Banki zorohereje kwishyura abazifitemo inguzanyo zibarirwa muri miliyari 647

Yanditswe na IGIHE
Kuya 24 Kamena 2020 saa 09:37
Yasuwe :
0 0

Banki Nkuru y’u Rwanda (BNR) yatangaje ko amabanki y’ubucuruzi yorohereje abari bayafitemo inguzanyo hasubirwamo amasezerano yo kwishyura, ku buryo agaciro k’inguzanyo zasubiriwemo amasezerano kangana na miliyari 647.3 Frw.

Gusubiramo amasezerano y’inguzanyo biri mubyo BNR yagiriyeho inama ibigo by’imari, byorohereza abakiliya babyo kwishyura inguzanyo, nka bumwe mu buryo bwo gufasha abakiliya guhangana n’ingaruka z’icyorezo cya Coronavirus.

Kugeza mu mpera za Mata 2020, imibare ya BNR igaragaza ko amabanki y’ubucuruzi yari amaze gusubiramo amasezerano y’inguzanyo angana na 83,133 afite agaciro ka miliyari 647.3 Frw. Ayo masezerano yasubiwemo agize 28.4 % by’inguzanyo zose ayo mabanki yatanze.

BNR nubwo itatanze amabwiriza y’uburyo gusubiramo amasezerano y’inguzanyo ku bakiliya bashegeshwe na Coronavirus bikorwa, yerekanye ko bikwiriye harebwe ikibazo cya buri mukiliya.

Kubera kuzahara k’ubucuruzi no kuba bimwe mu bikorwa byari byahagaritswe, byatumye amabanki amwe yemerera abakiliya bayo gusaba kwimura amatariki yo kwishyura mu gihe bakizahura ubucuruzi bwabo.

Umuyobozi Mukuru wa Banki y’abaturage, Maurice Toroitich yavuze ko bo basubiyemo amasezerano y’inguzanyo afite agaciro ka miliyari 55 Frw kugeza hagati muri Kamena 2020.

Nubwo batakuyeho inyungu ku nguzanyo, Toroitich yavuze ko bagiye bongerera abakiliya babo igihe cyo kwishyura, habaho n’igihe babasonera batishyura kugira ngo bongere biyubake.

Leta y’u Rwanda iherutse gutangiza ikigega cyo kuzahura ubukungu kizaba gifite hafi miliyoni 200 z’amadorali, ni ukuvuga hafi miliyari 200 z’amanyarwanda. Leta yashyizemo miliyoni 100 z’amadorali ya Amerika ngo akoreshwe mu gufasha ubucuruzi bwahungabanyijwe na coronavirus.

Iyi nkunga izaba iri mu buryo bw’inguzanyo ariko izaba iri ku kiguzi gito. Inyungu izaba iri hagati ya 5% kugera ku 8% ku mwaka, naho kwishyura bikaba biri hagati y’imyaka ibiri kugera kuri 15 ku mahoteli.

Iki kigega kizafasha inzego zitandukanye zahungabanyijwe na coronavirus, harimo ko amahoteli yakongera gusubiramo inguzanyo afite, gutanga igishoro ku bucuruzi bwagizweho ingaruka na coronavirus kugira ngo bukomeze gukora no kudahagarika abakozi, hari kandi inguzanyo ku bucuruzi buto n’ubuciriritse nabwo bwibasiwe na COVID-19.

Banki zorohereje kwishyura abari bazifitemo inguzanyo mu gihe bakizahura ubucuruzi bwabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .