Ruhango: KCB yagobotse ingo 50 zasenyewe n’ibiza

Yanditswe na Iradukunda Samson
Kuya 21 Nzeri 2018 saa 11:49
Yasuwe :
0 0

Banki y’Ubucuruzi ya Kenya, Ishami ry’u Rwanda (KCB Rwanda), yatanze amabati afite agaciro ka miliyoni 12 Frw, ku miryango 50 yo mu Karere ka Ruhango, mu Murenge wa Mbuye iherutse gusenyerwa n’ibiza.

Mu ntangiriro z’uyu mwaka, u Rwanda rwibasiwe n’ibiza by’imvura yaguye ari nyinshi itera imyuzure n’inkangu, byatwaye ubuzima bw’abantu 222 mu gihugu cyose nkuko Minisiteri y’Imicungire y’Ibiza n’Impunzi (MIDIMAR) ibitangaza.

Iyi mvura kandi yangije ibikorwa remezo bitandukanye, itwara imyaka, isenya inzu z’imiryango isaga ibihumbi bitanu byatumye abaturage benshi basigara nta ho kurambika umusaya bafite.

KCB Rwanda, ibicishije mu ishami ryayo ryo kwita ku baturage na rubanda rusanzwe (KCB Foundation) yagobotse abaturage basizwe iheruheru n’ibyo biza.

Imiryango 50 yo mu Kagari ka Gisanga, Umurenge wa Mbuye ho mu Karere ka Ruhango, yagenewe amabati yo kubakisha.

Kugeza ubu imiryango itanu ni yo yamaze guhabwa amabati yayigenewe mu gihe hasigaye indi 45.

Umuyobozi Mukuru wa KCB, Ishami ry’u Rwanda, George Odhiambo, yavuze ko KCB ihora yifuza ko abaturage ikorera bahora bafite umutekano n’ubuzima buzira umuze, itari guterera agati mu ryinyo mu gihe hari abaturage b’Abanyarwanda barara rwantambi kandi kuryama heza ari kimwe mu byangomwa nkenerwa cyane by’ibanze ku kiremwamuntu.

Ati “Kimwe mu byangombwa nkenerwa by’ibanze ku kiremwamuntu ni ukuryama heza. Iyo hagize ikibihungabanya, ubuzima burahungabana, umutekano ukabura, iterambere ryaba iry’igihugu cyangwa iry’umuntu ku giti cye rikadindira, cyane kuko nta cyo ubasha gukora neza utaryamye heza, cyangwa waraye udasinziye kubera imvura n’umuyaga.”

Yakomeje agira ati “KCB nka banki y’abaturage, twakozwe ku mutima n’ibyabaye ku baturage bo mu Karere ka Ruhango kimwe n’ahandi mu gihugu, bityo twiyemeza kugira icyo dukora. Ni muri urwo rwego twatanze aya mabati.”

Minisitiri w’Imicungire y’Ibiza no Gucyura Impunzi, De Bonheur Jeanne d’Arc, yashimiye KCB ku nkunga yatanze ndetse aboneraho gusaba n’abandi bafatanyabikorwa gutekereza ku bahuye n’ibiza dore ko imvura y’umuhindo yaguye muri uku kwezi na yo imaze gutwara ubuzima bw’abantu 11 barimo icyenda bishwe n’inkuba.

Minisitiri De Bonheur yaboneyeho umwanya wo gusaba abaturage gutura ahabigenewe ndetse no kwirinda imyitwarire ituma Ibiza bibibasira cyane ko ari bo bigiraho ingaruka cyane.

Ubwo bamwe mu baturage basenyewe n'imvura bahabwaga aamabati bazasakaza
George Odhiambo,Umuyobozi Mukuru wa KCB Rwanda avuga ko ari inshingano z'iyi banki kugoboka abari mu kaga
Minisitiri De Bonheur Jeanne d'Arc yashimiye KCB yatanze isakaro ku basenyewe n'ibiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza