Ni ibikorwa byakozwe ku wa 29 Ugushyingo 2025, hagamijwe gushyigikira ibikorwa byo gukomeza imikoranire myiza hagati y’Inzego z’umutekano n’abaturage.

Ibikoresho by’imikino byatanzwe birimo imipira yo gukina, imyenda, inkweto n’ibindi bikoresho bitandukanye bifasha urubyiruko mu mikino.

Nyuma habaye umupira w’amaguru wahuje amakipe y’urubyiruko rwo mu midugudu ya Josina Machel na Philippe Nyusi, mu rwego rwo gushimangira ubufatanye n’ubusabane. Umukino warangiye amakipe anganyije 1-1.

Iki gikorwa cyitabiriwe n’Umunyamabanga w’Ishyaka FRELIMO mu Karere ka Mocímboa da Praia.

Kuva muri Nyakanga 2021, inzego z’umutekano z’u Rwanda n’iza Mozambique zifatanya mu kurwanya ibikorwa by’iterabwoba mu ntara ya Cabo Delgado yari yarahungabanyijwe bikomeye n’umutwe wa Ansar al Sunnah.

Kuva inzego z’umutekano zatangira gukorera muri Cabo Delgado, zirukanye ibyihebe, zibikura mu birindiro bihoraho byari byarashinze mu turere dutandukanye, bihungira mu mashyamba na ho zirabihasanga, zirabitsinsura.

Nyuma yo gutsinsura ibi byihebe, abaturage bari barahunze basubiye mu ngo zabo, ibikorwaremezo birimo umuriro w’amashanyarazi birongera birakora.

Muri Kanama 2025 na bwo Guverinoma y’u Rwanda n’iya Mozambique zavuguruye amasezerano y’ubufatanye mu ishoramari no kurwanya iterabwoba.