Byinshi ku mikorere ya moto zikoresha amashanyarazi n’uko zakiriwe ku isoko ry’u Rwanda

Yanditswe na Ndayikunda Josué
Kuya 18 Mutarama 2020 saa 08:50
Yasuwe :
0 0

Muri Gicurasi umwaka ushize, moto zikoresha amashanyarazi zatangiye imirimo yo gutwara abagenzi mu Rwanda, akaba ari naho iyi serivisi yari itangiriye bwa mbere ku Isi.

Ni umushinga mugari, aho biteganyijwe ko izi moto zikoresha amashanyarazi zizasimbura izikoresha lisansi.

Kugira ngo izi moto zigende zikoresha batiri ikoreshwa hagati y’ibilometero 65 na 70 ubundi ukajya guhinduza kuri sitasiyo zabugenewe ubu zimaze kuba eshatu mu Mujyi wa Kigali ari zo; iya Rwandex, Nyabugogo na Kimironko.

Umubare w’abamotari bazikoresha mu Rwanda ubu ni 20, aba bapatana n’Ikigo cyitwa Ampersand, kizobereye mu bijyanye n’ibinyabiziga bikoresha uburyo bw’amashanyarazi, bagatanga 37 500 Frw buri cyumweru ku yo bakoreye.

Umuyobozi wa Ampersand mu Rwanda akaba n’umwe mu bayishinze, Hakizimana Emmanuel, yabwiye IGIHE ko ubu abamotari bagera ku 7000 bamaze gusaba gukorana nabo, ariko iki kigo gifite intego y’uko byibuze umubare w’abatwara abagenzi kuri moto z’amashanyarazi uzagera kuri 500 uyu mwaka wa 2020.

Umwihariko wa moto zikoresha amashanyarazi

Hakizimana avuga ko uretse kuba zifite imbaraga mu guterera, zinorohera buri wese kuba yazitwara.

Ati “Moto zacu ni ‘automatique’, umuntu wese yayitwara kandi nta mavuta zigira kubera ko nta moteri, ni ukuvuga ko ya mavuta bamenaga buri cyumweru iwacu urayazigama. Ikindi zifite imbaraga mu guterera kandi ku mutekano zifite feri zikomeye cyane.”

Ibijyanye no kutangiza ikirere, Hakizimana yemeza ko izi moto ari igisubizo. Ibi bijyana n’ubushakashatsi bwamuritswe n’Ikigo cy’Igihugu cyo Kubungabunga Ibidukikije (REMA) mu 2017 bwagaragaje ko ibiza ku isonga mu guhumanya umwuka uhumekwa mu Rwanda harimo umwotsi w’imodoka, moto, imyotsi y’amakara n’inkwi n’ibindi.

Gasago Venuste umaze amezi atanu atwara moto ikoresha amashanyarazi, avuga ko amafaranga yunguka aruta ayo yabonaga agikoresha moto inywa lisansi.

Ati “Litiro ya lisansi igura 1070Frw ikagenda ibilometero 45 ariko izi iyo ugiye guhinduza batiri igenda ibilometero 60 cyangwa 70 kandi wishyuye 940Frw. Kuri batiri nkorera 5000Frw kandi urebye ziriya zisanzwe litiro ntiwarenza 3500Frw.”

Mugenzi we witwa Turatsinze Emmanuel avuga ko atarota asubira kuri moto zinywa lisansi.

Ati “Iriya isanzwe iyo itobotse uhagarara aho ariko iyi (iy’amashanyarazi) wayigenderaho n’iminsi ibiri. Niyo banyirukana najya ndoba ntabwo nasubira ku ya lisansi, kuyisubiraho naba mvuye mu wa kabiri ngiye muwa mbere.”

Iradukunda Robert, umugenzi wakoresheje moto z’amashanyarazi yazishimiye rasoro zifite zituma iyo ugeze mu mukuku utapfa kubyumva, umuvuduko wazo no kuba uzigenderaho nta rusaku aba yumva.

Izi moto hari icyo zinengwa

Iyo witegereje ingano y’iyi moto n’izisanzwe ubona ko yo ari nini ndetse iraremereye, motari ntibimusaba kuyihata imigeri ngo ihaguruke kuko yo ari ‘automatique’.

Uretse kubona ko urimo uva ahantu hamwe werekeza ahandi, ntushobora kumva ijwi rihinda rituruka muri moteri cyangwa mugasohora mwotsi.

Abamotari batwara izi moto z’amashanyarazi icyifuzo bahuriraho ni uko hakongerwa ibilometero amabatiri yazo agenda mbere yo guhindurwa, na sitasiyo umuntu ashobora gusangaho batiri zikiyongera hirya no hino mu gihugu.

Ntawukirasongwa Jean Marie Vianney utwara moto za lisansi avuga ko adatashobora kujya ku z’amashanyarazi kuko bitamworohera kujya abona batiri aho ashatse hose.

Ibi abihuza na Maniriho Gerard wagize ati “Iriya moto nta ‘chargeur’ igira ku buryo no mu rugo wayishyiramo umuriro, urebye nabi yakuzimiraho uri mu nzira.”

Ku bijyanye no kongera ubushobozi bw’ibilometero batiri zifite mbere yo guhindurwa, Hakizimana, yemeza ko ari ikintu bari kwitaho.

Ati “Ni byo ikipe yacu turi gutekerezaho, ariko mu by’ukuri navuga ko ikoranabuhnga rya batiri ku isi ritaratwemerera, tuzajya dukora ibishoboka. Turacyatekereza kongera za sitasiyo, gusa uko abamotari bacu bangana izihari zirabahaza”.

Ubushakashatsi bugaragaza ko buri mwaka hapfa abantu miliyoni zirindwi bazize umwuka uhumanye.

Minisiteri y’Ubuzima mu Rwanda igaragaza ko buri mwaka mu mavuriro hakirwa miliyoni eshatu z’abivuza indwara z’ubuhumekero barimo 13% bazitewe n’ihumana ry’ikirere.

Moto zikoresha amashanyarazi zageze ku isoko ry'u Rwanda muri Gicurasi umwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza