Alibaba yatangije urubuga rufasha abaganga gusangira ubumenyi kuri COVID-19

Yanditswe na IGIHE
Kuya 26 Werurwe 2020 saa 10:24
Yasuwe :
0 0

Ikigo gicuruza mu Ikoranabuhanga, Alibaba, cyashinzwe n’umuherwe ukomeye mu Bushinwa, Jack Ma, cyatangije urubuga rw’ikoranabuhanga, aho abaganga n’abaforomo bazajya basangira amakuru ku cyorezo cya COVID-19 cyugarije Isi.

Icyorezo cya COVID-19, ku isi yose abantu 460 000 bamaze kucyandura, mu gihe abarenga ibihumbi 20 bo bapfuye naho 110 000 bakaba barakize.

Jack Ma abinyujije kuri Twitter yanditse ati “Ubumenyi ni imbaraga! Twatangije urubuga rw’ikoranabuhanga, aho abaganga n’abaforomo ku Isi yose bazajya bunguranira ibitekerezo, amasomo n’uburyo bwo kurwanya Coronavirus. Duhaye ikaze ibitaro byose ngo byifatanye n’ibitaro byo mu Bushinwa kuri uru rubuga rufunguye”.

Ma watangaje ko uru rubuga rwiswe https://covid-19.alibabacloud.com ari umwanya wo guhuriza hamwe imbaraga z’Isi yose mu gukomeza kurwanya icyorezo cya COVID-19.

Uru rubuga rwatangijwe ngo rufashe mu bijyanye n’itumanaho n’imikoranire hagati y’abatuye Isi bakoresheje ikoranabuhanga. By’umwihariko abakora mu nzego z’ubuvuzi ku Isi, bazajya basangira uburyo bw’imikorere mu kurwanya COVID-19.

Uru rubuga rugizwe n’ibice bine birimo aho gusangira amakuru mu kurwanya icyorezo, aho abakozi bo mu rwego rw’ubuvuzi basangira ubunararibonye mu kwirinda no guhangana n’icyorezo, aho Abashinwa bari mu mahanga bisuzumishiriza ndetse n’aho bagaragaza ikoranabuhanga ryo kurwanya COVID-19.

Urugero ni nk’inynadiko y’ubunararibonye bw’inzobere z’ibitaro bya Kaminuza y’ubuvuzi ya Zhejiang yavuye abarwayi 104 ba Coronavirus mu minsi 50 bose bagakira ndetse ntihagire n’umuganga wandura.

Izi nzobere zerekana ingamba zo kwirinda no guhangana na COVID-19, uburyo bwo kuvura urembye ndetse n’uko abaforomo n’abaganga bitwara.

Inyandiko y’izi nzobere iri mu Gishinwa, Icyongereza, Igitaliyani, Igifaransa, Icyespanyole n’Ikiyapani. Mu minsi mike izashyirwa no mu Kidage, Igiperise n’izindi ndimi.

Jack Ma akomeje gufasha Isi guhangana n’icyorezo cya COVID-19. Aherutse kugenra ibihugu 10 byo ku mugabane wa Aziya ibikoresho byo guhangana n’iki cyorezo.

Byarimo udupfukamunwa miliyoni 1.8, ibikoresho byo gupima indwara ibihumbi 210, ibikoresho birinda abaganga bikanapfuka isura ibihumbi 36, biziyongeraho ibyuma bitanga ubuhehere n’ibipima ubushyuhe

Yageneye buri gihugu muri 54 bigize Umugabane wa Afurika, ibikoresho 20 000 bipima Coronavirus, bikazaba biherekejwe n’ibindi bifasha abaganga mu kazi kabo.

Jack Ma yanageneye Leta Zunze Ubumwe za Amerika ibikoresho 500 000 bipima Coronavirus hamwe n’udupfukamunwa miliyoni imwe twifashishwa mu kwita ku barwayi.

Alibaba yafunguye urubuga aho abaganga bashobora gusangira ubunararibonye kuri Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .