U Rwanda rufite inzobere 10 gusa zivura indwara zo mu mutwe

Yanditswe na Emma-Marie Umurerwa
Kuya 28 Gashyantare 2019 saa 06:03
Yasuwe :
0 0

Abaganga bavura indwara zo mu mutwe mu Rwanda baracyari mbarwa, abanyeshuri babyiga nabo umubare uracyari muto kabone nubwo Leta yabashyiriyeho amahirwe yo kwiga batishyura.

Indwara zo mu mutwe ni nyinshi, hari izishobora guhererekanwa zikava ku muntu umwe zikajya ku wundi. Icyakora kuri izi ndwara ntabwo wavuga ngo umuntu aba afite aho ababara, ahubwo bigaragarira mu mihindukirire y’imyitwarire, imigirire n’imikorere y’umuntu.

Agahinda ‘Depression’ gakabije nako burya kari mu cyiciro cy’indwara zo mu mutwe.

Inzobere mu kuvura indwara zo mu mutwe, akaba n’umuyobozi w’agashami gashinzwe ubuvuzi bwo mu mutwe, mu kigo cy’ubuzima (RBC) Dr Iyamuremye Jean Damascène, uvuga ko abaganga bavura indwara zo mu mutwe badahagije, ugereranyije n’umubare w’abarwayi.

Mu kiganiro yagiranye na IGIHE, yasobanuye ko indwara zo mu mutwe zirimo indwara zo mu mutwe [indwara z’ibitekerezo] n’indwara zo mu ntekerezo, bigasaba ubuhanga buhanitse mu kuzivumbura no kuzivura.

Mu Rwanda izi ndwara zigenda ziyongera mu byiciro by’abantu batandukanye bitewe na jenoside yakorewe Abatutsi, ikoreshwa ry’ibiyobyabwenge n’ibindi bitandukanye.

IGIHE: Ubu mu Rwanda hari abaganga bangahe bavura indwara zo mu mutwe?

Dr Iyamuremye: Abaganga b’inzobere mu kuvura indwara zo mu mutwe ntibahagije kuko abarwayi ni benshi.

Umwaka ushize twavuye abarwayi ibihumbi 23o, abaganga b’inzobere dufite ni 10 gusa. Hari abandi baganga b’inzobere 5 bari kwiga ku buryo mu myaka ibiri iri imbere tuzaba dufite 15.

Ariko nanone dukeneye kugira abaganga b’inzobere kuri buri gice cyo mu mutwe kuko uburwayi bwo mu mutwe buri mu byiciro bitandukanye.

Umubare w’abitabira kwiga kuvura indwara zo mu mutwe uracyari hasi, kabone nubwo Leta ibishyurira kwiga mu mahanga ku buntu. Ntabwo bitabira kuko iyo dufite buruse z’abantu batanu buri mwaka haza abantu babiri. Nta gihe na kimwe bari baza ari batanu nk’uko tuba tubifuza.

IGIHE: Mwatubwira impamvu abanyarwanda batitabira kwiga kuvura indwara zo mu mutwe?

Dr Iyamuremye: Abaganga bo mu bindi byiciro baravuga bati ngiye kwiga ndamutse ntakoreye Leta nshobora no kuzafungura ivuriro nkikorera, hanyuma iryo vuriro rikaba rishobora kunzanira amafaranga.

Si ko bimeze rero ku ndwara zo mu mutwe kuko usanga bene abo barwaye akenshi baba umuzigo kuri Leta no ku muryango, nta muntu ushobora guhaguruka iwe mu rugo avuga ko agiye kwivuza indwara yo mu mutwe.

Ni kimwe mu bica intege abashaka kwiga kuzivura kuko aba avuga ati ntakoreye Leta kuzabona amafaranga bishobora kuzaba ikibazo. Hari n’izindi mpamvu ziterwa n’imyumvire.

IGIHE: Mwatubwira ukuri ku bivugwa ko abaganga bavura indwara zo mu mutwe na bo bageraho bakarwara mu mutwe?

Dr Iyamuremye: Uretse ubungubu abantu bamaze kumenyera ko turi abaganga nk’abandi mbere ntabwo batwitaga abaganga batwitaga “Les aliénés” no mu Rwanda hari abaziko byanze bikunze umuganga uvura indwara zo mu mutwe nawe azarwara mu mutwe, azacanganyikirwa.

Iyo ukomeje guhanagura amarira y’umuntu, intoki zawe zigeraho zigatoha. Iyo utiyitayeho neza ushobora kugira imyitwarire itameze nk’iy’abandi.

Abantu biga kuvura indwara zo mu mutwe tubigisha ukuntu bagomba kwifata neza cyangwa kwiyitaho kugira ngo batazarwara. Ubushakashatsi butandukanye bwagaragaje ko benshi mu baganga biyahura ari abavura indwara zo mu mutwe.

Aho dutandukaniye n’abandi baganga twebwe ntidukora ku muntu gusa dukora no ku marangamutima ye, ukishyira mu kababaro k’umurwayi wawe, hari umuganga w’inzobere wavuze ko twebwe tuba ‘ikimoteri’ uzana ya myanda yawe yose ukayinsukamo, iyo ntabisutse mu kindi ‘kimoteri’ bishobora kundwaza.

Igihe muganga yumva yananiwe kwakira ububabare bw’abarwayi be, aba agomba kwegera mugenzi we bakaganira hanyuma ibyo akorera umurwayi na we bakabimukorera.

Dr Iyamuremye, yakomeje ashishikariza abaganga b’abanyarwanda kwitabira kwiga ku buryo bwisumbuye [kuzobera] mu kuvura indwara zo mu mutwe, kuko Leta y’u Rwanda yabashyiriyeho amahirwe yo kujya kubyiga mu mahanga by’umwihariko mu Bubiligi.

Dr Iyamuremye Jean Damascène, avuga ko abaganga bavura indwara zo mu mutwe badahagije ugereranyije n’umubare w’abarwayi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza