00:00:00 IGIHE NETWORK KN KINYARWANDA EN ENGLISH FR FRANCAIS

Guhamya indangagaciro na kirazira, zimwe mu nyungu zitezwe ku bana batsinze amarushanwa yo gusoma

Yanditswe na Rosine Ingabire
Kuya 28 Ugushyingo 2021 saa 08:23
Yasuwe :

Bamwe mu bana batsinze ku rwego rw’uturere amarushanwa yo gusoma ibitabo byanditse mu Kinyarwanda, bagaragaje ko byabunguye byinshi birimo kurushaho guha agaciro indangagaciro na kirazira by’Umuco Nyarwanda.

Amarushanwa yo gusoma no kwandika ibitabo ku rwego rw’Uturere mu Rwanda yabaye ku wa 24 Ugushyingo 2021. Abana 120 ni bo babashije gutsinda, bakazakomereza ku rwego rw’intara n’Umujyi wa Kigali tariki 3 Ukuboza 2021.

Ni amarushanwa yateguwe n’Urugaga rw’Abanditsi mu Rwanda ku bufatanye na Minisiteri y’Uburezi, Imbuto Foundation, Umuryango Pan African Movement Rwanda n’abandi.

Irere Hubert wiga kuri St Aloys i Rwamagana yavuze ko aya marushanwa ari ingirakamaro cyane kuko yatumye arushaho gukomera ku gihango afitanye n’u Rwanda n’ubuyobozi bwarwo.

Yavuze ko nyuma y’aya marushanwa, azakomeza gukomera ku muco mwiza wo gusoma no kwandika.

Isaro Sandrine wiga kuri Lycée Notre Dame de Citeaux mu karere ka Nyarugenge yavuze ko amarushanwa yamufashije kongera kuzirikana ko indangagaciro na Kirazira by’Umuco Nyarwanda ari Umusingi wo kubaka uyu munsi n’ejo hazaza h’u Rwanda.

Mutaganzwa Christopher wiga kuri APAER mu Karere ka Gasabo wabaye uwa mbere ku rwego rw’Akarere, yavuze ko kurushanwa gusoma ibitabo byanditswe mu rurimi rw’Ikinyarwanda byamufashije gusobanukirwa amateka y’u Rwanda.

Yongeyeho ko azakomeza kwimakaza indangagaciro na Kirazira mu kubaka u Rwanda rwiza.

Umuyobozi w’Urugaga rw’Abanditsi mu Rwanda, Hategekimana Richard, yashimiye imigendekere myiza y’amarushanwa, avuga ko bizeye ko bizaha imbaraga n’abandi bagashyira imbere umuco, ururimi n’indangagaciro Nyarwanda.

Ati “Amarushanwa yo gusoma no kwandika ibitabo cyane cyane hasomwa ibitabo byanditswe mu rurimi rw’Ikinyarwanda kandi byanditswe n’Abanyarwanda birimo indangagaciro na kirazira, ni Umusingi wo kubaka u Rwanda rwiza aho abenegihugu basobanukiwe icyerekezo cy’igihugu cyabo.”

Yashimiye cyane abanyeshuri bose bitabiriye amarushanwa, anashimira n’abayobozi ku nzego zose bagize uruhare ngo amarushanwa agende neza.

Hategekimana yatangaje ko abanyeshuri bose batsinze mu byiciro bahatanyemo bazagenerwa ibihembo bitewe n’urwego bahatanyemo.

Abanyeshuri batandukanye bitabiriye amarushanwa bagaragaje ko bungukiyemo byinshi
Hategekimana Richard uyobora Urugaga rw'Abanditsi yatangaje ko aya marushanwa bayitezeho gufasha urubyiruko kumenya byimbitse indangagaciro na kirazira by'Umuco Nyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .