00:00:00 IGIHE NETWORK KN KINYARWANDA EN ENGLISH FR FRANCAIS

Dr Habumuremyi yemeye kwishyura amadeni mbere yo kugezwa mu nkiko

Yanditswe na Rabbi Malo Umucunguzi
Kuya 2 Ugushyingo 2022 saa 11:08
Yasuwe :

Urukiko rw’Ibanze rwa Gasabo rwaburanishije urubanza rwarezwemo Dr Pierre Damien Habumuremyi wabaye Minisitiri w’Intebe, yishyuzwa miliyoni 3,2 Frw kuri serivisi yahawe, yajya kwishyura agatanga sheki itazigamiye.

Rwaburanishijwe kuri uyu wa 2 Ugushyingo 2022 mu manza mbonezamubano, bitangazwa ko ababuranyi bumvikanye, bagahitamo kureka urubanza.

Ku wa 14 Ukwakira 2021 nibwo Dr Pierre Damien Habumuremyi yarekuwe nyuma y’umwaka n’amezi atatu afunzwe, nyuma yo guhabwa imbabazi na Perezida Kagame.

Yari yarakatiwe n’Urukiko Rwisumbuye rwa Nyarugenge gufungwa imyaka itatu, anacibwa ihazabu ya miliyoni 892 Frw, kubera ibyaha bifitanye isano n’imyenda yari yarafashe, akagenda atanga sheki zitazigamiye.

Ubwo yasabaga imbabazi umukuru w’igihugu, Dr Habumuremyi yagaragaje ko afunzwe atabona ubwishyu bw’abantu abereyemo amadeni, ariko arekuwe yakora akabasha kwishyura.

Imbabazi yahawe zakuyeho igifungo cy’imyaka itatu yari yarakatiwe n’ihazabu yaciwe. Icyakora, yagombaga kwishyura abantu abereyemo imyenda.

Ni urugendo rutamworoheye kubera ko na kaminuza ya Christian University of Rwanda yatumye afata amadeni menshi mu yamufungishije, yaje gufungwa kubera ibibazo by’imikorere mibi.

Umwe mu batarishyuwe ni uwitwa Bizima Daniel, wareze Dr Habumuremyi ko yamuhaye serivisi zo gukodesha imodoka zo gutwara abakozi, agomba kumwishyura 3,200,000 Frw.

Ubwo yamwishyuraga ngo yamuhaye sheki yo muri I&M Bank, aza gusanga itazigamiye. Ni sheki bigaragara ko yasinywe ku wa 10 Nyakanga 2020.

Uyu mugabo ngo yagerageje kwegera Dr Habumuremyi ngo amuhe amafaranga ye, ariko ntiyabikora, ndetse ntiyamuha icyizere cy’uko azamwishyura.

Yaje kuregera urukiko arusaba "gutegeka Habumuremyi Pierre Damien kwishyura umwenda wa miliyoni 3,200,000 Frw, hiyongereyeho amafaranga y’igihombp yanteje, inyungu yayo, indishyi z’akababaro n’amafaranga y’ikurikiranarubanza."

Icyakora, kuri uyu wa Gatatu umunyamategeko wunganira Bizima mu mategeko, yageze imbere y’urukiko ari wenyine. Yaba Bizima cyangwa Dr. Habumuremyi, nta witabye.

Yabwiye umucamaza ati "Habaye ubwumvikane, tukaba twari tuje gusaba kureka urubanza."

Ni icyemezo yavuze ko bafashe bisunze ingingo ya 123 y’Itegeko rigenga imiburanishirize y’Imana z’imbonezamubano.

Yavuze ko habayeho ubwumvikane binyuze ku mukobwa wa Dr Habumuremyi na Bizima Daniel, bemeranya ko urubanza baruretse, bitandukanye no kureka ikirego kuko mu gihe yaba atishyuye, ikirego cyabyutswa.

Yakomeje ati "Ni cyo gituma Pierre Damien atitabye Urukiko, ni uko yari azi ko hafashwe iki cyemezo."

Amakuru avuga ko mu bwumvikane, umukobwa wa Dr Habumuremyi yavuze ko nta mitungo asigaranye kuko yatejwe cyamunara, bityo nta bushobozi afite bwo guhita yishyura.

Icyakora, yemeye kuyashaka akishyura make make, mu gihe cy’umwaka umwe.

Icyemezo cy’urukiko kuri ubu busabe kizatangazwa ku wa 10 Ugushyingo 2022, saa munani.

Mu mwaka ushize nibwo byaje kumenyekana ko imwe mu mitungo ya Dr Habumuremyi yaje gushyirwa muri cyamunara, kugira ngo hishyurwe amwe mu madeni.

Harimo isambu iherereye mu Karere ka Kicukiro mu Murenge wa Masaka, aho igiciro fatizo cyayo cyagizwe 15,838,000 Frw. Ku yindi mirima ibiri nta n’umwe wahawe agaciro karengeje miliyoni 5 Frw.
Byose byari bigamije kwishyura amafaranga yahawe n’uwitwa Musoni Evariste, atamwishyuye aza kwitabaza Urukiko rw’ubucuruzi, maze urubanza ruza kuba itegeko.

Urukiko rwamutegetse kwishyura miliyoni 24,7 Frw, ariko bitewe n’uko byageze mu kwishyura binyuze muri cyamunara, Habumuremyi yishyujwe miliyoni 26 Frw ubariyemo amatangazo yo kumenyekanisha cyamunara n’ibihembo by’umuhesha w’inkiko.

Mbere yo gutabwa muri yombi, uyu mugabo yagiye ahabwa imyanya ikomeye muri Leta. Yagizwe Minisitiri w’Intebe tariki ya 7 Ukwakira 2011, umwanya yavuyeho tariki ya 23 Nyakanga 2014.

Muri Gashyantare 2015, Dr. Habumuremyi yagizwe Umukuru w’Urwego rw’Igihugu Rushinzwe Intwari z’Igihugu, Imidali n’Impeta y’Ishimwe, umwanya yariho kugeza atawe muri yombi muri Nyakanga 2020.

Dr Habumuremyi yemeye kwishyura amadeni mbere yo kugezwa mu nkiko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .