Mu mibare: Made in Rwanda imaze gutanga musaruro ki?

Yanditswe na Rabbi Malo Umucunguzi
Kuya 4 Ukuboza 2019 saa 07:33
Yasuwe :
0 0

Mu 2017 nibwo Guverinoma y’u Rwanda yashyizeho gahunda ya Made in Rwanda, ndetse hasohorwa amabwiriza agaragaza ko ibyakorewe mu Rwanda bihabwa umwihariko iyo bigeze mu masoko ya leta, ibintu byateye imbaraga abakorera imirimo itandukanye mu Rwanda.

Kuri uyu wa Kabiri nibwo abikorera bo mu Rwanda bakoze ihuriro ryabo rya mbere, National Business Forum (NBF), ryanaganiriwemo intambwe imaze guterwa mu guteza imbere ibikorerwa mu Rwanda.

Minisitiri w’Ubucuruzi n’Inganda, Soraya Hakuziyaremye, yavuze ko nyuma y’imyaka ine hatangijwe ubukangurambaga muri gahunda ya Made in Rwanda, hari intambwe ikomeye imaze guterwa kandi urugendo ruracyajya mbere.

Yavuze ko gahunda ya Made in Rwanda yatangijwe hagamijwe kugabanya icyuho hagati y’ibicuruzwa byoherezwa mu mahanga n’ibitumizwayo, ndetse hari umusaruro urimo kuboneka.

Yifashishije imibare, yavuze ko mbere yo gutangiza gahunda ya Made in Rwanda, urwego rw’ibikorerwa mu nganda rutazamukaga cyane, aho rwatanze nibura miliyari 323 Frw mu myaka ibiri yikurikiranya ya 2011 na 2012.

Yakomeje ati “Byaragabanutse mu 2014 ariko nyuma yaho kuva mu 2015 twabonye izamuka rya 11% ku mpuzandengo, rutanga nibura miliyari 510 Frw mu myaka yakurikiye. Twongeyeho ubucukuzi bw’amabuye y’agaciro n’ubwubatsi, urwego rw’inganda rwatanze umusaruro wa miliyari 1456 Frw ku musaruro w’igihugu, ni ukuvuga ko rwazamutse 49% uhereye mu 2015. Rero Made in Rwana irakora.”

“Urugero rwa kabiri ni ukureba ibyoherezwa mu mahanga. Mbere y’ubukangurambaga bwa Made in Rwanda, ibyoherezwa mu mahanga byazamukaga ku mpuzandengo ya 10%, ariko mu myaka itatu ishize twabonye ibyoherezwa mu mahanga byiyongera kuri 17% ariko twanabonye urunyurane rw’ibyoherezwa mu mahanga, aho mbere twabonaga ikawa n’icyayi, ubu dufite imboga, indabo, urusenda n’ibindi byiyongera ku bisanzwe twoherezaga mu mahanga. Rero Made in Rwanda irimo gutanga umusaruro.”

Urugero rwa gatatu yavuze ku bwiza, aho ibicuruzwa byinshi byo mu Rwanda bikomeje guhabwa ibyemezo by’ubuziranenge ku buryo ubu rufite imibare iri hejuru yari itarigeze ibaho.

Yakomeje avuga ko hanashyizweho ibipimo bishya by’ubuziranenge aho ubu ibicuruzwa bibifite bigera ku 2188, nubwo bidahagije ariko hakomeje kongerwa imbaraga muri iki gikorwa, gituma umwimerere w’ibicuruzwa byo mu Rwanda uzatuma birushaho guhatana ku isoko mpuzamahanga.

Yavuze ko kuba u Rwanda rufite ibicuruzwa bitandukanye mu Burayi, u Bushinwa na Leta Zunze Ubumwe za Amerika nk’Akabanga ndetse na Mara Phones zikaba zirimo koherezwa mu Budage, ari ikimenyetso ko ibikorwa bya Made in Rwanda birimo kugera ki isoko hirya no hino.

Yavuze ko Guverinoma y’u Rwanda ishishikajwe no gufasha abashoramari bo mu Rwanda, aho yafashe imyanzuro irimo guha amahirwe ya 15% y’inyongera ku bicuruzwa byakorewe mu Rwanda iyo bihataniye isoko n’ibigo byo mu mahanga, ibintu avuga ko bitanga amahirwe yo kurushaho guteza imbere Made in Rwanda.

Haracyakenewe guhindura imyumvire

Umuyobozi w’Urugaga rw’Abikorera, PSF, Robert Bapfakurera, yavuze ko muri iki gihe nubwo ibikorerwa mu Rwanda bifite isoko, ikibazo ari uko bikiri bike.

Ati “Nubwo dutekereza kujya ku isoko ryo hanze, ariko n’iryo mu Rwanda dukeneye kurihaza. Ikindi ni uko hari aho dukeneye kwifatanya ngo dukorere ibikorwa byacu, kuko abenshi muri twe turi abacuruzi bato, ku buryo kugira ngo tubone amafaranga nko muri banki cyangwa ahandi bikigoye.”

Gusa mu biganiro by’abikorera, hari abagaragaje ko nko mu imurikagurisha mpuzamahanga, igicuruzwa gishimwa ku isoko ariko umuntu yabona ko gikorerwa mu Rwanda, agacika intege umureba.

Umuyobozi wa Pan-African Movement Ishami ry’u Rwanda, Musoni Protais, yavuze ko ari ngombwa kurwanya imyumvire ituma abantu bamwe bumva ko ibintu bikorerwa muri Afurika ari bibi, mu kumvisha abantu icyiza cyo gukoresha ibikorerwa mu Rwanda.

Yatanze urugero rw’uburyo umuntu aheruka kumubaza ku nkweto nziza yari yambaye, yasubiza ko yaziguze i Gatsibo ntibihite byumvikana.

Ati “Duhindure iyo myumvire. Harimo kuzamurwa Ndi Umunyarwanda na Ndi Umunyafurika hakwiye kuzamurwa n’uburyo bwo guhimbaza no kugura ibyakorewe iwabo kurusha ibyakorewe ahandi.“

“Kera ikintu cyose cy’u Rwanda cyabaga cyiza, yaba ari inzoga iryoshye ni iy’i Rwanda, amata ni ay’i Rwanda, ikibi cyose ntikibe icy’i Rwanda. Ngo ibi si iby’i Rwanda, iyo ni imvugo y’abanyarwanda kandi icyo bemeye cyose kiza mu mvugo. Ariko ubu uhura n’icyiza ngo ni icy’i Burayi, ni ikizungu, yaje ku gihe ngo ni umuzungu, arangiza akazi neza ngo ni umuzungu. Tubihindure rero, nituba turi kuganira tujye tuvuga ngo iki ni cyiza n’icyo mu Rwanda, ni icya Afurika. Nibwo tuzongera tukabona rya soko ryadukuweho.”

Umuyobozi wa Entreprise Urwibutso, Sina Gerard, yavuze ko hakenewe no guhindura imyumvire no guha agaciro ibyo umuntu akora, ku buryo bihorana umwimerere bityo bigahora bikenewe ku isoko.

Yavuze ko kwita ku mwimerere w’ibikorerwa mu ruganda rwe bituma abakiliya be babikomeraho, kandi akazirikana ingano zitandukanye zishobora kujyana n’amikoro ya buri muntu.

Inzego zitandukanye zunguranye ibitekerezo ku iterambere rya Made in Rwanda
Umuyobozi w'Urugaga rw'abikorera mu Rwanda, Robert Bapfakurera, yavuze ko abakora ibintu mu nganda bakeneye kongera ubwiza bwabyo n'ubwinshi
Minisitiri Hakuziyaremye yavuze ko Made in Rwanda imaze gutanga umusaruro ukomeye
Abikorera bahawe umwanya wo kubaza ibibazo no gutanga ibitekerezo
Umuyobozi wa PSF, Ruzibiza Stephen aganira n'Umuyobozi Mukuru wa RRA, Bizimana Ruganintwali Pascal nyuma y'ibiganiro
Umuyobozi w’Ikigo Dr. Mattress cyo muri Kenya, Adnan Merdin, yavuze ko ibyo abantu bakora mu nganda bagomba guharanira kubimenyekanisha
Umunyemari Sina Gerard aganira n'abandi bikorera nyuma y'ibiganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza