Ibi bikubiye mu mibare y’imikorere y’iyi banki yashyizwe ahagaragara ku wa 12 Ugushyingo 2026, igaragaza uko ubucuruzi bwayo bwifashe mu gihembwe cya gatatu cy’umwaka, cyarangiye ku wa 30 Nzeri.

I&M Bank Rwanda yagaragaje ko iri zamuka ry’inyungu ryatewe ahanini no kwaguka kw’ibikorwa byayo, kwiyongera kw’abakiliya bayigirira icyizere no gutanga inguzanyo nyinshi mu nzego zitandukanye z’ubukungu bw’igihugu.

Mu mibare yatangajwe, umutungo mbumbe w’iyi banki wageze kuri miliyari 1.560 Frw, uzamukaho 43% ugereranyije n’uko wari uhagaze mu Ukuboza 2025.

Inguzanyo yatanze ku bakiliya zazamutseho 37%, zigera kuri miliyari 670,3 Frw, bitewe n’ubwiyongere bw’abasabaga amafaranga yo gushora mu bucuruzi, mu bigo bito n’ibiciriritse ndetse no mu bigo binini.

Amafaranga abakiliya babikije muri iyi banki na yo yiyongereyeho 48%, agera kuri miliyari 1.300 Frw, ibintu ubuyobozi bwayo buvuga ko bigaragaza icyizere abakiliya bakomeje kuyigirira.

Amafaranga yinjijwe n’ibikorwa bya banki yiyongereyeho 33%

I&M Bank Rwanda yatangaje ko amafaranga yinjije mu bikorwa byayo by’ibanze, nyuma yo gukuramo ikiguzi kijyanye n’ayo mafaranga, yiyongereyeho 33%, agera kuri miliyari 80,7 Frw.

Muri ayo mafaranga, inyungu yakuye ku nguzanyo n’ibindi bikorwa byunguka inyungu, nyuma yo gukuramo izo yishyuye, yazamutseho 26%, igera kuri miliyari 61,1 Frw.

Amafaranga yinjijwe binyuze mu bwishyu bwa serivisi na komisiyo, nyuma yo gukuramo ikiguzi cyabyo, yazamutseho 45%, agera kuri miliyari 3,9 Frw.

Iri zamuka ryatewe ahanini n’ubwiyongere bw’abakiliya bakoresha serivisi z’ikoranabuhanga, zirimo uburyo bwo kwishyurana hakoreshejwe eKash.

Iyi banki ivuga ko izakomeza guteza imbere serivisi z’imari zishingiye ku ikoranabuhanga, mu rwego rwo korohereza abakiliya no gushyigikira gahunda y’u Rwanda yo kugabanya ikoreshwa ry’amafaranga afatika mu kwishyurana.

Yashyize imbaraga mu gutera inkunga abagore, urubyiruko n’ubuhinzi

Mu mezi icyenda ya mbere ya 2026, I&M Bank Rwanda yakomeje kwagura serivisi z’inguzanyo zigenewe ibigo bito n’ibiciriritse, by’umwihariko ibiyoborwa n’abagore n’urubyiruko.

Iyi banki yagaragaje ko yakomeje gukorana n’ibigo bitandukanye bifasha mu gutera inkunga iterambere, kugira ngo yongere ubushobozi bwo gushyigikira ba rwiyemezamirimo no guhanga imirimo.

Mu rwego rw’ubuhinzi, yakomeje gutanga inguzanyo ku bashoramari bakora ibikorwa bitandukanye mu ruhererekane nyongeragaciro rw’ibikomoka ku buhinzi.

Ibi bigamije kongera umusaruro w’ubuhinzi, guteza imbere ubucuruzi bushobora guhangana n’ingaruka z’imihindagurikire y’ibihe no gushyigikira iterambere ry’ubukungu bw’u Rwanda.

I&M Bank Rwanda yakomeje kandi guteza imbere serivisi zirimo Karame, ifasha abakiliya kubona inguzanyo yo kugura umutungo, ndetse n’izindi gahunda zishyigikira uburezi n’ubwikorezi burambye.

Yagejeje umubare w’aba-agents ku barenga 1.000

Mu rwego rwo kugeza serivisi z’imari ku baturage benshi, I&M Bank Rwanda yaguye ibikorwa bya Karame Twaje, uburyo bwo gutanga serivisi za banki hifashishijwe aba-agents.

Kugeza ku wa 30 Nzeri 2026, iyi banki yari ifite aba-agents barenga 1.000, biyongera ku mashami yayo 20 akorera mu bice bitandukanye by’igihugu.

Aba-agents bafasha abakiliya gufunguza konti, kubitsa no kubikuza amafaranga, kwishyura serivisi z’ibanze, amafaranga y’ishuri ndetse na serivisi za Leta.

Iyi gahunda igamije kwegereza abaturage serivisi z’imari, cyane cyane abatuye mu bice byari bisanzwe bigoye kugeramo serivisi za banki.

Ku rundi ruhande, amafaranga banki yakoresheje mu bikorwa byayo yazamutseho 24%, agera kuri miliyari 34,1 Frw.

Ubuyobozi bwayo bwagaragaje ko iri zamuka ryatewe n’ishoramari ryakozwe mu kwagura ibikorwa, guteza imbere abakozi no kunoza ikoranabuhanga rikoreshwa mu gutanga serivisi.

Iyi banki yanagabanyije igipimo cy’inguzanyo zitishyurwa neza, kiva kuri 1,84% mu Ukuboza 2025 kigera kuri 1,57% muri Nzeri 2026.

Umuyobozi Mukuru wa I&M Bank Rwanda, Benjamin Mutimura, yavuze ko umusaruro wagezweho mu mezi icyenda ya mbere ya 2026 ugaragaza icyizere abakiliya bagirira iyi banki n’uburyo abakozi bayo bitanga mu kazi.

Ati “Umusaruro mwiza twagezeho mu mezi icyenda ya mbere ya 2026 ugaragaza icyizere abakiliya bacu bakomeje kutugirira, ubwitange bw’abakozi bacu n’ubushobozi bw’ibikorwa byacu.”

Mutimura yasobanuye ko kwiyongera kw’inguzanyo n’amafaranga abakiliya babitsa bigaragaza ko serivisi z’iyi banki zikomeje gusubiza ibyifuzo by’abaturage n’ibigo by’ubucuruzi.

Yashimangiye ko intego ya banki atari ukongera inyungu gusa, ahubwo ari no kugira uruhare mu iterambere ry’ubukungu bw’u Rwanda.

Ati “Uretse kugera ku musaruro mwiza mu by’imari, dukomeje kwiyemeza gutanga umusanzu ufatika mu iterambere ry’ubukungu bw’u Rwanda. Binyuze muri gahunda nka Berwa igenewe gutera inkunga abagore, izindi gahunda z’inguzanyo ku bigo bito n’ibiciriritse, Karame Twaje na serivisi zacu z’ikoranabuhanga, turi kwagura uburyo bwo kubona serivisi z’imari no gushyigikira ba rwiyemezamirimo, abagore, urubyiruko n’ibigo bikorera mu nzego z’ingenzi z’ubukungu.”

Yongeyeho ko banki izakomeza gushora imari mu bakozi, ikoranabuhanga no kunoza serivisi, ari na ko ishyira imbere imicungire myiza y’umutungo n’ingaruka zishobora kuvuka mu bucuruzi.

I&M Bank Rwanda yashinzwe mu 1963, ikaba ari yo banki imaze igihe kirekire ikorera mu Rwanda.

Ni ishami rya I&M Group Plc, ikorera mu bihugu bitandukanye byo muri Afurika y’Iburasirazuba, birimo Kenya, Tanzania na Uganda, ndetse ikaba ifitanye imikoranire na CIEL Group muri Bank One yo muri Maurice.

Inyungu ya I&M Bank Rwanda yazamutseho 44%