Kenya: Abakozi ba Perezidansi bahinduriwe ibiro abandi basabwa gukorera mu rugo kubera COVID-19

Yanditswe na Iradukunda Serge
Kuya 28 Kamena 2020 saa 11:10
Yasuwe :
0 0

Mu rwego rwo kwirinda COVID-19, bamwe mu bakozi b’Ibiro bya Perezida wa Kenya bamaze kwimurirwa ahandi bazajya bakorera, abandi biganjemo abakuze basabwa gukorera mu rugo, nk’uburyo bwabafasha kugabanya ubucucike.

Iki cyemezo kije nyuma y’uko ku wa 15 Kamena, mu itangazo Perezidansi ya Kenya yari yashyize hanze yari yemeje ko abantu bane bakorera mu biro by’Umukuru w’Igihugu banduye icyorezo cya Coronavirus.

Uretse abakozi ba Perezidansi Daily Nation ivuga ko na Perezida Uhuru Kenyatta kuri ubu wamaze kuvuga ko yipimishije agasanga ari muzima, aza muri ibi biro igihe biri ngombwa ubundi agakorera mu rugo rwe.

Umuvugizi wa Perezida Kenyatta, Kanze Dena, avuga kuri izi mpinduka yagize ati “ingendo zijya n’iziva mu biro bya Perezida zaragabanyijwe, dufite abakozi bakorera mu rugo abandi bagakorera mu biro bya guverinoma bitandukanye.”

Bamwe mu bakozi b’ibiro bya Perezida wa Kenya bimuriwe mu zindi nzu za leta zirimo iyitwa ‘NHIF’ n’iyitwa ‘NSSF’ mu gihe abari hejuru y’imyaka 58 bo basabwe kujya bakorera mu rugo.

Amakuru aturuka muri Kenya avuga ko ubu inama zose za guverinoma Perezida Kenyatta asigaye aziyobora hifashishijwe ikoranabuhanga rya Skype, akaba asohoka gusa igihe agiye kubonana n’inzego z’iperereza kandi nabwo bigakorwa hubahirijwe amabwiriza yo kwirinda COVID-19.

Perezidansi ya kenya ivuga ko abakozi bayo baherutse kwandura COVID-19 ubu bari koroherwa n’ubwo bataramara gusezererwa n’ubuyobozi bw’ibitaro barwariyemo

Umubare w’’abamaze kwandura COVID-19 muri Kenya umaze kurenga 5000, abamaze kuyikira bo bagera ku 1936, mu gihe abo imaze kwica bo ari 141.

Perezidansi ya Kenya yasabye abakozi bayo gukorera mu rugo mu rwego rwo kwirinda covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .