Kuki u Rwanda rukeneye Politiki igenga ibitabo?

Yanditswe na Hategekimana Richard
Kuya 11 Nzeri 2020 saa 08:08
Yasuwe :
0 0

Kunoza ibikorwa by’abanyamwuga runaka, iteka bigira imirongo bigenderaho ishyizweho n’urwego rubifitiye ububasha. Iyo mirongo ngenderwaho twayita Poltiki ngenderwaho igenga ‘Ibitabo ‘Book Policy’.

Ibihugu byateye imbere byifashisha ibitabo mu gufata ibyemezo runaka bifite ingaruka nziza ku baturage babyo. Ibi bisobanuye ko iyo igitabo cyanditswe neza cyubaka igihugu ariko iyo cyanditswe nabi gisenya igihugu, kiyobya abantu, cyica ejo hazaza.

Urugaga rw’Abanditsi mu Rwanda (Rwanda Writers Federation) mu nama y’Inteko rusange yayo, abanditsi bifuje ko hajyaho ’Book Policy" kugira ngo bice akajagari n’imyandikire idasobanutse y’ibitabo bityo bifashe abanditsi kwandika ibitabo bibereye u Rwanda, bafite umurongo bagenderaho.

Rimwe na rimwe mu bitangazamakuru hajya hagaragara ibitabo byasohotse abasomyi bafiteho ibibazo cyane cyane iy’imyandikire yabyo n’imiterere yabyo ko biyobya abasomyi. Hagiyeho uwo murongo ugenga ibitabo, byafasha abanditsi kujya bitonda bakabanza kunononsora ibitabo byabo mbere y’uko bisohoka, ku buryo binogera abasomyi ndetse bikaba byanateza imbere ababyandika kuko uko bisohotse binoze, niko n’ababigura bishimira amakuru n’ubuhanga byandikanywe.

Abanditsi b’u Rwanda biyemeje kuba umusemburo w’impinduka nziza mu guteza imbere umuco wo kwandika no gusoma mu iterambere ry’u Rwanda bimakaza indangagaciro na kirazira mu myandikire yabo.

Iyo utanditse amateka aribagirana bikagira ingaruka kubazavuka ejo. Dukomeze kandi gukunda gusoma ibitabo kuko iyo usoma urunguka, utera imbere, urwanya umwanzi w’ubujiji. Ni byiza ko nk’Abanyafurika biyemeje kwihesha agaciro no kugahesha Afurika dukomeza kwibohora imigozi twaziritswe n’abakoroni.

Amasomero yacu (Libraries) ntakaburemo ibitabo by’abanyarwanda kuko birimo indangagaciro na kirazira zo musingi wo kubaka u Rwanda twifuza.

Uwo murongo rero (Book Policy) uramutse ugiyeho byazatuma uruganda rw’Igitabo rutera imbere, rurushaho kugira agaciro, kunoza imikoro n’imyandikire ndetse no kugira uruhare mu kubaka ubukungu bwacu.

Muri gahunda ya guverinoma y’imyaka irindwi (NST1-National Strategies for Transformation), mu cyiciro cy’ubukungu bigaragara ko igihugu kizagera ku bukungu bwifuzwa hashingiwe ku bumenyi bw’abagituye. Ubumenyi rero buva mu gusoma ibitabo ariko bifite ubuziranenge.

HATEGEKIMANA Richard,
Perezida w’Urugaga rw’Abanditsi mu Rwanda,
E-mail: [email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .