00:00:00 IGIHE NETWORK KN KINYARWANDA EN ENGLISH FR FRANCAIS

Amerika imaze gukoresha miliyari 28 Frw mu gufasha u Rwanda guhashya Covid-19

Yanditswe na IGIHE
Kuya 16 January 2022 saa 05:47
Yasuwe :

Leta Zunze Ubumwe za Amerika zahaye u Rwanda izindi nkingo zingana na 1,000,350, bituma umubare w’inkingo iki gihugu kimaze guha u Rwanda usaga miliyoni enye.

Byatumye agaciro k’inkunga iki gihugu kimaze guha u Rwanda mu guhangana na Covid-19 kagera kuri miliyari 28 Frw.

Izi nkingo zo mu bwoko bwa Pfizer zageze ku kibuga cy’indege cya Kigali kuwa Gatandatu tariki 15 Mutarama 2022.

Inkingo u Rwanda rwahawe ziri muri gahunda y’Umuryango Mpuzamahanga wita ku Buzima ugamije kugeza inkingo kuri bose uzwi nka COVAX.

Itangazo rigenewe abanyamakuru Ambasade ya Amerika mu Rwanda yashyize hanze, yatangaje ko icyo gihugu cyishimiye kugira uruhare mu gufasha u Rwanda gukingira 40 % by’abaturage bacyo mu 2021.

Kugeza inkingo 4,296,450 nizo Amerika imaze guha u Rwanda, bikaba biri muri gahunda ubutegetsi bwa Perezida Joe Biden bwihaye yo gusangira n’amahanga inkingo mu rwego rwo guhashya burundu Covid-19.

Izi nkingo zonyine zifite ubushobozi bwo gukingira 24 % by’Abanyarwanda bemerewe gufata urukingo, bagahabwa doze ebyiri.

Mu bindi Amerika yafashijemo u Rwanda harimo gutanga inzobere mu igenamigambi rigamije guhashya Covid-19, gutanga ibikoresho no gutoza abakozi mu mavuriro 351 mu gihugu no mu bitaro 25.

Amerika kandi yafashije u Rwanda kuvugurura ibitaro bitatu no kuhashyira ibigo bivura bikanita ku barwaye Covid-19. Mu bindi bikoresho byatanzwe harimo ibyongerera umwuka abarwayi barembye n’ibindi.

Ubu abarenga miliyoni 6 mu Rwanda bamaze gukingirwa byuzuye, abarenga ibihumbi 500 bafashe urukingo rushimangira mu gihe abarenga miliyoni 8 bo bamaze kubona urukingo rwa mbere.

Igihugu gifite intego ko miliyoni 9,1 bangana na 70% by’Abanyarwanda baba bamaze gukingirwa bitarenze Nyakanga 2022. Hari icyizere ko uwo mubare ushobora kugerwaho mbere.

Leta Zunze Ubumwe za Amerika zimaze gutanga inkingo miliyoni 373 mu bihugu 110 hirya no hino ku Isi.

Uretse muri ibi bihe bya COVID-19, Leta Zunze Ubumwe za Amerika zisanzwe ari umufatanyabikorwa ukomeye w’u Rwanda mu bikorwa bitandukanye by’iterambere, mu bucuruzi, ishoramari, igisirikare, ubuzima, ubuhinzi no kwihaza mu biribwa, uburezi, iterambere ry’urubyiruko, guteza imbere ubukungu, demokarasi, uburenganzira bwa muntu n’imiyoborere myiza.

Nko mu 2016, Leta Zunze Ubumwe za Amerika zahaye u Rwanda inkunga ya miliyoni 268$. Harimo miliyoni 56$ zakoreshejwe mu bikorwa byo kurwanya SIDA, miliyoni 41$ zari zigenewe ibikorwa by’ubutabazi na miliyoni 38$ zashyizwe mu bikorwa byo kurwanya amakimbirane, guharanira amahoro n’umutekano.

Hari na miliyoni 34$ zari zigenewe ibikorwa by’uburezi bw’ibanze na miliyoni 23$ zari zigenewe ibikorwa by’ubuvuzi bw’ibanze.

Kuva mu 2017 kandi binyuze mu Kigo cya Leta Zunze Ubumwe za Amerika gishinzwe iterambere Mpuzamahanga (USAID), hatanzwe miliyoni 105$, mu 2018 ayo mafaranga ariyongera agera kuri miliyoni 147$ naho mu 2019 aba miliyoni 135$. Mu 2020 inkunga z’iki gihugu zo zibanze cyane mu bikorwa byo kurwanya COVID-19.

Inkingo Amerika yahaye u Rwanda zageze i Kigali kuri uyu wa Gatandatu
Amerika imaze guha u Rwanda inkingo za Covid-19 zisaga miliyoni 4

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .