00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwahumurije abaturage ku bukana bwa Omicron

Yanditswe na Iradukunda Serge
Kuya 3 Mutarama 2022 saa 11:51
Yasuwe :

Ikigo cy’Igihugu cy’Ubuzima RBC cyatangaje ko amakuru y’ibanze agaragaza ko ubwoko bushya bwa Coronavirus buzwi nka Omicron bwandura vuba ariko butarembya, cyemeza ko kuba umubare munini w’Abanyarwanda umaze gukingirwa bitanga icyizere ko ntacyo buzabatwara.

Abanyarwanda bamaze iminsi bahangayikishijwe no kuba imibare y’abandura icyorezo cya COVID-19 yarongeye kuzamuka ahanini biturutse kuri ubu bwoko bushya bwa Omicron.

Ni ibintu bifite ishingiro cyane ko byamaze kugaragara ko ubu bwoko bushya bwandura cyane kurenza ubundi bwari busanzwe.

Mu kiganiro Ishusho y’Icyumweru cya RBA, Umuyobozi Ushinzwe Ibikorwa byo gukingira muri RBC, Dr Hassan Sibomana, yavuze ko Abanyarwanda badakwiye gukangwa cyane na Omicron.

Ati “Reka tureke gutinya cyane iyi Omicron kuko ntabwo irenze izindi zaje. Ikimaze kugaragara irandura cyane ariko ntabwo abantu bazahara, ntabwo ibarembya.”

Yakomeje avuga ko kuba Omicron itarembya abantu biterwa no kuba ifite ubukana budahambaye ndetse no kuba yarasanze abenshi mu baturage barakingiwe.

Ati “Kuba abantu bataremba na none ni igisubizo cy’urukingo. Harimo igisubizo cy’urukingo kuko tumaze gukingira umubare w’abantu utari muto ariko by’umwihariko abantu bamaze gukingirwa bari ahantu hahurira abantu benshi nka hano mu Mujyi wa Kigali.”

“Nk’uko mubizi muri Kigali tumaze gukingira abantu benshi cyane barenga 90% hanyuma n’utundi turere cyane cyane hitawe ku mijyi yunganira Kigali, nayo imaze kugira abantu benshi cyane bakingiwe ariko iyo urebye muri rusange uturere twose twitaweho.”

Dr Hassan Sibomana yavuze ko kimwe n’izindi ndwara zandura, COVID-19 na yo izarandurwa nk’uko byagenze ku zindi zibarizwa muri iki cyiciro zirimo n’iseru.

Ati “Impamvu mvuga ngo hari icyizere ni uko ibijyanye n’izi ndwara zandura ziba zatewe na virusi cyane cyane n’ubundi ntuba witeze ko icyorezo gihagarara umwaka umwe cyangwa ibiri. Biragoye ariko icyizere gihari na none ni uko byoroha kuba twarandura indwara zandura hagati y’umuntu n’undi, nk’iseru n’indwara yakunze kuzahaza abana ariko kubera inkingo yagiye ishira.”

Kugeza ubu mu Rwanda, abahawe dose ya mbere y’inkingo za COVID-19 ni 7.707.304 mu gihe abahawe ebyiri bagera ku 5.504.040. Abamaze guhabwa dose ya gatatu bo bagera ku 196.636.

Minisiteri y’Ubuzima kandi igaragaza ko ifite inkingo zihagije zizakoreshwa mu gutanga doze ya kabiri ku bahawe iya mbere ndetse n’iya gatatu yo gushimangira ku bayikeneye. Igaragaza kandi ko mu bihe bya vuba izagenda yakira izindi nkingo.

Mu gihe abatuye Isi bakomeje guhangana na COVID-19, abaturarwanda bagirwa inama yo kwambara neza agapfukamunwa, gukaraba intoki ndetse no kwirinda kujya ahantu hahurira abantu benshi.

Abanyarwanda bakangurirwa kwipimisha COVID-19 igihe hari ibimenyetso byayo biyumvamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .