi minsi kubusubika ariko yemeza ko abifuza gushyingirwa mu mategeko bashobora gufashwa bitewe n’uburemere bw’impamvu bafite yatuma uyu muhango udasubikwa.

Kuba abari bafite ibirori by’ubukwe basabwe kubisubika, bije nyuma y’ingamba zo kurwanya icyorezo cya Covid-19 zafatiwe mu Nama y’Abaminisitiri yateranye ku wa 14 Ukuboza, zirimo n’izivuga ko amateraniro rusange harimo imihango y’ubukwe, ubusabane n’ibirori bitandukanye byaba ibibera mu ngo cyangwa ahandi hose bibujijwe.

Minisitiri w’Ubutegetsi w’Igihugu, Prof Shyaka Anastase, ubwo yagarukaga kuri iyi ngingo mu kiganiro yagiranye n’itangazamakuru kuri uyu wa 16 Ukuboza yavuze ko abari bafite ubukwe bakwiriye kumva ko bagomba kubusubika.

Ati “Turagira inama abari bateguye ubukwe gusubika ibirori byose by’ubukwe, rwose niba wari wateganyije kuzakora ibirori byiza cyane muri abantu 700, 300 nyabuna bisubike bige muri Mutarama.”

Yakomeje avuga ko abashobora kugira impamvu yumvikana basezeranywa imbere y’amategeko ariko bagaherekezwa n’abantu bake ndetse ntibakore ibirori byo kwiyakira.

Ati “Hari n’igihe bishoboka ko umukwe n’umugeni bashobora kuba nta yandi maburaburizo bafite ntanze nk’urugero hari ibyagiye bigaragara ugasanga abantu bavuye hanze, umugeni cyangwa umukwe yavuye hanze ari icyo kimuzanye kandi agomba gusubirayo aho rero bimaze kuganirwaho birumvikana.”

Prof Shyaka yasabye ababa bafite impamvu yumvikana kugana ubuyobozi bw’Umurenge bakawusobanurira, ndetse anibutsa ko abemerewe guhabwa iyi serivisi umugeni aherekezwa n’abantu babiri gutyo kandi ntibakore ibirori byo kwiyakira.

Iki cyemezo cyo guhagarika imihango y’ubukwe n’ibindi byafatiwe muri iyi nama bigamije kurushaho gukumira ubwandu bwa Covid-19 bwari bwatangiye kuzamuka ku kigero cyo hejuru aho mu minsi 14 hari hamaze kwandura abarenga 700.

Mu zindi ngamba zafashwe harimo ko amasaha y’ingendo yavuye saa Yine z’ijoro agashyirwa saa Tatu mu minsi ya mbere gato ya Noheli, mu gihe mu bihe by’iminsi mikuru bwo zizaba zibujijwe guhera saa Mbili z’umugoroba kugera saa Kumi z’igitondo.

By’umwihariko izi ngamba nshya zigamije no kurushaho gufasaha abanyarwanda gukomeza kwirinda iki cyorezo mu minsi mikuru isoza umwaka.

Minisitiri w’Ubutegetsi w’Igihugu, Prof Shyaka Anastase, yasabye abantu gusubika imihango y'ubukwe bakazayisubukura icyorezo cyatanze agahenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .