00:00:00 IGIHE NETWORK KN KINYARWANDA EN ENGLISH FR FRANCAIS

Amajyepfo: Basabye kwegerezwa serivisi za Laboratwari y’ibimenyetso bya gihanga bikoreshwa mu butabera

Yanditswe na Akimana Jean de Dieu
Kuya 19 August 2022 saa 08:45
Yasuwe :

Laboratwari y’u Rwanda y’Ibimenyetso bishingiye ku bumenyi n’ubuhanga byifashishwa mu butabera (RFL), yakoze ubukangurambaga bugamije kumenyekanisha imikorere n’inshingano z’ubuyobozi n’abaturage mu kubungabunga ibimenyetso by’ahabereye ibyaha kugira ngo bizabashe gutangirwaho ubutabera bunoze.

Ni ubu bukangurambaga bwakomerejwe mu Ntara y’Amajyepfo kuri uyu wa 19 Kanama 2022 nyuma yo kuva mu Ntara y’Amajyaruguru. Bufite insanganyamatsiko igira iti "Menya RFL, Laboratwari y’u Rwanda y’ibimenyetso bishingiye ku bumenyi n’ubuhanga byifashishwa mu butabera mu Rwanda ndetse no hanze y’Igihugu".

Bamwe mu bayobozi bo mu nzego z’ibanze bitabiriye ubu bukangurambaga bahuriza ku gitekerezo cyo kwereka ubuyobozi bwa Laboratwari y’u Rwanda y’ibimenyetso bishingiye ku bumenyi n’ubuhanga byifashishwa mu butabera mu Rwanda ko bikiri imbogamizi ku bashaka serivisi z’iyi laboratwari kubera iri kure y’aho batuye, bagasaba kuyegerezwa mu ntara ndetse no mu turere.

Umuyobozi w’Akarere ka Nyanza, Ntazinda Erasme yavuze ko hari benshi mu baturage batabasha kubona uko baka izi serivisi ariko zegerejwe abazisaba bajya bazibona bitabasabye kuzisanga i Kigali.

Ati “Ni byo hari abaturage bashobora gushaka kwaka serivisi ariko ntibabashe kuzibona kubera urugendo bazakora bajya kuzisaba ariko zegerejwe abaturage bajya bazisaba badasabwe kuzisanga i Kigali kuko bamwe biba bibabereye ikibazo kubera ingendo bakora bajya gusaba serivisi.”

Umuyobozi Mukuru wa RFL, Lt Col Dr Charles Karangwa yabwiye IGIHE ko ubu bukangurambaga bugamije kumenyekanisha serivisi bagenera abaturage kugira ngo haboneke ubutabera bwuzuye ku wasabye iyi servisi.

Ati "Dutekereza gukora ubu bukangurambaga twari tugamije kwigisha inzego zegerejwe abaturage kugira ngo zimenyeshe abaturage ku bijyanye n’ibimenyetso dufata tugamije kureba icyishe umuntu cyangwa no kureba uwishe cyangwa gupima uturemangingo tw’amasano hagati y’abantu tugamije gutanga ibimenyetso bishobora gukoreshwa mu gutanga ubutabera hagati y’ababuranyi.”

Yakomeje yemeza ko ikibazo cy’uko iyi laboratwari itegerejwe abaturage bakizi ariko banatangiye kugenda bagikemura, aho bashyizeho amashami ku bitaro bya Rubavu na Gihundwe hakaba hakurikiyeho ibitaro bya Ruhengeri.

Ati "Iki kibazo turakizi kandi natwe ntabwo twicaye kuko tugerageza kugikoraho nubwo bitatworohera, ariko kugeza ubu turimo kugenda duhugura abaganga muri bimwe mu bitaro birimo ibya Rubavu na Gihundwe ndetse tugiye gutangira gukorana n’ibitaro bya Ruhengeri kugira ngo tuhagire abaganga bashobora gufata ibimenyetso bazi uko binagomba kubikwa bityo natwe tubashe kubona uko bizashingirwaho hatangwa ubutabera bunoze.”

Guverineri w’Intara y’Amajyepfo, Kayitesi Alice yabwiye itangazamakuru ko aba bayobozi bagomba kwereka abaturage inshingano zabo mu kubungabunga ibimenyetso by’ahakorewe icyaha.

Ati “Hahuguwe aba bayobozi kugira ngo nabo batange ubutumwa kubo bayobora kuko nibo bakunze guhura n’ibibazo bikeneye inyunganizi zo kwigana ubushishozi ku bibazo byagaragaraye, ariko dukeneye ko bamenya uko birinda gukora ku muntu wapfuye yishwe cyangwa n’ibindi bibazo bigaragara ko umuntu yahura nabyo bityo bazafasha laboratwari gupima ikabona ababikoze bityo hatangwe ubutabera bunoze ku basigaye kabone nubwo baba bazwi cyangwa batazwi.”

Bimwe mu byo iyi laboratwari ikora ipima amasano hagati y’abantu (ADN), ibiyobyabwenge mu maraso, ibikumwe n’amasasu byicishijwe uwishwe, inyandiko n’imiterere yazo n’abazanditse (Inyandiko mpimbano cyangwa iz’ukuri) n’ibishingiye ku Butabire abantu barya bikabamerera nabi n’ibindi .

Kuva muri 2018 kugeza uyu mwaka wa 2022, Laboratwari y’u Rwanda y’ibimenyetso bishingiye ku bumenyi n’ubuhanga byifashishwa mu butabera mu Rwanda imaze kwakira ibibazo bikeneye isesengurwa bisaga ibihumbi 29009.

Ubu bukangurambaga bwitabiriwe n'abayobozi batandukanye
Abakozi b'inzego z'umutekano n'iz'ubugenzacyaha bari mu bitabiriye ubu bukangurambaga
Guverineri w’Intara y’Amajyepfo, Kayitesi Alice yasabye abayobozi b'inzego zibanza gukangurira abaturage kugana serivisi za RFL
Umuyobozi Mukuru wa RFL, Lt Col Dr Charles Karangwa yavuze ko serivisi z'iyi laboratwari zizagenda zirushaho kwegerezwa abaturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .