00:00:00 IGIHE NETWORK KN KINYARWANDA EN ENGLISH FR FRANCAIS

Hashyizweho uburyo bwihariye bwo kwita ku buzima bw’abazitabira CHOGM

Yanditswe na Rabbi Malo Umucunguzi
Kuya 17 June 2022 saa 05:24
Yasuwe :

Umunyamabanga wa Leta muri Minisiteri y’Ubuzima, Dr Mpunga Tharcisse, yatangaje ko Guverinoma yashyizeho uburyo bwo kwita ku buzima bw’abazitabira inama y’abakuru b’ibihugu na Guverinoma bigize Commonwealth (CHOGM), harimo abaganga n’amavuriro yiteguye kubakira.

Kuri uyu wa Gatanu nibwo inzego zitandukanye za Leta zatangaje aho imyiteguro igeze, mbere y’iminsi ibiri gusa ngo ibikorwa nyirizina by’inama bitangire.

Muri iyi minsi mu Rwanda hamaze iminsi hagaragara ubwandu bwa COVID-19 bwiyongereye ariko Dr Mpunga yavuze ko imibare nta mpungenge iteye.

Yagize ati "Uyu munsi iyo ufashe imibare y’abantu 30; 35; ku baturage miliyoni 14, ni ukuvuga ngo ni igipimo cy’abantu 1,6 ku bantu 100.000. Turacyari hasi rero, ntabwo imibare ikanganye ku buryo wavuga ko ubuzima bwahagarara."

Yavuze ko u Rwanda rwakingiye abantu benshi ku buryo nk’abishimangije barenga 65%, ndetse n’abandura muri iki gihe ntabwo baremba, kandi bakira vuba.

Dr Mpunga yakomeje ati "Uyu munsi tuvuga dufite abarwayi batarenga bane mu gihugu hose. Urebye abantu bose rero bari mu bitaro, abarwayi bane muri miliyoni 14, ntabwo bikanganye. Ariko ikindi gikomeye ni ukuvuga ngo kuva mu kwezi kwa gatatu kugeza uyu munsi, nta muntu n’umwe turapfusha azize COVID-19."

Yavuze ko mu bantu bazitabira CHOGM nta muntu uzaba atatumiwe, ku buryo abazaturuka hanze y’igihugu bazaba bipimishije, nibagera muri hoteli bapimwe, na mbere yo kwitabira inama.

Uwasangwamo uburwayi ngo yafashwa kwivuza.

Dr Mpunga yavuze ko buri hoteli yahawe abaganga bashobora gufasha uwitabiriye CHOGM wagira ikibazo ndetse bakabafasha no kubapima.

Yakomeje ati "Dufite n’imodoka zabugenewe za ’ambulance’ zishobora kuba zatwara umuntu ugize ikibazo, zo kubageza kwa muganga, dufite ibitaro twateganyije, ibya Kanombe, Ibyitiriwe Umwami Faisal na CHUK, ibyangombwa byose byarateguwe, abaganga bariteguye, n’uyu munsi bamaze kugera aho bagomba gukorera nabo kandi ibyangombwa byose barabifite kugira ngo bazafashe abo bantu."

Yavuze ko kugeza ubu urwego rw’ubuzima rwiteguye neza kugira ngo rube rwafasha abazitabira CHOGM, atari kuri COVID-19 gusa, ahubwo n’izindi ndwara bashobora kugira.

N’ahabera inama ngo hashyizwe abaganga bazaba bakurikirana abashobora kurwara, kimwe no kubapima covid-19.

Umunyamabanga wa Leta muri Minisiteri y’Ubuzima, Dr Mpunga Tharcisse, yatangaje ko Guverinoma yashyizeho uburyo bwo kwita ku buzima bw’abazitabira inama ya CHOGM

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .