Umurage urubyiruko rukwiye kuvoma kuri Gihanga Ngomijana wahanze u Rwanda

Yanditswe na Akayezu Jean de Dieu
Kuya 6 Gashyantare 2021 saa 10:23
Yasuwe :
0 0

Umunyamabanga wa Leta muri Minisiteri y’Urubyiruko n’Umuco, Bamporiki Edouard, yavuze ko Gihanga Ngomijana yasigiye abanyarwanda umurage wo kubaka u Rwanda, kururwanirira no kurwagura kandi bikagirwamo uruhare n’ingeri zose.

Ni ubutumwa yageneye abitabiriye Uruhererekane rw’Ibiganiro by’Umuco n’Amateka byiswe "Amateka Series" bitegurwa n’Urubyiruko ruba mu bihugu bya Australie na Nouvelle-Zélande. Iyi gahunda igamije gufasha urubyiruko ruba mu mahanga kumenya Umuco n’Amateka by’u Rwanda.

Abitabiriye iki kiganiro cyabaye mu buryo bw’ikoranabuhanga, baganirijwe ku nkomoko y’u Rwanda rwahanzwe na Gihanga, ubutwari bwaranze Abanyarwanda ba mbere y’Ubukoloni ndetse n’uruhare rw’abagore n’urubyiruko mu gukomeza gusigasira uwo murage.

Abatanze ibiganiro barimo Minisitiri Bamporiki Edouard, Umuhanzi Mukankuranga Marie Jeanne [Mariya Yohana] n’Umunyarwanda uba mu Mujyi wa Perth muri Australie, Niyonzima Jean Paul. Umuhanzi Icyoyitungiye Jules Bonheur [Jules Sentore] niwe wasusurukije abari bakurikiye ikiganiro.

Minisitiri Bamporiki yabwiye uru rubyiruko ko Gihanga atekereza umushinga wo kubaka u Rwanda, yasize intekerezo zihamye zishobora kuyobora abazabaho nyuma kandi zanafasha abariho uyu munsi.

Ati “Gihanga yatumye tugira igihugu ariko aravuga ngo kugira igihugu ni ukumva ko ukirwanirira, ukavuga ngo nzagikorera iki, nzakimarira iki, nzagisigamo iki, ko ngisanzemo umurage njyewe nzasiga ndaze abandi iki? Ugasigara wumva ko ikitwa inyungu z’igihugu, ziruta kure inyungu z’undi muntu.”

Minisitiri Bamporiki yavuze ko umuntu urutisha inyungu ze iz’igihugu aba ari kure cyane y’umurage wa Gihanga, aba ahemukira abakurambere n’Intwari z’u Rwanda kuko zo zari zizi ko nta cyaruta u Rwanda.

Ati “Iyo ni impamba yaguherekeza aho uri dukura kuri Gihanga. Ariko yavuze n’ibintu bikomeye, yaravuze ngo ‘Uwubaka u Rwanda ntagegena yigeraho, arwubakana n’abato’. Ni nayo mpamvu igihugu cyacu cyahisemo guha inshingano abakiri bato kugira ngo abahari batagegena bigeraho bubaka u Rwanda.”

Yakomeje agira ati “Ni ikintu cyavuzwe na Gihanga, ni umurage tumwubahira uyu munsi. Kwigira no kwishakamo ibisubizo, kwihangira imirimo n’ubunyamwuga tubyikoreye, tubyishatsemo. Gihanga birimo no guhanga, uyu munsi ubwo twubaha Gihanga bidusigire n’intekerezo yo kuvuga ngo ndahanga iki?”

Ubumwe bw’abanyarwanda

Mbere y’umwaduko w’Abakoloni babibye amacakubiri n’ ivangura mu Banyarwanda babacamo ibice kugira ngo babategeke, Abaturarwanda bari bunze ubumwe nk’umurage basigiwe na Gihanga.

Umurage wa Gihanga wakomeje gukura mu Banyarwanda ndetse nk’uko amateka abigaragaza mu 1500, Abaryankuna banze guhemukira u Rwanda biyita abadahemuka banga kuruhemukira kugeza ku munota wa nyuma.

Minisitiri Bamporiki ati “Banze guhemukira u Rwanda, badusigira umurage w’ubudahemuka, umwana w’umunyarwanda, urubyiruko n’ubwo yaba ari mundiba y’Isi, iyo bigeze ku Rwanda agomba kurubera umudahemuka. Singahemuke, ntimugahemuke, mu ruhererekane dukomora kuri Gihanga byaduhaye Abadahemuka.”

Mu 1700, ku ngoma ya Cyilima II Rujugira, u Rwanda rwaratewe nabwo abantu bahagurukira rimwe biyita abataneshwa bararurwanira kandi batsinda ibihugu bine birimo u Burundi, Igisaka, Ndorwa n’u Bugesera. Icyo gihe nibwo Umwami Cyilima yahise avuga ngo ‘u Rwanda ruratera ntiruterwa’.

Minisitiri Bamporiki avuga ko nyuma y’abataneshwa haje Abakoloni banesha abanyarwanda, babahimbira amoko y’Abatwa, Abatutsi n’Abahutu ari nabyo byagejeje kuri Jenoside yakorewe Abatutsi mu 1994.
Ati “Abakoloni bo mu 1890 bishyira mu 1900, batangira kutureba bati ariko wowe waturutse aha, undi bati wowe waturutse aha. Barabivangavanga bica umurage, bica indangagaciro, bica igihugu bitugeza kuri Jenoside yakorewe Abatutsi.”

Akomeza avuga ko Inkotanyi zabohoye u Rwanda zabahaye umurage w’abadaheranwa zakomoye kuri Gihanga, ari nawo ukomeye urubyiruko rw’ubu rukwiye gusigasira.

Yakomeje agira ati “Umuntu yagutsinda ariko ntiyaguherana. Rero rubyiruko aho muri hose, ntihagire uheranwa n’ubusinzi, ubwomanzi ubwo aribwo bwose, mwishakemo imibereho, umunyarwanda arababara, aratsindwa arakubitika ariko ntaheranwa. Niko Inkotanyi zatwigishije.”

Umuhanzikazi Mariya Yohana yabwiye urubyiruko by’umwihariko abakobwa ko bakwiye gukurikiza umurage barazwe n’abakurambere babo barimo ba Ndabaga n’abandi bagiye bagaragaza ubutwari bwo gukorera u Rwanda.

Yagarutse ku ruhare abakobwa n’abagore bagize mu rugamba rwo kubohora igihugu no guhagarika Jenoside.

Ati “Abagore ntabwo bigeze bicara ku gushyira u Rwanda imbere, ari ibya cyera hari abagore bagize ishyaka, bagize agaciro kanini n’ubu twibuka, birashoboka ko ari nabo tureberaho. Bana bacu rubyiruko namwe turashaka kuzabavuga nk’uko tuvuga abo bagore ariko kandi mugomba kumenya ko u Rwanda mugomba kururirimba kandi niko gaciro kanyu.”

Gahunda ya ‘Amateka Series’, ni umushinga watangijwe mu Ukuboza 2020, ukubiyemo ubukangurambaga bwatangijwe n’urubyiruko ruba mu mahanga hagamijwe kwigisha bagenzi babo, yaba ababa hirya no hino mu mahanga ndetse n’abari mu Rwanda, ibijyanye n’amateka y’u Rwanda hamwe n’ubugeni mu ngeri zitandukanye.

Reba uko Jules Sentore yasusurukije abari bitabiriye iki kiganiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .