00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda bategereze Peteroli yavuzwe mu Kivu cyangwa bakureyo amaso?

Yanditswe na Iradukunda Serge
Kuya 6 Ukuboza 2022 saa 09:49
Yasuwe :

Hashize imyaka inzego zibishinzwe mu Rwanda zitangaje ko mu Kiyaga cya Kivu hashobora kuba hari ubutunzi kamere bwa peteroli ndetse ko bigenze neza ishobora gucukurwa kugira ngo ihindure imibereho y’Abanyarwanda n’ubukungu bw’igihugu muri rusange.

Amakuru dukesha Ikigo Gishinzwe Mine, Peteroli na Gaz (RMB) avuga ko mu Kiyaga cya Kivu haketswe peteroli hagendewe ku mpamvu zitandukanye zirimo kuba mu mazi y’iki kiyaga hasanzwe harimo gaz, kandi aho iki kinyabutabire cyabonetse hakunze kuba hari na peteroli.

Indi mpamvu yagendeweho ni uko muri Uganda mu Kiyaga cya Albert habonetse peteroli kandi igice cy’Isi iki kiyaga kibarizwaho ari nacyo kibarizwaho Kivu, ari nako bimeze ku Kiyaga cya Tanganyika.

Kuba mu Rwanda haboneka peteroli ni amahirwe yaba adasanzwe ashobora gutuma mu myaka mike igihugu kiva mu mubare w’ibikennye kikinjira mu bifite ubukungu buhagaze neza ari nako imibereho y’Abanyarwanda izamuka.

Ushaka kumenya neza impinduka peteroli izana mu buzima bw’abatuye aho yavumbuwe, wabaza Abanya-Qatar, uyu munsi bari mu baturage b’Isi binjiza menshi babikesha iki kinyabutabire.

Mbere y’uko muri Qatar havumburwa peteroli mu 1939, abaturage b’iki gihugu bari mu bakennye kuko imibereho yabo yari ishingiye ku bucuruzi bw’amasaro, uburobyi n’ubundi bucuruzi buciciritse.

Aya mateka y’ubukene Abanya-Qatar babashije kuyatera ishoti mu gihe gito biturutse ku kuba mu 1949 baratangiye gucuruza iyi peteroli yabo.

Mu 2020 Qatar yari mu bihugu 18 bya mbere ku Isi byohereza peteroli nyinshi hirya no hino ku Isi. Muri uwo mwaka byabarwaga ko iki gihugu gikura muri ubu bucuruzi arenga miliyari 6,14$, avuye mu bakiliya bacyo bakomeye barimo u Buyapani, u Bushinwa, Singapore, Koreya y’Epfo na Leta Zunze Ubumwe za Amerika.

Kuri ubu abahanga mu by’ubukungu bagaragaza ko nibura buri mwaka, Umunya-Qatar yinjiza arenga 61.276$ (arenga miliyoni 60 Frw). Ibi byose iki gihugu kibikesha peteroli.

Peteroli ntiyahinduye ubuzima bw’Abanya-Qatar gusa, ushaka amakuru yisumbuye wabaza abatuye Dubai, Leta Zunze Ubumwe z’Abarabu, cyangwa Abanya-Libya babaye mu gihugu ku bwa Col Muammar Gaddafi.

Ese Abanyarwanda nabo bategereze?

Buri Munyarwanda wese wamenye ibijyanye na peteroli yakwifuza kumenya niba koko mu gihugu cye harabonetse iyi mari ishyushye, igihe izatangira gucukurirwa, inyungu azayibonamo n’ibindi.

Kugeza ubu amakuru dukesha Ikigo Gishinzwe Mine, Peteroli na Gaz (RMB) avuga ko hamaze gukorwa ibyiciro bibiri bya mbere byo kumenya amakuru yimbitse kuri iyi peteroli kandi byatanze ibimenyetso ko hashobora kuba hari amahirwe ya peteroli mu Rwanda.

Mu kiganiro na IGIHE, Umuyobozi Mukuru wungirije w’Ikigo cy’Igihugu gishinzwe Mine, Peteroli na Gaz, Dr. Ivan Twagirashema, yavuze ko amakuru y’uko mu Rwanda haba hari peteroli akimara kumenyekana, hakozwe ubushakashatsi bugamije gusuzuma isayo yakuwe mu ndiba z’Ikiyaga cya Kivu muri metero 500.

Ati “Icyakozwe cya mbere cyabaye kujya munsi y’i Kivu hafatwa isayo yo munsi irapimwa kuko nayo ubwayo ishobora kuguha igitekerezo ku byaba biri munsi noneho. Kuko aho tuvuga peteroli ntabwo ari mu mazi, uramanuka ukagera aho amazi arangirira kuri metero 500, noneho ukamanuka munsi.”

Yakomeje avuga ko iyi sayo yapimwe yagaragaje ko ucukuye mu ndiba z’Ikiyaga cya Kivu hari ikinyabutabire cya ‘hydrocarboné’. Iki kinyabutabire gishobora kuba ikimenyetso cy’uko ahantu runaka hari peteroli, ariko na none gishobora kuba ikimenyetso cy’uko hari ibindi binyabutabire nka gaz bitari peteroli.

Ibyabonetse muri iki cyiciro cya mbere byatumye hakorwa n’ubundi bushakashatsi bukubiye mu cyiciro cya kabiri.

Dr. Twagirashema yavuze ko muri iki cyiciro cya kabiri, mu ndiba z’ikiyaga cya Kivu hoherejwe imashini zabashije kureba muri kilometero eshanu mu ndiba y’ikiyaga.

Ati “Icyakurikiyeho cyari ukuvuga ngo reka noneho tujye mu cyiciro cya kabiri, aho noneho ukoresha imashini zikagenda zikagera muri kilometero eshanu mu nda y’Isi, noneho ibije bigafatwa n’imashini, noneho ukaza gupima kugira ngo umenye muri ibyo bimenyetso wagiye ubona birakwereka iki?”

Yakomeje avuga ko ibyavuye muri ubu bushakashatsi byakomeje kugaragaza ko hasi mu ndiba hakomeza kugaragara ikinyabutabire cya ‘hydrocarboné’.

Dr. Twagirashema yavuze ko kugeza ubu bataramenya niba iki kinyabutabire ari ikimenyetso simusiga cy’uko mu Rwanda hari peteroli ndetse niba yaba iri mu bwoko bw’ifashe cyangwa isukika.

Ati “Hydrocarbons zishobora kukwereka iyi gaz dutekesha, iyo Hydrocarbons noneho zamaze igihe kinini aho hantu zibyara gaz ariko iyi peteroli nayo hari igihe ifata nka godoro dukoresha twubaka kaburimbo, hakaba noneho igihe ushobora kuhasanga peteroli isukika.”

Yakomeje avuga ko icyiciro kizakurikiraho aricyo kizahamya neza ko mu Rwanda hari peteroli n’uburyo yacukurwa.

Ati “Ubwo intambwe ikurikiyeho ni ukumenya ese ni gaz, ni peteroli ese yo irafashe, ese kuyicukura birashoboka kuko iyo usanze ifashe bisaba kubanza kuyishongesha kugira ngo uzabone uko uyivoma.”

Avuga ko kugeza ubu hari amahirwe y’uko mu Rwanda hari peteroli ariko akemeza ko hakiri urugendo.

Ati “Haracyari urugendo, twabonye amahirwe, tuzi aho aherereye ubu noneho igisigaye ni ukuzacukura ahantu hatandukanye kugira ngo tuzamure ikiriyo, tujye muri laboratoire. Ariko ni ibintu bihenze gucukura ukajya muri kilometero imwe ntabwo ari nko kujya muri metero 300.”

“Tugezemo hagati, hari icyizere ndetse turabona ko bishoboka ariko ntabwo nanone twatanga amakuru yo kuvuga ngo yabonetse tugiye kuyicukura.”

Mu gihe amata yaba abyaye amavuta, u Rwanda rwaba rubaye igihugu cya gatatu mu Muryango wa Afurika y’Iburasirazuba kivumbuwemo peteroli nyuma ya Sudani y’Epfo na Uganda.

Mu Kivu yavumbuwe Gaz Methane ndetse iri gutunganywa kugira ngo itange amashanyarazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .