Igisobanuro cy’imibare y’abantu 59 bagaragaye baranduye Coronavirus

Yanditswe na Umwali Zhuri
Kuya 23 Kamena 2020 saa 08:46
Yasuwe :
0 0

Ikigo cy’Igihugu cy’Ubuzima, RBC, cyatangaje ko imibare mishya y’ubwandu bwa Coronavirus ishingiye ku bantu bazwi inkomoko yabo ku buryo umuntu atavuga ko ari abanduye bigoranye kuba bakurikiranwa.

Kuri uyu wa Mbere nibwo bwa mbere kuva iki cyorezo cyagaragara mu Rwanda habonetse abarwayi benshi, aho bageze kuri 59. Muri bo i Kirehe habonetse 33, i Rusizi haboneka ubwandu bw’abandi 12, i Kigali baba barindwi, Nyamasheke ho baba bane mu gihe i Rubavu abanduye ari batatu.

Umuyobozi wa RBC, Dr Sabin Nsanzimana, yatangarije Radio Rwanda ko nubwo imibare iri hejuru, nk’iyi Kirehe ari iy’abantu n’ubundi baturuka hanze y’igihugu batwara amakamyo kimwe n’ababafasha.

Muri Rusizi ho abarwayi bagaragaye barimo Abanyarwanda batahutse bari bamaze iminsi bari mu kato nyuma baza kugaragara ko barwaye, abandi bari mu miryango yari yaragaragayemo iki cyorezo n’abandi bapimwe bo mu mirenge yari isanzwe iri Guma mu rugo.

I Nyamasheke ho abarwayi bane bose bari baturutse mu Karere ka Rusizi, bagezeyo barakurikiranwa bafatwa ibipimo basanga baranduye.

Mu Karere ka Rubavu ho batatu bagaragaye bari basanzwe batwara ibicuruzwa byambukiranya imipaka.

Ati “Muri Kigali twari twavuze abarwayi bagaragaye ku munsi wabanjirije uw’ejo ariko hagaragaye abandi bagera kuri barindwi. Abo rero, icyo bahuriyeho ni uko abo twari twabonye bwa mbere, ababashamikiyeho nabo twarabapimye dusanga ko banduje bagenzi babo, babanaga mu nzu, mu gipangu aho bari batuye.”

Dr Nsanzimana yavuze abamotari n’abagenzi bakwiye gukurikiza gahunda zashyizweho mu gukumira ikwirakwira rya Coronavirus, bimakaza umuco w’isuku ndetse banirinda gukorakoranaho, bakanibuka ko bakwiye kwishyurana hakoreshejwe ikoranabuhanga.

Ati “Igihe rero hagaragaye urwaye, biba ngombwa ko tumenya ngo ni nde wagenze kuri iyi moto, hari n’uburyo bwo kwishyurana hakoreshejwe ikoranabuhanga, burya nabwo burafasha kugira ngo na wa wundi waba warahuye n’uyu wagaragayeho uburwayi, abonwe avurwe.”

Dr Nsanzimana yakomeje avuga ko umunsi ku wundi u Rwanda rwunguka ubushobozi bwo gushakisha abarwayi, kuko iyo ushobora kubona umurwayi umwe, byoroha gukurikirana ukamenya abandi bahuye nabo.

Kuva muri Werurwe iki cyorezo cyagaragara mu Rwanda, abanduye ni 787 mu gihe abamaze gukira ari 370 naho abakirwaye ni 415 mu gihe babiri aribo bitabye Imana. Hamaze gufatwa ibipimo 113 544.

Umuyobozi Mukuru wa RBC, Dr Sabin Nsanzimana, yasabye abaturage gukomeza kubahiriza amabwiriza yashyizweho yo kurwanya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .