00:00:00 IGIHE NETWORK KN KINYARWANDA EN ENGLISH FR FRANCAIS

Hoteli ya Pasteur Bizimungu, imwe mu zitezweho guhindura isura y’ubukerarugendo i Rubavu

Yanditswe na Ferdinand Maniraguha
Kuya 21 January 2022 saa 07:10
Yasuwe :

Icyizere cyatangiye kugaruka ku maso ya benshi nyuma y’imyaka ibiri y’icuraburindi Isi yatejwe n’icyorezo cya Covid-19. Abakunzi b’ibirori no gutembera, uyu mwaka ushobora kubahoza amarira ya za Guma mu Rugo no gufunga ibikorwa by’ingenzi kwa hato na hato.

Icyo cyizere gituruka ku bwinshi bw’abakomeje kwikingiza haba mu Rwanda no ku Isi muri rusange.

Mbere ya 2020, Umujyi wa Rubavu wari igicumbi cy’imyidagaduro n’ubukerarugendo mu Rwanda. Mu mpera z’icyumweru abato n’abakuru wasangaga bishimisha ku mucanga hariya za Tam Tam, ku Mashyuza i Nyamyumba n’ahandi bitegeye umujyi wa Goma n’udusozi dukikije ikiyaga cya Kivu.

Ubu byose byarahagaze. Iyo uhageze wakirwa n’amajwi y’imiraba y’ikiyaga, ay’inyoni, ay’imodoka n’imashini zikoreshwa mu bwubatsi, bitajyanye n’ibyatumaga uwo mujyi ususuruka mu mpera z’icyumweru.

Nubwo byagenze bityo, hari ababonye kare ko Covid-19 izataherana Isi. Ku nkengero z’ikiyaga cya Kivu hari kubakwa hoteli zitandukanye n’ibindi bikorwa biteza imbere ubukerarugendo, bigaragaza ko bizeye ko byanga byakunda, Covid-19 itazaramba.

Ni ibikorwa remezo bikomeye ku buryo mu gihe bizaba byuzuye, bizahindura isura y’ubukerarugendo i Rubavu.

Muri ibyo bikorwa biri kubakwa, ucyinjira mu Mujyi wa Rubavu, urenze ahubatse Serena Hotel munsi gato y’ahubatse ibiro by’Akarere ka Rubavu, usanganirwa n’inyubako igeretse gatatu iri hafi kuzura.

Ntabwo izina ry’iyi nyubako riratangazwa ariko amakuru yizewe IGIHE yamenye ni uko ari hoteli iri kubakwa n’umuryango wa Pasteur Bizimungu wahoze ari Perezida w’u Rwanda.

Bizimungu yayoboye u Rwanda kuva muri Nyakanga 1994 kugeza mu 2000 ubwo yeguraga. Nyuma yo gufungurwa mu 2007, ntabwo yongeye kugaragara muri politiki, yibera mu bikorwa bye bwite.

Ku cyapa kigaragaza imirimo yo kubaka iyo hoteli, handitseho ko ari inyubako ya Séraphine Utamuliza , umugore wa Pasteur Bizimungu, icyakora akenshi, Bizimungu niwe ukurikirana imirimo yo kubaka iyi hoteli.

Iyi nyubako yatangiye kubakwa mu 2018, biteganyijwe ko icyiciro cya mbere kizarangira muri Werurwe 2022.

Amakuru yizewe IGIHE ifite ni uko ari hoteli izaba yihagazeho mu Mujyi wa Rubavu kuko izaba igizwe n’ibyumba bigera kuri 80, ikaba ari iya mbere izaba ifite ubushobozi nk’ubwo muri uwo mujyi. Izaba kandi ifite icyumba cyagutse cy’inama, ibintu bitari bisanzwe cyane muri hoteli z’i Rubavu.

Iyi hoteli kandi izaba ifite ubwogero (piscine) hejuru, ku buryo abari kogera hejuru ku gasongero bazajya babikora bitegeye ikiyaga cya Kivu imbere yabo dore ko kiri muri metero zitarenze 200 uvuye aho iyo nyubako iherereye.

Ubusanzwe iyi nyubako yakabaye igeze kure yuzura ariko IGIHE yabwiwe ko kudindira kw’imyubakire yayo kwatewe n’icyorezo cya Covid-19, cyatumye haba imbogamizi mu kubona ibikoresho by’ingenzi nk’ibyuma byifashishwa mu bwubatsi.

Biteganyijwe ko nta kibakomye mu nkokora, uyu mwaka warangira ibice byombi bya hoteli byose byuzuye.

Meya w’Akarere ka Rubavu, Kambogo Ildephonse, yabwiye IGIHE ko ibi bikorwa remezo by’ubukerarugendo biri kubakwa ku kiyaga cya Kivu, byitezweho gukomeza gukundisha abantu ako karere.

Ati “Hari amahoteli atandukanye ari kugenda azamuka. Dufite amahirwe ko Rubavu ari akarere keza abanyarwanda, abaturanyi n’abanyamahanga bakunda. Ubibonera cyane muri weekend aho abantu baza gutemberera kuri iki kiyaga kugira ngo barebe ayo mahumbezi bayabyaze umusaruro, basubire iwabo bafite akanyamuneza.”

Nubwo u Rwanda ruri guteza imbere ubukerarugendo, ubushingiye ku nama bwasaga n’ubwiganje cyane muri Kigali kubera ko ariho haboneka hoteli zifite ibyumba bigezweho byakora inama n’abantu benshi.

Hoteli nk’iyo y’umuryango wa Bizimungu, yitezweho gufungurira amarembo Rubavu nayo ikajya yakira inama zimwe na zimwe zikomeye.

Ubukerarugendo ni inkingi ikomeye y’ubukungu bw’u Rwanda. Byatumye Guverinoma ibushyira imbere ndetse ishishikariza abashoramari batandukanye kubaka ibikorwa remezo bibuteza imbere birimo amahoteli.

Umwaka wa 2019 ubukerarugendo bwinjirije igihugu miliyoni zigera kuri 500$; abagenzi bagera mu gihugu nabo bariyongera cyane kuko bageze kuri miliyoni 1,6.

Mu 2020 ibintu byarahindutse. Mu mwaka wose amafaranga yinjiye mu gihugu aturutse mu bukerarugendo yari miliyoni 121$, make ugereranyije n’ayari yabonetse mu 2019. Byatewe n’ingamba zo kwirinda Covid-19 yari ikomeje guca ibintu hirya ni hino ku Isi.

Uhereye muri Mutarama ukagera mu Ugushyingo 2021, amafaranga yinjijwe avuye mu bukerarugendo yari miliyoni 134$, bigaragaza inyongera ya 19% ugereranyije n’ayari yabonetse mu 2020.

Iyi hoteli iri kuzamurwa hafi y'ikiyaga cya Kivu
Icyiciro cya mbere cy'iyi nyubako kizarangira muri Werurwe uyu mwaka
Iyi hoteli niyuzura izaba ifite piscine hejuru
Ifoto yafashwe ubwo iyi nyubako yari igitangira kubakwa
Byitezwe ko ibikorwa remezo bishya biri kuzamurwa mu Mujyi wa Rubavu bizarushaho guteza imbere ubukerarugendo muri aka karere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .