Raporo y’Igipimo cy’Ihindagurika ry’Ibiciro (CPI) ya Kanama 2026 igaragaza ko iri zamuka ry’ibiciro ryarenze iryagaragaye muri Nyakanga 2026, ubwo ibiciro byari byiyongereyeho 14,5% ugereranyije n’umwaka wari wabanje.

NISR yavuze ko iri zamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 16,3%, ibiciro by’inzu, amazi, amashanyarazi, gaz n’ibindi bicanwa byiyongereyeho 20,4%, ibijyanye n’ubwikorezi byiyongereyeho 24,2%, ndetse n’ibiciro by’amafunguro n’icumbi byiyongereyeho 15,6%.

Ugereranyije Kanama 2026 na Nyakanga 2026, ibiciro mu mijyi byiyongereyeho 1,8%, aho iri zamuka ryatewe cyane n’ibiciro by’ibiribwa n’ibinyobwa bidasembuye byazamutseho 3,7%.

Raporo ya NISR igaragaza ko no mu cyaro ibiciro byakomeje kuzamuka, aho muri Kanama 2026 byiyongereyeho 16% ugereranyije na Kanama 2025. Muri Nyakanga 2026, iri zamuka ryari kuri 13,3%.

Mu byatumye ibiciro mu byaro bizamuka harimo ibiribwa n’ibinyobwa bidasembuye byiyongereyeho 16,8%, ibinyobwa bisembuye n’itabi byiyongereyeho 7,5%, amazu, amazi, amashanyarazi, gaz n’ibindi bicanwa byiyongereyeho 19,4%, ndetse n’ubwikorezi bwazamutseho 38,8%.

Iyo harebwe ibiciro bikomatanyirijwe hamwe mu mijyi no mu cyaro, NISR yagaragaje ko muri Kanama 2026 ibiciro byiyongereyeho 15,9% ugereranyije na Kanama 2025. Muri Nyakanga 2026, iri zamuka ryari kuri 13,8%.

Ibyagize uruhare runini muri iri zamuka harimo ibiribwa n’ibinyobwa bidasembuye byiyongereyeho 16,7%, ibinyobwa bisembuye n’itabi byiyongereyeho 8,2%, amazu, amazi, amashanyarazi, gaz n’ibindi bicanwa byiyongereyeho 19,9%, ubwikorezi buzamuka kuri 27,5%, naho amafunguro n’icumbi byiyongera kuri 13,7%.

NISR kandi yavuze ko ugereranyije Kanama 2026 na Nyakanga 2026, ibiciro muri rusange mu Rwanda byiyongereyeho 2,6%, aho iri zamuka ryatewe cyane n’ibiciro by’ibiribwa n’ibinyobwa bidasembuye byazamutseho 4,6%.