Imibare mishya yerekanye ko abicwa na Sida bagabanutseho kimwe cya gatatu kuva mu 2010

Yanditswe na Iradukunda Serge
Kuya 16 Nyakanga 2019 saa 05:36
Yasuwe :
0 0

Ishami ry’Umuryango w’Abibumbye rishinzwe kurwanya Sida, UNAIDS, ryatangaje ko umubare w’abahitanwa n’iyi ndwara ugeze ku 770,000 mu mwaka, aho wagabanutse kuri 33% uhereye mu 2010, nubwo imbaraga zo guhangana na yo zacogoye kubera inkunga zishyirwa muri uru rugamba zagabanutseho hafi miliyari $1.

Raporo y’uyu muryango igaragaza ko abantu miliyoni 37.9 ku Isi yose babana n’agakoko gatera Sida, naho miliyoni 23.3 nibo bagerwaho n’imiti igabanya ubukana.

Igaragaza kandi urugendo rwakozwe mu kugabanya umubare w’abahitanwa n’iki cyorezo kuva cyamenyekana cyane ahagana mu 1990, aho mu 2018 bari 770,000 bavuye ku 800,000 mu 2017. Harimo kandi igabanyuka rya 30% uhereye mu 2010, kuko muri uwo mwaka abishwe na Sida bari millioni 1.2.

Nubwo mu myaka 10 ishize umubare w’abicwa n’icyorezo cya Sida ku mugabane w’Afurika wagabanutse muri rusange, mu bindi bice by’Isi ho warazamutse, aho mu Burayi bw’Iburasirazuba wazamutseho 5%, mu Burasirazuba bwo hagati no mu majyaruguru ya Afurika uzamukaho 9%.

Umuyobozi wa UNAIDS, Gunilla Carlsson, yavuze ko kugira ngo icyorezo cya Sida kirandurwe burundu hakenewe imbaraga za politiki ndetse no kwita ku bayirwaye.

Ati “Dukeneye ku buryo bwihutirwa imbaraga za politiki kugira ngo Sida icike, kurandura Sida birashoboka nitwita ku bantu aho kwita ku cyorezo kandi tugafata ingamba zishingiye ku burenganzira bw’ikiremwa muntu, twita ku bagizweho ingaruka n’agakoko gatera Sida.”

Iyi raporo igaragaza ko abakoresha ibiyobyabwenge, imfungwa, abakora umwuga w’uburaya, abatinganyi n’abatishimira ibitsina byabo aribo bagize umubare urenga kimwe cya kabiri cy’ubwandu bushya.

Mu Rwanda abafite virusi itera SIDA bari hagati y’ibihumbi 250 na 300 ariko abari mu rugaga rwabo basaga ibihumbi 120 baturuka mu mashyirahamwe arenga 912.

Abandura iki cyorezo bo bagabanutseho 50%, naho abanduye hejuru ya 80% bafata imiti igabanya ubukana mu gihe indwara z’ibyuririzi nazo zagabanutse ku gipimo kiri hejuru ya 80%.

UNAIDS yihaye intego ko nibura mu 2030 Sida itazaba ikibarwa nk’indwara ibangamiye Isi.

Imiti igabanya ubukana bwa virusi itera imaze gufasha benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza