Abapigana barangije gutanga ibiciro, Hoteli Umubano iragurishwa mu kwezi n’igice

Yanditswe na Iradukunda Serge
Kuya 16 Nzeri 2020 saa 05:19
Yasuwe :
0 0

Ikigo cy’Igihugu cy’Iterambere, RDB, cyatangaje ko abahatanira kugura mu cyamura Hoteli Umubano barangije gutanga ibiciro, ndetse ko nta gihindutse yaba yamaze kugurishwa mu gihe cy’ukwezi n’igice.

Iyi hoteli yari isanzwe icungwa na leta binyuze mu Ikgega Agaciro, igiye kugurishwa mu cyamunara kubera gahunda ya guverinoma yo kwegurira ibigo bya Leta abikorera.

Muri kanama nibwo RDB yashyize hanze itangazo risaba abashoramari batandukanye kwitabira gupiganira iyi hoteli binyuze mu cyamunara.

Umukozi ushinzwe kwegurira ibigo bya Leta abikorera muri RDB, Alexis Matabaro yabwiye The Newtimes ko ubu gahunda yo gupigana yarangiye igisigaye ari ukureba ibiciro byatanzwe.

Yagize ati “Twafunze gahunda y’ipigana mu cyumweru gishize ku wa gatanu, igikurikiye ni ukugenzura ibiciro byatanzwe n’abapigana.”

Matabaro yakomeje avuga ko nibamara kugenzura ibiciro byatanzwe bazahitamo umushoramari ukwiye kwegukana iyi hoteli.

Ati “Birihutirwa kandi twizera ko byose nibigenda neza hoteli izagurishwa mu kwezi kumwe n’igice.”

Iyi gahunda yo kugenzura ibiciro byatanzwe n’abapigana yari iteganyijwe ku wa 16 Nzeri.

Umubano Hotel yubatswe ku bwa Col. Muammar Gaddafi, wayoboraga Libya. Nyuma y’Urupfu rwe, Leta ye yasezeranyije u Rwanda ko izakomeza kuyishoramo imari ariko ntiyabikora, hitabazwa inkiko kugeza igurishijwe. Yari mu maboko ya Sosiyete ya SOPROTEL, Leta y’u Rwanda iyifitemo imigabane ingana na 40% n’aho iya Libya ikagira 60%.

Mu 2014 nibwo yavuye mu maboko ya Libya nyuma y’aho SOPROTEL isheshwe n’urukiko, gusa hashize imyaka itatu yarabuze umuguzi, iza kugurwa na Madhvani Group mu 2017 inahindura izina yitwa Marasa Umubano Hotel. Madhvani icyo gihe yishyuye miliyoni zisaga 13 z’amadolari.

Amakuru yizewe agera kuri IGIHE ni uko mu byari byumvikanyweho ijya kugurwa icyo gihe harimo no kuyivugurura. Mu ntangiriro z’umwaka ushize yahagaritse ibikorwa ba nyirayo icyo gihe bavuga ko bagiye kuyivugurura ikaba hotel ijyanye n’igihe dore ko yubatswe kera.

Muri gahunda harimo ko umwaka wa 2019 uzarangira imirimo yo kuyivugurura yarangiye, gusa si ko byagenze. Na mbere y’uko itangira, habanje kubamo igisa n’ubwumvikane buke hagati y’ubuyobozi bwayo n’Umujyi wa Kigali, bwo bwashakaga ko kuyivugurura byakorwa ibikorwa byayo bidahagaze ariko umujyi wo ububwira ko bidashoboka.

Kunanirwa kubahiriza ibyari byumvikanyweho bijyanye no kuyivugurura nibyo byatumye mu mezi ashize yongera gusubira mu maboko ya guverinoma 100% nayo iyiha Ikigega Agaciro Development Fund gitangira kuyicunga.

Muri Mata umwaka ushize, Ubuyobozi bwa Marasa Holdings Ltd bwabwiye IGIHE ko buteganya gukoresha miliyoni $2.2, akabakaba miliyari 2 na miliyoni 253 Frw yo kuyivugurura ku ikubitiro ariko ko azagenda yiyongera.

Icyo gihe uwari ushinzwe kumenyekanisha ibikorwa byayo, Uwizeye Joël, yabwiye IGIHE ati “Hotel yaguzwe itanga serivisi ku buryo nta mwanya wabonetse wo gukubita inyundo ku gikuta ngo harebwe ko gikomeye. Ku wa 1 Mata 2017 nibwo Marasa Holdings Ltd yahawe hoteli, abatekinisiye basanga hari ibintu byashaje cyane.’’

Yakomeje agira ati “Imbogamizi twahuye na yo ni uko miliyoni $2.4 twari twateganyije ziyongereye ziba miliyoni $14.4. Ibyo tutabonaga n’amaso ubwo twaguraga hotel byageze mu bifatika birahinduka kandi birimo ascenseur n’ibindi by’ingenzi utahagarika. Byaradutunguye.”

Ubusanzwe ifite ibyumba bigera ku 100 harimo 14 byiyubashye, ibyumba bine by’inama, urwogero, ikibuga cya tennis ndetse n’ikindi gito gishobora gukinirwaho golf.

Mu kwezi kumwe n'igice hoteli Umubano iraba yamaze kugurishwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .