BNR yatanze icyizere ku bukungu bw’u Rwanda bwashegeshwe na COVID-19

Yanditswe na Iradukunda Serge
Kuya 23 Gashyantare 2021 saa 09:17
Yasuwe :
0 0

Banki Nkuru y’u Rwanda, BNR, yagaragaje ko mu minsi iri imbere ubukungu bw’u Rwanda buzigobotora ingaruka bwatewe n’icyorezo cya COVID-19 n’ingamba zagiye zishyirwaho mu kwirinda ko umubare w’abacyandura warushaho kwiyongera.

Ibi BNR yabitangaje nyuma y’inama ngarukagihembwe ya Komite ishinzwe Politiki y’ifaranga yateranye ku wa 18 Gashyantare 2021. Ni umwanzuro watangajwe hashingiwe ku mibare yagaragajwe n’igipimo cyihuse cyifashishwa mu gusuzuma icyerekezo cy’ubukungu mu gihe cya vuba (CIEA).

Iyi mibare igaragaza ko iki gipimo cya CIEA cyazamutseho 9,4% mu gice cya kabiri cy’umwaka wa 2020, nyuma y’uko mu gice cya mbere cya 2020 cyari cyamanutseho 2,1%.

Mu itangazo BNR yashyize hanze yavuze ko muri uyu mwaka wa 2021 ubukungu bw’u Rwanda buzakomeza kuzahuka. Ati “Byitezwe ko ubukungu bw’imbere mu gihugu buzakomeza kuzahuka mu mwaka wa 2021 bitewe n’inyunganizi z’ingamba zafashwe na Leta zo kuzahura ubukungu.”

Yakomeje ivuga ko itangwa ry’inkingo za COVID-19 mu Rwanda riri mu bizatuma icyizere cyo kuzahuka ku bukungu kirushaho kwihuta. Ati “Nubwo hariki urujijo ku byerekeranye n’iherezo ry’iki cyorezo, itangwa ry’inkingo za Coronavirus ku rwego rw’Isi n’imbere mu gihugu, rizongerera icyizere abikorera kandi bihe ingufu izamuka ry’ubukungu.”

Uretse kuba ubukungu bw’u Rwanda BNR iteganya ko muri uyu mwaka buzazahuka yanagaragaje ko ibipimo by’imari ikoreshwa mu gihugu bitahungabanyijwe cyane na COVID-19.

BNR yatangaje ko mu 2020 urwego rw’imari rwakomeje ubudahangarwa bitewe n’ingamba zafashwe zo kurusigasira, gusa yemeza ko umuvuduko w’izamuka ry’inguzanyo nshya zisabwa n’abikorera wagabanutse. Ibi ngo byatewe n’ifungwa ry’ibikorwa bitandukanye ryabayeho kubera Guma mu rugo.

BNR igaragaza ko igipimo cy’amafaranga yose akoreshwa mu gihugu cyiyongereye ku kigero cya 18% mu 2020 kivuye kuri 15,4% mu 2019. Ibi ngo byaturutse ku izamuka ry’inguzanyo ku bikorera ryageze kuri 21,8% rivuye kuri 12,6% mu mwaka wari wabanje.

Iri zamuka ryaturutse ku ivugururwa ry’amasezerano y’inguzanyo ku bakiliya bagizweho ingaruka n’icyorezo cya Covid-19 ndetse n’inguzanyo nshya zatanzwe mu 2020.

BNR kandi yagaragaje ko nubwo ingaruka z’icyorezo cya COVID-19 ku bukungu bw’u Rwanda ari nyinshi zitigeze zihungabanya cyane isoko ry’ivunjisha.

Imibare igaragaza ko Covid-19 yasubije inyuma ubukungu bw’u Rwanda, aho igipimo mpuzandego cy’umusaruro w’imbere mu gihugu cyagabanutseho 4,1% mu bihembwe bitatu bibanza bya 2020. Ni mu gihe mu bihembwe bitatu bibanza bya 2019 iki gipimo cyari cyazamutseho 8,3%.

Si ubukungu bw’u Rwanda gusa bugaragaza icyizere cyo kuzahuka kuko n’imibare y’Ikigega Mpuzamahanga cy’Imari, IMF, igaragaza ko ubukungu bw’Isi muri rusange buzazamuka mu 2021. Biteganyijwe ko ubukungu bw’Isi buzazamuka ku kigero cya 5,5% mu 2021 mu gihe mu 2020 bwari bwaragabanutseho 3,5%.

Banku Nkuru y'u Rwanda yagaragaje ko mu 2021 ubukungu bw'u Rwanda buzagenda burushaho kuzanzahuka nyuma y'ingaruka bwagizweho na COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .