Kwita izina, umugenzo ufite ibisobanuro mu murage w’Abanyarwanda

Yanditswe na Mutangana Steven
Kuya 20 Nzeri 2020 saa 09:38
Yasuwe :
0 0

Mu babyiruka ubu hari abatazi ibyo “Kwita izina”, “guterura umwana”, kurya ubunnyano” bisobanura. Hakaba abumva umuhango ubera mu Kinigi wo kwita izina ingagi ntibabihuze n’ibyakorwaga mu muryango w’Abanyarwanda. Nabyo biri mu murage, bifite ibisobanuro.

Muri iyi nyandiko ngufi, twifashishije ibyo twasomye mu bitabo by’Abanditsi b’Abahanga mu Rwanda nka Musenyeri Aloys Bigirumwami n’izindi.

Kwita izina ni umugenzo wakorerwaga umwana w’umuntu kuva cyera mu muryango w’Abanyarwanda, hari ababyeyi n’abaturanyi.

Musenyeri Bigirumwami Aloys, mu gitabo yise “Imihango, imigenzo n’imiziririzo mu Rwanda” yanditse mu 1964, yasobanuye uko kurya ubunnyano, kwita izina cyangwa guterura umwana byakorwaga. Ku byo kurya ubunnyano, asobanura ko abana babahaga ibyo kurya ku ntara. Ibishyimbo bacucumiyemo imboga, mu tubumbe twinshi. Amata y’inshyushyu n’ikivuguto nayo bakayabaha uko bangana.

Ngo kubyita ubunnyano, nuko babaga babumbabumbye utubumbe twinshi, tumeze nk’uko umwana annya impande zose! Abana bagataha iwabo ari uko umwana aneye.

Ku byo kwita izina cyangwa guterura umwana, muri iki gitabo cya Musenyeri Bigirumwami havuga ko iyo abana bamaraga gutaha, aribwo umugore yasasaga uburiri, akararana n’umugabo we ariko umwe akirinda undi. Igihe cyo mu museke, umugabo akabwira umugore we ngo ngaho duterure umwana (bagahuza urugwiro).

Icyo gihe umugabo yajyaga hanze, yagaruka umugore akamuha umwana, akamusimbiza agira ati “kura ujye ejuru, nkwise…” (akavuga izina amwise). Umugore nawe akita umwana agira ati “Nnya aha, nyara aha, nkwise…” (akavuga izina amuhaye).

Bigirumwami yanditse ko izina rihama umwana ari iryo yiswe na se. Izina kandi ryahabwaga umwana bitewe n’icyo ababyeyi bamwifuriza, igisobanuro cy’igihe barimo mu muryango cyangwa igihugu.

-  Ingagi zitwa izina rya Kinyarwanda

Kwita izina ingagi ni gahunda ifite isooko kuri uwo muco. Nk’uko ababyeyi basohoraga umwana bakamuha izina, bakifatanya n’abaturanyi mu byishimo by’umwana wavutse. Nk’uko umuco wabaye umusingi ukomeye mu gushaka ibisubizo birambye by’igihugu niko umuco w’u Rwanda ufasha mu kwamamaza ubukerarugendo.

Iyo ukurikiye amateka y’igikorwa cyo kwita ingagi amazina, usanga mbere ingagi zarahabwaga amazina kugira ngo byorohereze abashakashatsi kuzikurikirana no kumenya iyarwaye, ariko haza gushyirwaho uyu muhango wo kwita izina bya Kinyarwanda, aho ibirori byitabirwa n’abantu b’ingeri nyinshi, barimo abaturage, abayobozi n’abanyamahanga. Amazina ingagi zihabwa, aba afite igisobanuro, nk’uko n’ubusanzwe umuntu yitwa izina rifite igisobanuro.

Urugero, mu 2005, Perezida wa Repubulika y’u Rwanda, Paul Kagame yise umwana w’ingagi Byishimo. Naho Madamu Jeannette Kagame yita undi mwana w’ingagi Impano. Aba bana b’ingagi bombi bafite nyina umwe witwa Nyabitondore.

Izi ngagi zitabwaho cyane ngo zifite ibice by’umubiri bijya gusa n’iby’umuntu ku kigereranyo cya 98%, nko kuba zifite amenyo 32 nk’umuntu, nta murizo zigira, ngo zirananezerwa zikishimira kuba mu muryango. Mu muhango wo kuzita izina hasobanurwa imibereho yazo mu muryango.

-  Kwita izina byamenyekanishwa ku rwego mpuzamahanga mu by’umurage

Koko rero, umurage ndangamuco usobanurwa nk’umurage ufatika n’udafatika w’abaturage batuye ahantu cyangwa uw’umuntu ukomoka ku bisekuru ugahererekanywa uko ibisekuru bisimburana kandi ufite agaciro mu rwego rw’ubumenyi n’ubuhanga, amateka n’ibisigaratongo, imitekerereze, ubugeni n’iyobokamana n’ibindi bifitanye isano n’umuco. Iki gisobanuro tugisanga mu ngingo ya kabiri y’Itegeko No 28/2016 ryo ku wa 22/7/2016 rigena ibungabungwa ry’umurage ndangamuco n’ubumenyi Gakondo. Ingingo ya gatanu y’iryo tegeko igasobanura ko mu murage ndangamuco udafatika (intangible cultural heritage) harimo n’imigenzo.

Koïchiro Matsuura wigeze kuyobora Ishami ry’Umuryango w’Abibumbye ryita ku Bumenyi, Umuco n’Uburezi, UNESCO, mu 2002 (umwaka wari wahariwe umurage ndangamuco) yavuze ko gukunda umurage ndangamuco, kuwitaho nk’umutungo twarazwe n’abakurambere ari ikimenyetso cy’ubupfura.

Mu gitabo yanditse ku ihanamakuru rihesha agaciro umurage ndangamuco w’u Rwanda (La communication pour la valorisation du patrimoine culturel du Rwanda, Ed. Universitaires Européennes, 2014), Mutangana Boshya Steven yagaragaje ko Kwita Izina ari igikorwa kigenda gihabwa umwanya mu gusigasira ingagi, umugenzo mwiza uri mu murage ndangamuco udafatika.

Nk’igihugu cyashyize umukono ku masezerano mpuzamahanga ya UNESCO yo mu 2003 ajyanye no kubungabunga umurage ndangamuco udafatika, u Rwanda rwamenyekanisha uyu mugenzo mwiza wasigasiwe mu muryango, uko ibisekuru byagiye bisimburana, ukaba unifashishwa mu kurinda ubwoko bw’inyamaswa zisigaye hacye ku Isi ndetse no guteza imbere ubukerarugendo. Byakwigisha abandi uko guhuza umuco w’abantu no kwita ku bidukikije n’ingagi zo muri Pariki y’Ibirunga, biri mu biha agaciro ubukerarugendo mu Rwanda.

Horana Imana murage mwiza.

Mutangana Steven, Umusomyi wa IGIHE.COM


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .