Imibare irivugira. Mu mezi atandatu ya mbere ya 2026, u Rwanda rwohereje mu Bushinwa ibicuruzwa bifite agaciro ka miliyoni 236,99 z’amadolari ya Amerika, angana na miliyari 350,3 Frw.

Ibyo birenze ibyo rwohereje muri icyo gihugu mu mwaka wose wa 2025. Mu gihe umuvuduko wakomeza kugenda uku, u Rwanda rushobora kurangiza uyu mwaka rwanditse amateka mashya mu byo rwohereza mu Bushinwa.

Mu gihembwe cya kabiri, ibyo u Rwanda rwohereje mu Bushinwa byageze kuri miliyoni 142,38 z’amadolari ya Amerika, angana na miliyari 210,4 Frw.

Byazamutseho 248,3% ugereranyije n'ibifite agaciro ka miliyoni 40,88 z’amadolari, angana na miliyari 60,4 Frw, byoherejwe mu gihembwe cya kabiri cya 2025. Mu gihembwe cya mbere, u Rwanda rwari rwohereje ibicuruzwa bifite agaciro ka miliyoni 94,61 z’amadolari ya Amerika (arenga miliyari 139,8 Frw).

Ubucuruzi bw’ibihugu byombi bwageze kuri miliyoni 849 z’amadolari ya Amerika mu 2025, buvuye kuri miliyoni 300 z’amadolari mu 2019. Ibyo u Rwanda rwohereza mu Bushinwa byavuye kuri miliyoni 35 z’amadolari bigera kuri miliyoni 227 muri icyo gihe, byiyongeraho hafi 549%.

Ishoramari ryanditswe ry’ibigo by’Abashinwa mu Rwanda ryavuye kuri miliyoni 460 z’amadolari mu 2024 rigera kuri miliyoni 548,5 mu 2025, ryiyongeraho 19%. Ibyo bigo bikorera mu nzego zirimo inganda, ibikorwa remezo, ubwubatsi, ingufu n’imitungo itimukanwa.

N imibare yagaragarijwe i Shanghai, aho u Rwanda rwitabiriye ku nshuro ya cyenda imurikagurisha mpuzamahanga ry’ibitumizwa mu Bushinwa (CIIE), riri kubera bera muri National Exhibition and Convention Center kuva ku wa 5 kugeza ku wa 10 Ugushyingo.

U Rwanda rwitabira iri murikagurisha kuva ryatangira mu 2018. CIIE y’uyu mwaka yitabiriwe n’abamurika 4.142 baturutse mu mahanga.

Iri murikagurisha riri kubera ku buso burenga metero kare 440.000, ubuso bunini kurusha ubwo ryigeze gukorerwaho mu myaka yose yashize. Ryahuje ibihugu 162, uturere n’imiryango mpuzamahanga.

Minisitiri w’Intebe Wungrije w’u Bushinwa, Ding Xuexiang, yavuze ko iri murikagurisha rigamije guhuza abarishakiramo amahirwe, ati “Muri iki gihe, u Bushinwa ni uruganda rw’isi ndetse ni n’isoko ryayo.”

Kuri ‘stand’ y’u Rwanda, ibigo biri kumurika ikawa yihariye, icyayi, urusenda, imbuto, ubuki karemano, imbuto za makadamia n’ibihangano by’ubukorikori.

Ivan Shema, washinze 1000 Hills Products, yabwiye IGIHE ko CIIE ibaha amahirwe yo kubona abaguzi bashya muri Aziya. Icyo kigo cyongerera agaciro ikawa n’imbuto byo mu Rwanda, kikaba cyaratangiye kohereza ikawa muri Pologne mu 2015, aho ikomereza mu yandi masoko y’u Burayi.

Muri iri murikagurisha, icyo kigo kiri kumurika ikawa, inanasi, imyembe, n’avoka. Shema ati “Turizera ko dushobora kubona isoko rishya mu Bushinwa.”

U Rwanda n’u Bushinwa biri kwizihiza imyaka 55 ishize ibihugu byombi bitangije umubano mu bya dipolomasi.
Ambasaderi w’u Rwanda mu Bushinwa, Lt Gen (Rtd) Emmanuel Karenzi Karake, yavuze ko CIIE ifasha ibigo byo mu Rwanda kugeza ku Bashinwa ibicuruzwa bitandukanye.

Ati “CIIE yagaragaje ko ari urubuga rw’ingirakamaro cyane ku bigo byo mu Rwanda, cyane cyane abahinzi bato n’amakoperative ayobowe n’abagore, kugira ngo bigere ku isoko ry’u Bushinwa kandi byubake ubufatanye burambye mu bucuruzi. … Buri gikombe cy’ikawa n’ubuki by’u Rwanda byanyuze abaguzi b’Abashinwa, biba ari amahirwe yo gushyigikira abahinzi, imiryango na ba rwiyemezamirimo bo mu Rwanda.

Ubusonerwe ku misoro ya gasutamo bwatanze umusaruro

Ubucuruzi hagati y’u Bushinwa na Afurika bwageze ku rwego rwo hejuru rwa miliyari 348,05 z’amadolari ya Amerika mu 2025.

Bwiyongereyeho 17,7% ugereranyije n’umwaka wari wabanje. U Bushinwa bwaguze ibicuruzwa byo muri Afurika bifite agaciro ka miliyari 123,02 z’amadolari, bwohereza kuri uyu mugabane ibicuruzwa bifite agaciro ka miliyari 225,03 z’amadolari.

Mu gihembwe cya kabiri cya 2026, u Bushinwa bwabaye isoko rinini u Rwanda rwaguzemo ibicuruzwa, kuko rwinjije ibifite agaciro ka miliyoni 415,89 z’amadolari ya Amerika, arenga na miliyari 614,7 Frw.

U Bushinwa bwohereza mu Rwanda ibinyabiziga, ibikoresho by’amashanyarazi, imashini, ibikoresho by’ubwubatsi n’imyenda.

Mu 2025, ibinyabiziga byoherejwe mu Rwanda byari bifite agaciro ka miliyoni 130,45 z’amadolari ya Amerika, ibikoresho by’amashanyarazi n’iby’ikoranabuhanga byari miliyoni 114,65 z’amadolari ya Amerika naho imashini zari miliyoni 46,62 z’amadolari.

Mu 2025, u Bushinwa bwatumije ibicuruzwa bifite agaciro ka miliyari 2.590 z’amadolari ya Amerika, mu gihe bwohereje mu mahanga ibifite agaciro ka tiriyari 3,77 z’amadolari, angana na tiriyari 5.572 Frw.

Bumaze imyaka 17 yikurikiranya ari isoko rya kabiri ku isi rinini mu gutumiza ibicuruzwa, kandi ni isoko rikomeye ry’ibyoherezwa mu mahanga ku bihugu hafi 80.

Gusonerwa imisoro ya gasutamo ku bicuruzwa byo mu Rwanda byujuje ibisabwa byatangiye gukurikizwa ku wa 1 Ukuboza 2024.

Ku wa 1 Gicurasi 2026, iyo gahunda yaguwe igera ku bihugu 53 byose bya Afurika u Bushinwa bufitanye na byo umubano wa dipolomasi, bikurikijwe amategeko agenga inkomoko y’ibicuruzwa n’ibisabwa kuri buri gicuruzwa.

Imibare ya Minisiteri y’Ubucuruzi y’u Bushinwa yerekana ko ibitumizwa muri Afurika byageze kuri miliyari 28,61 z’amadolari ya Amerika, muri Gicurasi na Kamena, byiyongeraho 23,5% ugereranyije n’igihe nk’icyo mu 2025. Ibitumizwa muri Afurika birimo avoka ziyongereyeho 130%, pome ziyongeraho 89,6%, na ho amacunga yiyongeraho 27,9%.

Ding ati “Tuzakomeza gahunda yo koherea ibicuruzwa mu Bushinwa, tuzatumiza ibicuruzwa na serivisi byinshi byujuje ubuziranenge.”