Muri iyi mibiri harimo uwa Mbuya Nehanda n’uwa Sekuru Kaguvi bayoboye urugamba rwo guharanira ubwigenge bwa Zimbabwe mu ntambara izwi nka Chimurenga ya Mbere hagati ya 1896 na 1897.

Aba Banya-Zimbabwe barishwe bacibwa imitwe ijyanwa mu Bwongereza nk’ikimenyetso cy’intsinzi.

Ibiganiro byo gutanga iyi mibiri byatangiye mu myaka 10 ishize. Mu 2015 Robert Mugabe wayoboye Zimbabwe yigeze kunenga u Bwongereza ku bwo kubika imitwe y’Abanya-Zimbabwe mu nzu ndangamateka yabwo, agaragaza ko ari urugero rwiza rw’ivangura rishingiye ku ruhu, ubugome n’igitugu iki gihugu cyo mu Burayi cyimitse.

Zimbabwe yatangaje ko inzu ndangamurage z’u Bwongereza zemeye kohereza imibiri y’intwari zayo ndetse ko bizakorwa vuba.

Imibiri y’abantu 11 ibitswe mu nzu ndangamurage y’i Londres mu gihe iy’abantu babiri iri muri Laboratwari ya Kaminuza ya Cambridge. Bivugwa ko hari n’indi ibitswe mu Busuwisi.

Umunyamabanga Uhoraho muri Minisiteri y’Umutekano n’Umurage muri Zimbabwe, Raphael Faranisi, yagize ati “Twatangiye icyiciro cya mbere cy’iki gikorwa. Twizeye ko bizakorwa mu gihe kitarambiranye.”

Faranisi yagaragaje ko ubu bari guteganya kubaka inzu yabugenewe izifashishwa mu kubika iyi mibiri.