Abagabye ibitero bya gerenade mu karere ka Musanze mu 2014 basubiye imbere y’urukiko

Yanditswe na Habimana James
Kuya 11 Kamena 2020 saa 12:10
Yasuwe :
0 0

Abantu icumi bari barakatiwe ibihano bitandukanye kubera ibitero bya gerenade bagabye i Musanze mu 2014 no mu 2013, bongeye kugaruka imbere y’ubutabera nyuma yo kujuririra ibihano bari barahawe.

Aba bantu bari mu itsinda ry’abantu 11 bakatiwe n’Urukiko Rukuru rwa Musanze mu 2015, nyuma yo guhamwa n’icyaha cyo kugira uruhare mu bitero byinshi byabereye muri aka Karere mu 2014 na 2013.

Muri uwo mwaka abitwa Habimana Sadiki, Jotham Nsengiyumva, Pasiteri Emmanuel Rukera, Uwihanganye Jean Marie Vianney n’abagore babiri Murekatete Agnes na Nyirahabimana Bellancille bakatiwe gufungwa burundu kuko urukiko rwabahamije kwica no gukomeretsa babigambiriye, gukorana n’umutwe w’iterabwoba wa FDLR, kugambanira igihugu no gushaka kugirira nabi ubutegetsi buriho.

Abandi batanu bakatiwe imyaka icumi kubera ubufatanyacyaha mu bikorwa by’iterabwoba.

Kimwe muri ibyo bitero cya gerenade cyabereye mu rugo rw’uwahoze ari meya w’akarere ka Musanze, Winifrida Mpembyemungu, cyahitanye ubuzima bw’umukobwa w’umwaka umwe n’igice, abandi babiri bagakomereka. Hari mu 2014.

Uyu mwana yitwaga Irumva Ganza Rita w’umwaka umwe n’igice, warerwaga na Meya Mpembyemungu.

Ikindi gitero cya gerenade cyabereye mu Mujyi wa Musanze muri uwo mwaka, nacyo cyakomerekeje abantu batandatu. Ikindi kiba mu 2013 aho umupolisi yarashwe ahita apfa.

Kuri uyu wa Gatatu tariki ya 10 Kamena, bamwe muri aba bitabye urukiko rw’ubujurire mu Mujyi wa Kigali, basaba ko bavanirwaho ibihano bahawe.

Mu iburanisha ryamaze amasaha agera kuri atanu, aba bantu bari kumwe n’abavoka babo bagaragaje ishingiro ry’ubujurire bwabo mu rukiko, bamwe bavuga ko Urukiko rwirengagije ko bemeye icyaha, bityo bakwiye guhabwa ibihano byoroheje.

Muri aba harimo Agnes Murekatete uri mu bakatiwe gufungwa burundu.

Ubushinjacyaha butangaza ko Murekatete yakiriye intwaro zirimo gerenade, pistolet n’amasasu byavuye muri FDLR, kandi ntabimenyeshe abayobozi.

Abandi bakatiwe nabo bagerageje gusobanura ko batari bagambiriye kugira uruhare muri ibyo bitero. Muri abo harimo uwitwa Eliavane Tuyishimire, wabwiye urukiko ko yajyaga muri FDLR, ariko yagiyeho kubera izindi mpamvu bitari inama.

Gusa umushinjacyaha yanyomoje ibyo aba bantu bavuga, agaragariza urukiko ko aba bantu bari babizi ko bagiye muri FDLR kandi bakomeje gukurikirana gahunda z’uyu mutwe ku butaka bw’u Rwanda.

Umushinjacyaha yavuze ko Tuyishimire yabwiye abashinzwe iperereza mbere ko yari mu bari bagize FDLR, umutwe urwanya u Rwanda.

Kuri uyu wa Gatatu, urukiko rwumvise gusa abaregwa barindwi, Abasigaye batatu bazumva tariki 7 Nyakanga uyu mwaka.

Abagabye ibitero mu karere ka Musanze bakatiwe ibihano birimo no gufungwa burundu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .