Ibanga ryo kuramba ni ukwirinda gupfa - ukuri kuri mu magambo ya Bob Weighton

Yanditswe na Iradukunda Serge
Kuya 9 Kamena 2020 saa 10:27
Yasuwe :
0 0

Abantu benshi bakunze gutekereza ko inzira y’ubuzima bwa muntu ari ikintu avuka cyararangije guteganywa, nyamara abahanga bagaragaza ko umuntu afite ubushobozi bwo kugena ibizamubaho kugeza no ku kwirinda gupfa.

Ubwo Bob Weighton yavukaga, Edward VII yari umwami w’u Bwongereza, ndetse mu buzima bwe yiboneye n’amaso intambara zombi z’Isi, ba Minisitiri w’Intebe b’u Bwongereza 20, yabonye u Bwongereza bwinjira mu Umuryango w’Ubumwe bw’Ibihugu by’u Burayi, EU, anabubona buwusohokamo.

Ubwo yitabaga Imana ku wa 28 Gicurasi 2020, haburaga umunsi umwe ngo yizihize isabukuru y’imyaka 112.

Mu 2019 Weighton yabwiye The New York Times ko kuva yagera mu zabukuru, ikibazo yabajijwe cyane n’abantu batandukanye ari “ni irihe banga ryo kuramba?”

Weighton yavuze ko iki ari ikibazo kimugora cyane kugisubiza, ariko ukimubajije wese amusubiza ko niba ashaka kuramba, agomba kwirinda gupfa.

Wakwibaza impamvu abantu ba kera barambaraga kurusha uko ab’ubu baramba, ariko bishobora gutuma ubona iki gisubizo cya Weighton nk’igifite ishingiro.

Ese kwirinda gupfa birashoboka?

Mu 2014 CNN mu gashami kayo kandika ubushakashatsi mu bijyanye n’ubuzima, yanditse inkuru igaragaza ko kwirinda urupfu bishoboka, ariko igishoboka ari ukwirinda ko wapfa mbere y’uko igihe cyawe kigera.

Icyo gihe yagaragaje ko buri mwaka umubare w’abantu benshi bapfa bazize imfu zishobora kwirindwa.

Kuba umuntu yakwirinda gupfa ni ibintu n’abantu bo mu nzego z’ubuzima bemera, kuko muri gahunda z’Ishami ry’Umuryango w’Abibumbye ryita ku buzima, WHO harimo n’ivuga ko kuva mu 2010 kugeza mu 2025 bazaba bagabanyije umubare w’abantu bahitanwa n’imfu zakwirindwa ku kigero cya 25%. Ni ibintu bizarokora ubuzima bw’abantu miliyoni 37 mu gihe cy’imyaka 15.

Ingamba zagufasha kwirinda gupfa zikubiye mu byo ugomba gukora n’ibyo ugomba kwirinda gukora.

Kwirinda kunywa itabi

Imibare ya WHO yerekana ko ku Isi umubare w’abantu banywa itabi urenga miliyari 1.3, kandi ko mu barinywa bose ryica abangana na ½.

Buri mwaka itabi ryica abantu barenga miliyoni umunani, muri bo miliyoni 7 ni ababa barinyoye mu gihe abagera kuri miliyoni 1.2 bo bapfa bazize kugerwaho n’umwuka usohorwa n’abari kurinywa.

Kunywa itabi ubwabyo nta kibazo, ikibazo ni uko byongera ibyago byo kurwara indwara ziganisha ku rupfu zirimo kanseri y’umutwe, iy’ijosi, iy’umuhogo, iyo mukanwa, ururimi n’ishinya.

Uretse Kanseri, kunywa itabi byongera indwara z’ubuhumekero nazo zihitana umubare w’abatari bake ku Isi.

Uhereye aha birumvikana ko umuntu aramutse afashe umwanzuro wo kureka kunywa itabi, yaba ari muri ya nzira ya Weighton yo kwirinda gupfa.

Kwirinda kunywa inzoga zirengeje urugero

Mu gihe inzoga ifashwe mu rugero, ubushakashatsi bwagaragaje ko hari ingaruka nziza bigira mu mubiri, ariko mu gihe ibaye nyinshi iva ku kuba nziza ikaba uburozi.

Mu 2016 WHO yavuze ko umubare w’abahitanwa no kunywa inzoga nyinshi warengaga miliyoni 3 biganjemo abagabo.

Abazira inzoga binyura mu mpamvu nyinshi zirimo urugomo ruzikomokaho, impanuka n’uburwayi zitera burimo umuvuduko w’amaraso ndetse n’umwijima.

Hagendewe kuri ibi birumvikana ko uwirinze kunywa inzoga mu rugero rukabije aba yirinze gupfa.

Kwirinda kurya umunyu mwinshi

Ubushakashatsi bugaragaza ko uyu munsi abantu benshi bafite ibibazo by’ubuzima batewe no kurya umunyu mwinshi, yaba utetse cyangwa uwo bongera mu mafunguro.

Kurya umunyu mwinshi bishobora gutera uwawuriye ibibazo by’ubuzima birimo umuvuduko w’amaraso, indwara z’umutima na stroke.

Kwirinda umubyibuho ukabije

Ishami ry’umuryango w’abibumbye ryita kubuzima rivuga ko ku Isi umubare w’abantu bafite ikibazo cy’umubyibuho ukabije wikubye gatatu kuva mu 1975.

Uyu mubyibuho ukabije nturi mu bantu bakuru gusa nk’uko benshi babitekereza, ahubwo ni ikibazo kinagaragara no mu bakiri bato, kuko mu 2019 abana bari munsi y’imyaka itanu bafite ikibazo cy’umubyibuho ukabije bari miliyoni 38.2, biganje mu bihugu byateye imbere.

Uyu mubyibuho ukabije kenshi uba imbarutso yo kurwara indwara zirimo izibasira umutima, iz’imikaya ndetse na kanseri z’umwijima, ibere, impyiko na prostate, zose zihitana umubare w’abantu utari muto.

Kugira ngo umuntu arusheho kuramba kandi akwiye kujya nibura mu gihe gihoraho yipimisha indwara zitandura zirimo diyabete, umuvuduko w’amaraso, kandi akibuka gukora imyitozo ngorora mubiri, ari nako yirinda icyamutera ibibazo by’imitekerereze nko guhangayika, umujinya no kwiheba, akabaho ubuzima bwe yishimye.

Bob Weighton yemeje ko kugira ngo umuntu arambe agomba kwirinda icyamuzanira urupfu imburagihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .