Ibitera kunuka mu kanwa n’uko amenyo yanduye yongera kugirwa umweru: Ikiganiro na Dr Mbusa

Yanditswe na Iradukunda Serge
Kuya 30 Kanama 2020 saa 03:56
Yasuwe :
0 0

Isuku yo mu kanwa ni ingenzi mu buzima bwa muntu kuko imufasha kwirinda indwara zitandukanye zirimo n’izishobora no gutera kunuka mu kanwa.

Mu kubungabunga iyi suku ni ngombwa ko amenyo yitabwaho ngo umuntu arindwe indwara zishobora guterwa n’isuku nke ishobora gutuma amenyo yandura.

Umuganga mu Bitaro bivura Amenyo bya Advanced Dental Centre, Dr Mbusa Philbert, yabwiye IGIHE ko kunuka mu kanwa biterwa n’impamvu zitandukanye ariko inyinshi zishingira mu kutahakorera isuku bihagije.

Yagize ati “Kugira ngo umuntu agire impumuro mbi mu kanwa biterwa n’ibintu byinshi bitandukanye; ibihagarariye ibindi twaheraho ni uko umuntu aba adakora isuku yo mu kanwa neza. Buriya abantu bazi ko gukora isuku neza ari ukoza amenyo n’uburoso n’umuti w’amenyo warangiza ugahita wigendera.”

Dr Mbusa avuga ko kugeza uyu munsi abantu bataramenya koza amenyo neza, ari nacyo gikeneye kunozwa.

Yakomeje ati “Abantu ntabwo baramenya igihe cy’ingenzi cyo koza amenyo ariko igihe ugiye kuryama ntiwoze amenyo uba uri gukora ubusa, koza nabi bishobora gutera impumuro mbi mu kanwa.”

Mu bindi bishobora gutuma umuntu agira impumuro mbi mu kanwa harimo indwara karande nka diabète n’iz’umutima no kuba imvubura z’amacandwe zivubura make bigatuma mu kanwa hahora humagaye microbes zikidagadura cyane bigatanga impumuro mbi.

Dr Mbusa avuga ko kugira ngo umuntu akire guhumura nabi mu kanwa agomba kubanza kwegera abaganga bakamufasha.

Ati “Yego birashoboka cyane ariko icya mbere ni ukubanza kumenya ibibigutera. Niba ufite icyo kibazo uyu munsi icyo ukeneye cya mbere ni ukubanza ukegera muganga akagufasha kumenya ikibazo ufite akaba aricyo kibanza gukemuka noneho cyamara gukemuka ugafata za ngamba ngo ujye wita ku isuku y’amenyo yawe.”

Iyo umuntu amaze kumenya ikimutera guhumura nabi mu kanwa akamara kuvurwa n’abaganga, uruhare ruba rusigaye ni urwe.

Agirwa inama yo kuzirikana ko adakwiye kumarana uburoso bwoza amenyo amezi arenze atatu, ndetse akibuka no gukoresha akadodo yoza hagati y’amenyo kuko uburoso butahagera.

Ikindi gikomeye ni ugukoresha akadodo kuko iyo uri koza amenyo imyanda iyavaho ikajya hagati yayo, ka kadodo niko gakura imyanda hagati y’amenyo, iyo myanda itavuyemo n’ubundi nubwo waba wogeje neza hari igihe ugira impumuro mbi mu kanwa.

Amenyo yahinduye ibara yasubira kuba umweru

Uretse kuvura indwara zo mu kanwa muri Advanced Dental Clinic Centre bafasha n’abantu bafite ikibazo cy’amenyo yahinduye ibara kongera kuyagira umweru.

Dr Mbusa avuga ko guhindura amenyo yanduye akongera gusubira kuba umweru bikunda ariko bidakorerwa buri wese bitewe n’ibibazo afite.

Ati “Turabanza tukagusuzuma tukareba tuti ese uyu muntu koko amenyo ye ashobora guhinduka umweru kuko nta nubwo ari n’abantu bose baba bashobora gusaba ko amenyo yabo ahindurwa umweru ngo bikunde.”

Zimwe mu mpamvu Mbusa avuga zishobora gutuma uwasabwe guhindurirwa amenyo umweru atabikorerwa harimo kuba afite amenyo yoroshye, kuba yumva uburibwe vuba no kuba asanganywe amenyo y’umweru ariko we akaba ashaka ibirenzeho.

Dr Mbusa ntiyemeranya n’abavuga ko ubuganga bw’amenyo buhenda kuko bakorana n’ubwishingizi butandukany nka RSSB,MMI ndetse n’ubundi kandi bagakora iminsi yose y’icyumweru.

Muri iri vuriro batanga izindi serivisi zijyanye n’ubuvuzi bw’amenyo zirimo kuyashyira ku murongo,gusimbuza ayakutse, kuyahoma no kuvura ibibazo by’abava amaraso mu menyo.

Kubifuza inama zijyanye n’uko bafata neza amenyo yabo bahamagara impuguke za Advanced Dental Centre kuri 0789313200 Cyangwa akabagana aho bakorera I Remera mu ku nzu iteganye n’amarembo mato ya Stade Amahoro.

Muri Advanced Dental Centre bakira abantu bose bafite uburwayi bw'amenyo butandukanye
Dr Mbusa Philbert avuga ko kunuka mu kanwa bishobora kuvurwa bigakira
Bafite ibikoresho byo kwa muganga bigezweho
Bafite inzobere mu buvuzi bw'amenyo butandukanye
Advanced Dental Centre ikorana n'ubwishingizi butandukanye
Advanced Dental Centre itanga ubuvuzi bw'amenyo butandukanye

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .