00:00:00 IGIHE NETWORK KN KINYARWANDA EN ENGLISH FR FRANCAIS

Abana banyu mubohereze mu Rwanda nk’abajya kwa nyirakuru-Bamporiki abwira ababa mu mahanga (Video)

Yanditswe na Twarabanye Venuste
Kuya 6 Ukwakira 2019 saa 10:29
Yasuwe :

Umuyobozi w’Itorero ry’Igihugu, Bamporiki Edouard, yashishikarije Abanyarwanda kurera abana babumvisha ko u Rwanda ari igihugu cy’igihangange mu Karere ruhereyemo, hashingiwe ku rurimi n’indangagaciro rwarazwe n’abakurambere.

Yabigarutseho mu kiganiro yahaye abitabiriye Rwanda Day yabereye mu Mujyi wa Bonn mu Budage ku wa 5 Ukwakira 2019.

Bamporiki yavuze ko abana b’u Rwanda bagendera ku byo batojwe n’abo bakomokaho.

Yagize ati “Nagira ngo mbabwire ko impamvu bavuga ngo umwana nta cyaha agira ni uko ibyo asanze abantu bakora nibyo akora. Abana dufite uyu munsi twishimira bafite imyaka 25 ntimubaririze nta handi byavuye, ni mu rugamba, ni mu cyuya Inkotanyi ziyushye kugira ngo u Rwanda rube ruriho.”

Yibukije ko umurage mwiza wa mbere ari igihugu, hanyuma abanyagihugu bakakibamo neza bimakaza indangagaciro zacyo.

Ati “Umuco w’abantu ni umurage bahabwa n’abakurambere babo, ariko igihugu nicyo cya mbere abantu baragwa. Hanyuma ba bantu bakaba abanyagihugu bakagira umuco w’icyo gihugu. Bakagira n’indangagaciro z’icyo gihugu.”

Bamporiki yagaragaje ko indangagaciro, ururimi n’umuco w’igihugu aribyo bigira u Rwanda igihangange mu Karere ruherereyemo.

Ati “U Rwanda rero ni igihugu cy’igihangange mu gace ruherereyemo ukirebeye mu rurimi twarazwe n’abakurambere n’indangagaciro abakurambere bacu badusigiye.”

Yongeyeho ati “Ndashaka kubereka uburemere burimo kugira ngo bano bana bacu turera tubakangurire kuba Abanyarwanda nibamara kwemera ko kuba Umunyarwanda ari ugukora no kuzagira umurage usiga tubafashe kubigisha ururimi n’indangagaciro zacu kuko bihishemo ubwenge utasanga mu ndimi z’ahandi.”

Bamporiki yavuze ko muri rusange Abanyarwanda, bakwiye kubanza kwigisha abana iby’iwabo nk’uburyo bwo gusasira ibyo bashaka kuzigira mu mahanga.

Ati “Ndabasaba ko twafasha abakiri bato tukabayobora ku iriba ry’abakurambere bacu ryafukuwe nabo rikaza gutabwa na politiki mbi yabayeho, ariko abayobozi bacu bakaritokora, rikaba iriba rizima, ntibavome ku mariba y’ahandi aho kuvoma ku iriba ry’iwabo.’’

Mu kiganiro cye yerekanye ko bidakwiye ko abana bafite imyaka umunani boherezwa mu bihugu by’i Burayi kuko baba bageze mu kigero bakeneye kuvoma ku iriba ry’iwabo, bakamenya kwa sekuru, kwa nyirakuru no mu bakurambere be.

Bamporiki yakomeje ati “Ndatanga inama rero nk’umutoza w’intore, byaba byiza dutangiye kujya dufata abana bacu igihe batangiye kugira amatsiko yo kumenya tukabohereza i Rwanda nk’ababohereza kwa nyirakuru.”

“Dufite urugerero, umwana nubona atangiye kugira amatsiko yo kumenya reka abanze amenye iby’iwabo azabone kumenya iby’ahandi. Ubwo ngubwo n’ababavanaga i Rwanda tubajyana muri Amerika badashobora no kwisobanura ubwo turabakebuye.”

Rwanda Day yabereye mu Budage yitabiriwe n’Abanyarwanda n’inshuti z’igihugu basaga 3500.

Rwanda Day ni igikorwa cyatangiye ku wa 4 Ukuboza 2010, icyo gihe cyabereye mu Bubiligi ku Mugabane w’u Burayi. Ni umunsi umaze kumenyerwa nk’uhuza Abanyarwanda bo mu gihugu, ababa mu mahanga n’inshuti z’u Rwanda, bagahuzwa n’intego imwe yo kuganira ku cyarushaho guteza imbere igihugu cyabo.

-  Indi nkuru wasoma: Ibihumbi by’Abanyarwanda bitabiriye Rwanda Day i Bonn- Uko ibirori byagenze (Amafoto na Video)

Perezida w’Itorero ry’Igihugu, Bamporiki Edouard, yasabye Abanyarwanda ababa hanze kohereza abana mu Rwanda nk'abasura kwa nyirakuru
World Conference Center yarimo Abanyarwanda n'inshuti zabo zirenga 3500. Mu butumwa bahawe na Bamporiki yabasabye kuzirikana umuco gakondo w'abakurambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .