Uwishema wiga muri Turikiya yifashishije intiti mu buvuzi mu bukangurambaga kuri Coronavirus

Yanditswe na IGIHE
Kuya 31 Gicurasi 2020 saa 11:58
Yasuwe :
0 0

Tariki ya 11 Werurwe 2020 nibwo Ishami ry’Umuryango w’Abibumbye ryita ku buzima, OMS, ryatangaje ko COVID-19 iterwa n’agakoko gashya ka Coronavirus, ari icyorezo cyibasiye Isi.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 6 175 290 bamaze kuyandura ku Isi yose, barimo 371 228 yahitanye na 2 744 546 bamaze kuyikira.

Mu gihe cy’umwaduko w’icyorezo nk’iki, amakuru y’ibihuha ariyongera ku buryo agendeweho ashobora gushyira ubuzima bwa benshi mu kaga.

Ibi bituma inzego z’ubuzima na za Guverinoma ziba maso mu gukangurira abaturage babyo kubona amakuru mpamo cyane ko nko kuri Coronavirus ari icyorezo kitarabonerwa umuti n’urukingo.

Mu gushyigikira itangwa ry’amakuru y’impamo ku batuye Isi, Uwishema Olivier, umunyeshuri w’Umunyarwanda wiga mu Ishami ry’Ubuvuzi rusange muri Turikiya yinjiye mu bukangurambaga bugamije gukemura icyuho cy’amakuru kuri COVID-19.

Muri uyu mushinga, Uwishema yashinze Oli Health Magazine itangaza amakuru yizewe ku buzima akusanywa bigizwemo uruhare n’abanyeshuri biga ubuvuzi, abaganga, abigisha ubuvuzi n’abandi bafite inararibonye ku makuru y’ubuzima ku ndwara zitandukanye.

Mu gihe COVID-19 yatangazwaga ko ari icyorezo ku Isi yose, Kaminuza Uwishema yigaho nayo yahise ifunga mu rwego rwo kwirinda ikwirakwizwa ryacyo.

Mu kiganiro yahaye IGIHE, yavuze kaminuza igifunga yatekereje icyo yakora mu rwego rwo gukemura ikibazo cy’amakuru atizewe n’ibihuha byavugwaga kuri COVID-19.

Yagize ati “Mu rwego rwo gukemura amakuru y’ibihuha ku kibazo cya COVID-19 no kumenya ko hakenewe amakuru ku gihe kandı yizewe ajyanye n’ubuvuzi bw’ibanze, nahise ntangiza umushinga w’ubukangurambaga kuri Coronavirus ku Isi hose ( Coronavirus Global Awareness Project) kugira ngo hatagira ucikanwa no kumenya amakuru nyayo kuri iki cyorezo.’’

Uwishema afatanyije n’abanyeshuri biga mu Ishami ry’Ubuvuzi muri Kaminuza ya Harvard, Oli Health Magazine yashinze ikora kandi igahindura amakuru ya COVID-19 mu ndimi zitandukanye kugira ngo abantu bose hatabayeho imbogamizi ku rurimi bavuga, babashe kuyabona.

Kugeza uyu munsi amakuru aboneka mu ndimi 25 harimo Icyongereza, Igiturikiya, Igifaransa, Ikinyarwanda, Igiswahili, Ikidage, Igiportugal, Icyesipagnol, Ikirusiya, Icyarabu, Igitaliyani, Igishinwa n’izindi. Ni igikorwa kandi kinakomeje.

Nyuma yo gutangiza ubu bukangurambaga, Uwishema yahise abona abanyeshuri baturutse impande zose z’Isi biga mu mashami y’ubuvuzi n’abaganga bashyigikira igitekerezo cye bahuza imbaraga binatuma amakuru batanga asakara henshi.

Yakomeje avuga ko “Hakorwa ubushakashatsi bwimbitse mu gutangaza amakuru yerekeye COVID-19 ku buryo n’umuturage utarigeze ukandagira mu ishuri cyangwa udafite ubumenyi buhagije muri siyansi abasha gusobanukirwa neza.’’

Buri muntu anyuze ku rubuga rwa Oli Health Magazine ashobora kubona amakuru cyangwa akareba amashusho asobanura COVID-19 no gufasha abagize ibibazo by’ubuzima bwo mu mutwe bitewe n’iki cyorezo kwiyitaho.

Mu butumwa bwe, Uwishema yasabye urubyiruko gukangukira guhanga udushya.

Ati “Ubutumwa naha urubyiruko bagenzi banjye ku Isi, ni ukuzirikana ko Coronavirus iri kuduha impano y’igihe. Reka rero tumenye neza uko tuyikoresha mu guhanga udushya kandi tunashyigikirana kugira ngo tubashe kugera kure hashoboka. Twese hamwe dushobora gukwirakwiza ibyiza n’imbaraga dukomeza kuba maso kugira ngo turwanye ikwirakwizwa rya Coronavirusi.”

Umushinga wa Uwishema Olivier uhuriweho n’abanyeshuri biga mu mashami y’ubuvuzi arimo irya Harvard n’abaganga barenga 150 ku Isi.

Uwishema Olivier, umunyeshuri w’Umunyarwanda wiga mu Ishami ry’Ubuvuzi rusange muri Turikiya yinjiye mu bukangurambaga bugamije gukemura icyuho cy’amakuru kuri COVID-19
Abanyeshuri biga ibijyanye n'Ubuvuzi muri Harvard na bamwe mu bagize itsinda rya Oli Health Magazine
Amakuru kuri Coronavirus anyuzwa kuri Oli Health Magazina ari mu ndimi 25 ndetse harategurwa no kuyashyira mu zindi
Oli Health Magazine yatangijwe hagamijwe gutanga amakuru y'ukuri ku cyorezo cya COVID-19 cyibasiye Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .