Inkomoko y’amazina y’uduce tumwe two muri Kigali nka Nyarugenge, Kacyiru n’utundi

Yanditswe na Twarabanye Venuste
Kuya 24 Mata 2020 saa 01:12
Yasuwe :
0 0

Ikigo cy’Ingoro z’Igihugu z’Umurage w’u Rwanda (INMR) cyatangaje ko amwe mu mazina yahawe uduce tumwe na tumwe two muri Kigali akoreshwa kugeza ubu, yagiye atangwa hashingiwe ku ihangwa ry’igihugu, ibikorwa by’iyubaka gihugu (Ubuhinzi, ubworozi, intambara), ibikorwa byahabereye bigasiga umugani.

Icyo kigo kivuga ko hari amazina yatanzwe hagendewe ku bwoko bw’igiti biri cyangwa byiganje ahantu runaka. Izina ”Nyarugenge” rituruka ku giti cyitwa Imigenge (Acacia hochii). Ariryo ubu ryitwa Akarere ka Nyarugenge.

Abahanga mu mateka bavuga ko hari ahandi nka ‘Kimironko’ hiswe hatyo hagendewe ku ishyamba ry’ibiti byitwa ‘Imironko’ ryatewe na Cyilima Rujugira, kugira ngo ajye aritemamo ibiti byo kuramvura imiheto yo guhangana n’amahanga adakunda u Rwanda. Kimihurura habaga ibyatsi bivura byitwa ‘imihurura’ n’ahandi.

Ikigo cy’Ingoro z’Igihugu z’Umurage w’u Rwanda (INMR) kivuga ko hari amazina yaturutse ku bantu bakomeye babaga ahantu runaka.

Nka “Kacyiru” bivugwa ko ryatanzwe hagendewe ku mugabo witwaga Cyiru; wari umutware na “Rwabutabura” ryatanzwe riturutse ku witwaga Rwabutabura wari utuye ahitwa iryo zina muri iki gihe, ubu ni mu Karere ka Nyarugenge.

Umushakashatsi ku muco n’amateka Nsanzabera Jean De Dieu avuga ko ‘Kacyiru (agasozi k’icyiru)’ byitiriwe agasozi katangiweho ‘Ibyiru’ byinshi, bikomotse ku manza zacirwaga Abanyabwanacyambwe banze kuyoboka ingoma ya Mukobanya, nyuma yo kuhigarurira ahasaga mu wa 1378 ubwo yicaga Nkuba ya Nyabakonjo umwami w’u Bwanacyambwe.

‘Gacuriro’ hiswe hatyo kubera uruganda rucura amacumu yo kwagura u Rwanda rwubatswe na Kigeli Mukobanya.

Andi mazina yatanzwe afatiwe ku bikorwa byo kubaka u Rwanda nk’ubworozi bw’inka. “Kicukiro” risobanuye umusozi amacukiro (ibirundo by’amase y’inka). Mu bihe byo hambere, Kicukiro izwi nka kamwe mu turere tw’umujyi wa Kigali kororerwagaho inka nyinshi. Niho hari hubatse ibiraro by’inka za Kigeli Mukobanya n’umuhungu we Mibambwe Sekarongoro Mutabazi.

Hari ahazwi nka ‘Kabusunzu’ hiswe hatyo kubera umupfumu w’umuhanga wari waraturutse i Karagwe witwa ‘Gasunzu’ nyuma aho atuye bahita ‘Kagasunzu’ nyuma umunyamakuru wo kuri Radiyo Rwanda yagiye gutara amakuru avugira kuri Radiyo ko ari ‘Kabusunzu’ rihama rityo.

Hazwi nk’i Nyamirambo hiswe hatyo biturutse ku mirambo myinshi yahabonetse ubwo abanyoro bateraga u Rwanda. Amateka nk’ayo aboneka mu nzu ndangamateka yitiriwe Richard Kandt (Kandt House Museum).

Mu busanzwe hari ahandi mu Rwanda hagiye hitwa amazina hagendewe ku bikorwa bitandukanye byagiye bihabera. Hari nko ku Kivumu cya Mpushi, ahacirwaga abarwaye ibinyoro, ku cya Semakamba habereye urubanza rwa Semakamba n’Umwami Kigeli Rwabugiri n’ahandi.

Kigali yagizwe umurwa mukuru w’u Rwanda bwa mbere ku bwa Kigeli Mukobanya ahasaga 1378. Umurwa mukuru w’Umwami wari mu Mudugudu wa Vugavuge mu Kagali ka Gasabo mu Murenge wa Rutunga h’ubu.

Ifoto igaragaza agace ka Mburabuturo hataraturwa
Uko Kimihurura yari imeze itaraturwa cyane
Aha ni mu Kiyovu mu Karere ka Nyarugenge, Kigali itaraba umurwa ukomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .