Ibi birori byabereye muri Gymnase y’Akarere ka Gisagara ku wa Gatandatu nyuma y’Umuganda Rusange wo ku rwego rw’igihugu wabereye muri aka Karere.

Abakinnyi 15 barimo Niyonkuru Gloire nka Kapiteni na Adamou Doudou Djibril uzaba umwungirije, ni bo berekanywe n’Umuyobozi w'Ikipe ya Gisagara Volleyball Club, Tonci Tadić.

Abandi ni Ngaboyintwari Cédric, Mugabo Thierry, Mukerangabo Hahirwa Yvan, Ngoboka Blaise, Mucyo Eintore Luxin, Malinga Kathbart, Rukundo Willy, Nziriyo Mandela, Ishimwe Ernest, Allan Ejeit Olokotum, Dushimurukundo Pacifique, Ntirushwa Steven na Isingizwe Sibo Servet.

Herekanwe kandi Umutoza Mukuru ari we Yakan Guma Lawrence, uwungirije Ndahiro Joseph ndetse n'umuganga Mukiza Noël.

Nyuma yo kwerekana abakinnyi hakinwe umukino wa gicuti hagati ya Gisagara VC na Police VC, wakinwe amaseti abiri gusa nk’uko byumvikanweho, buri kipe itsinda iseti imwe.

Gisagara VC yatsinze iseti ya mbere ku manota 25 kuri 22 ya Police VC naho iya kabiri yari ikomeye irangira Police VC iyitsinze amanota 36 kuri 34 ya Gisagara VC.

Nyuma y’umukino ni bwo abahanzi barimo Ariel Wayz, Bulldogg na Riderman bataramiye abari muri Gymnase ya Gisagara mu ndirimbo zabo zitandukanye. Hari kandi n’itsinda ry’ababyinnyi riyobowe na Titi Brown.

Shampiyona y’Icyiciro cya Mbere muri Volleyball ya 2024/25, izatangira ku wa 18 Ukwakira 2024.