00:00:00 IGIHE NETWORK KN KINYARWANDA EN ENGLISH FR FRANCAIS

Ahandi ibihangano bigira ubwishingizi, byarwara bikavurwa

Yanditswe na Mutangana Steven
Kuya 3 June 2024 saa 10:36
Yasuwe :

Ubwanditsi: Ibikubiye muri iyi nyandiko, ni ibitekerezo bwite by’umusomyi wa IGIHE, Mutangana Steven.

Mu bihugu bikiri mu nzira y’Amajyambere, hari aho usanga ibijyanye n’ubwishingizi bigarukira ku buzima bw’abantu, ibinyabiziga, inzu n’ibijyanye n’ubuhinzi n’ubworozi. Mu bihugu biteye imbere, hari aho ubuhanzi butezwa imbere ku buryo igihangano kigira ubwishingizi, kikabungabungwa mu rwego rw’ibigize umurage ndangamuco w’igihugu.

Ku rundi ruhande, hari aho usanga guteza imbere ubuhanzi mu bihugu bimwe na bimwe bikiri mu gutegura ibitaramo by’abaririmba n’ababyina no gutumira abahanzi mu birori bakishyurwa. Ariko hari aho iryo terambere ryarenze ibyo, rishyira igihangano n’umuhanzi mu mateka n’umurage.

Igihangano kijya mu ngoro ndangamurage, mu ibungabungwa ndengamipaka, mu bumenyi bwigishwa muri kaminuza, mu bikorwa by’abanyamategeko n’ibindi. Byose simbirondora aha. Ndibanda gusa ku bijyanye n’ubwishingizi ndetse n’icyo wakwita ubuvuzi bw’ibihangano mberajisho.

Tuzagira ryari abanyamategeko b’inzobere mu by’ubuhanzi ?

Iyo igihangano gihanzwe kikajya mu imurika cyangwa kikagurwa, kigira gikurikirana ku buzima bwacyo. Agaciro kacyo kagenwa n’inzobere zibifitiye ububasha. Ugitunze aragishinganisha, akaba yahabwa indishyi igihe cyangijwe, hakurikijwe amasezerano aba yaragiranye na sosiyete y’ubwishingizi.

Mu byishingirwa ku bihangano hari nk’ibyago bituruka ku nkongi y’umuriro, ubujura, kwangizwa n’abagizi ba nabi, amazi yo mu nzu, ibiza n’ibindi.

Kugira ngo igihangano cyishingirwe, hari amategeko n’amabwiriza yubahirizwa ku muntu ugitunze no kuri sosiyete y’ubwishingizi. Iyo ibibazo bivutse, hari ibijyanwa mu nkiko, bigakurikiranwa n’abanyamategeko bazobereye ibyerekeye icyo cyiciro.

Ni ukuvuga ko ibi bintu byigwa muri kaminuza, abahanzi bakabiminuza ariko n’igihugu kikagira abanyamategeko bihariye mu byerekeye ibihangano.

Hari abo mperutse guhura nabo mu bushakashatsi i Burayi, bansobanurira imanza bagiye bakurikirana mu byerekeye ibihangano, ndatangara. Nicyo bakora cyonyine.

Hari aho usanga igihangano cyarambukiranyije ibinyejana, kikaramba kuko hari ingamba ziba zarashyizweho nazo zo mu gihe kirambye mu guteza imbere igihangano n’umuhanzi. Muri izo ngamba hari izijyanye n’amategeko yo kubungabunga ibihangano, isoko ry’ibihangano, kwita ku buzima bw’igihangano, ubushakashatsi, umurimo, ubukungu n’ibindi.

Igihangano kiravurwa

Kugira ngo igihangano kirambe rero, gikurikiranwa mu buryo wagereranya nk’uko ubuzima bw’umuntu bukurikiranwa. Si ubonetse wese ubijyamo. Ni inzobere muri ibyo bintu. Birigwa, kandi si ngombwa ko umuhanzi aba ari we ubikurikirana.

Umuhanzi arahanga, abandi bagakora imirimo ijyanye no kwita ku gihangano. Mperutse muri laboratwari ishinzwe ubushakashatsi ku bimenyetso ndangamurage (Laboratoire de Recherche des Monuments Historiques) i Burayi, nsanga iki cyiciro cy’ibihangano cyitaweho. Ni ikigo gishamikiye kuri minisiteri y’umuco mu Bufaransa.

Inzobere zihakora ni abaminuje ibyerekeye ubugenge, ubutabire, ibinyabuzima, ubumenyi ku bikoresho byifashishwa mu buhanzi, ubwubatsi n’ibindi, kandi bakamenya umuco w’igihugu cyabo.

Muri iki kigo kimaze imyaka irenga 50, hasuzumwa ibimenyetso ndangamurage birimo n’ibihangano, ibyerekeye ubuzima bwabyo, ubwoko bw’ibibyangiza, hagakorwa ubushakashatsi bwa gihanga, hagatangwa inama ku cyakorwa mu gusana no gusubiranya ibiba byangiritse, byose bigakorwa hifashishijwe ibikoresho byabugenewe muri iyo laboratwari ikwereka n’imiti yabugenewe.

Mu ishyinguranyandiko yaho, hari inyandiko zifite agaciro k’amateka y’ibimaze kuhakorerwa byerekeye buri gace ko muri icyo gihugu.

Guteza imbere ubuhanzi, bisaba byinshi n’ibi birimo…

Mutangana Steven ubwo yari muri laboratwari ishinzwe ubushakashatsi ku bimenyetso ndangamurage
Mu bihugu byateye imbere haba inzobere zihariya zishinzwe kwita ku bihangano

Mutangana Steven

Umusomyi wa IGIHE.COM


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .