Ibiganiro bya Gen Muhoozi na Akamanzi byabaye ku wa Gatatu tariki 4 Werurwe 2026. Ni ibiganiro kandi byitabiriwe na Nicholas Mutebi ushinzwe ubufatanye mu karere n’ibijyanye n’abaterankunga muri NBA Africa ndetse na Andrew Mwenda, umunyamakuru w’inshuti ya Gen Muhoozi.

Ibiganiro by’aba bayobozi bombi byibanze ku kurebera hamwe uburyo bwo guteza imbere Basketball muri Uganda ndetse ikajya ku rwego rw’ababigize umwuga.

Clare Akamanzi yagaragarije Gen Muhoozi gahunda zitandukanye NBA Africa ifite ku mugabane wa Afurika, zirimo n’ijyanye no gukorana na Guverinoma za Afurika n’abikorera mu kubaka ubukungu bushingiye ku mukino wa Basketball.

Yagaragaje ko NBA Africa yiteguye gukorana na Guverinoma ya Uganda binyuze muri Minisiteri ya Siporo n’Uburezi, bagatangiza irushanwa ry’abato muri Basketball rizwi nka ‘NBA Junior League’. Ibi ngo bizafasha kuzamura impano z’abiga mu mashuri yisumbuye, kugeza batangiye gukina muri shampiyona y’ababigize umwuga.

Gen Muhoozi na Akamanzi baganiriye kandi ku kuba Uganda yagira ibikorwaremezo bishamikiye ku mukino wa Basketball ku buryo byateza imbere ubukungu.

Uruzinduko rwa Clare Akamanzi muri Uganda ruje mu gihe iki gihugu gikomeje gushyira imbaraga mu kubaka ibikorwaremezo bya siporo birimo Stade ya Hoima iherutse kuzura, ndetse hakaba hari n’umushinga wo kuvugurura ikibuga cya Basketball giherereye i Lugogo. Ni imishinga bivugwa ko iri kugirwamo uruhare rukomeye na Gen Muhoozi.