00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Dr Ndagijimana yakomoje ku ngaruka ’Omicron’ ishobora kugira ku bukungu bw’igihugu

Yanditswe na Iradukunda Serge
Kuya 29 Ugushyingo 2021 saa 05:28
Yasuwe :

Minisitiri w’Imari n’Igenamigambi, Dr Uzziel Ndagijimana yavuze ko kugeza ubu hataramenyekana ingaruka ubwoko bushya bwa Coronavirus buzwi nka Omicron bushobora kugira ku bukungu bw’u Rwanda ariko yemeza ko mu gihe bwaba bugeze mu gihugu bwahungabanya urugero bwari buriho buzahuka.

Kuva ku wa 24 Ugushyingo hagaragara ubu bwoko bushya bwa Coronavirus, bwakangaranyije Isi kubera uburyo bwandura cyane kurenza ubwari busanzwe.

Kugeza ubu ibihugu bimwe na bimwe byatangiye gufata ingamba zo kwirinda zirimo gufunga imipaka ndetse no gukumira abagenzi baturutse mu bihugu yagaragayemo bwa mbere birimo Afurika y’Epfo na Botswana.

N’ubwo itaragaragara mu Rwanda, narwo rwashyizeho ingamba zigamije kuyirinda no kuyikumira zirimo gusubizaho akato ku bagenzi bava mu mahanga. No guhagarika ingendo n’ibihugu byo mu Majyepfo ya Afurika, aho yiganje.

Mu kiganiro Minisitiri Dr Uzziel Ndagijimana yagiranye n’itangazamakuru kuri uyu wa Mbere tariki 29 Ugushyingo 2021 yavuze ko kugeza ubu bataramenya ingaruka ubu bwoko bushya bwa Coronavirus bushobora kuzagira ku bukungu bw’u Rwanda.

Ati “Nibwo ikiboneka, ntabwo ubushakashatsi buragaragaza neza imiterere yayo neza n’ingaruka yagira ku buryo uyu munsi kuvuga ingaruka yagira ku bukungu ntabwo byoroshye ariko turakurikirana mu kureba uko igenda ikwirakwira ku Isi. Iracyari ahantu hake.”

Yavuze ko ubu icyo gihugu kiri gukora ari ugufata ingamba zigamije kwirinda ariko yemeza ko igeze mu gihugu yagira ingaruka ku bukungu.

Ati “Icya mbere ni ugufata ingamba zo kuyikumira kugira ngo itatwinjirana ikindi ni uko iramutse ikwiriye cyane byanze bikunze yagira ingaruka ku bukungu ariko kumenya uko byaba bimeze haracyari kare.”

Minisitiri Ndagijimana yavuze ko ubu bwoko bushya bwa Coronavirus bwadutse mu gihe hari icyizere ku kuzahuka ku bukungu.

Ati “Ikigaragara ni uko twari tumaze gusa nk’aho ubukungu butangiye kugaruka ku gipimo cyiza. Muri uyu mwaka twateganyaga ko ubukungu bwacu buzazamukaho 10.2% ugereranyije na -3,4% twagize umwaka ushize.”

“Iyi sura nshya rero ya COVID-19 ni ikibazo gikomeye hari ingamba zirimo n’izo Inama y’Abaminisitiri yafashe ejo yo kuyikumira ariko kumenya ingaruka izagira ku bukungu bizaterwa n’uburyo ibihugu bizifata mu bijyanye no kuyirwanya kugira ngo idakwirakwira henshi.”

Omicron ije mu gihe ubukungu bw’u Rwanda bwari butangiye kuzahuka. Ikigega Mpuzamahanga cy’Imari (IMF), cyari giherutse gutangaza ko umwaka wa 2021 uzarangira ubukungu bw’u Rwanda buzamutse ku kigero cya 10,2%, biturutse ku kuba ubukungu bw’Isi buri kuzahuka muri rusange, imbaraga igihugu cyashyize mu gukingira icyorezo cya COVID-19 n’ingamba zashyizweho mu kureshya abashoramari.

Minisitiri w’Imari n’Igenamigambi, Dr Uzziel Ndagijima yavuze ko Omicron nigera mu Rwanda izagira ingaruka ku izahuka ry'ubukungu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .