Hagaragajwe ko kurya urusenda bigabanya ibyago byo kwicwa n’indwara z’umutima

Yanditswe na Ndayikunda Josué
Kuya 27 Ukuboza 2019 saa 11:43
Yasuwe :
0 0

Gufata ifunguro ni ingenzi mu buzima bwa muntu kuko biza mu by’ibanze akenera kugira ngo abeho. Hari abantu bamaze kwishyiriraho ihame rivuga ko kurya ifunguro iryo ariryo ryose ridaherekejwe n’urusenda riba rituzuye.

Abenshi bavuga ko urusenda rubatera imbaraga zo kurya rukanongera uburyohe mu ifunguro, hakaba n’abandi bahamya ko rwongera ubushyuhe mu mubiri.

Urusenda rwagiye rugaragazwa nk’igihingwa cyifitemo imbaraga zo gukiza indwara zitandukanye bigatuma imbaga nyamwinshi iruyoboka.

Ubushakashatsi bwakorewe mu gihugu cy’u Butaliyani mu gihe cy’imyaka umunani ku bantu ibihumbi 23, bwagaragaje ko kurya urusenda rw’imisogwe byibuze inshuro enye mu cyumweru bigabanya ibyago byo kwicwa n’indwara z’umutima ku kigero cya 40%.

Abantu bakoreweho ubu bushakashatsi bamwe baryaga uru rusenda ruzwi nka kamurari mu gihe abandi batigeze bayikoresha ku mafunguro yabo.

Umushakashatsi akaba n’umuganga muri Mediterranean Neurological Institute, Marialaura Bonaccio, avuga ko kurya kamurari ku mafunguro bigabanya ibyago byo guhitanwa n’indwara yo guturika kw’imitsi y’ubwonko.

Akomeza avuga ko urwo rusenda rufite ububasha bwinshi mu kurinda indwara zitandukanye.

Licia Iacoviello usanzwe ari umwarimu muri kaminuza ya Insubria, yavuze ko kamurari imaze kwinjizwa mu muco w’amafunguro abataliyani bafata. Itsinda ry’abashakashatsi riri gutegura uburyo bwo gushakira hamwe utunyabutabire dutuma kamurari igira uruhare mu buzima bwa muntu.

Inzobere mu by’imirire zagaragaje ko zashimye ibyavuye mu bushakashatsi gusa zigenda zigaragaza imbogamizi zitandukanye.

Umuhanga mu by’imirire, Duane Mellor, yemera ko urusenda ari ingenzi gusa ngo ntabona ihuriro ryo kurukoresha n’inyungu ku buzima.

Ian Johnson nawe ukora ubushakashatsi ku mirire ashima ibyavuye mu bushakashatsi akanenga ko batagaragaza inzira z’uburyo uru rusenda rwaba koko rufite ubushobozi bwo kurinda abantu indwara.

Ubushakashatsi bwakorewe mu gihugu cy’u Butaliyani mu gihe cy’imyaka umunani ku bantu ibihumbi 23, bwagaragaje ko kurya urusenda rw’imisogwe byibuze inshuro enye mu cyumweru bigabanya ibyago byo kwicwa n’indwara z’umutima ku kigero cya 40%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza