Uko umubano w’u Bushinwa n’u Rwanda warushijeho gukomera mu bihe byo guhashya Coronavirus

Yanditswe na Ambasaderi RAO Hongwei
Kuya 21 Ukwakira 2020 saa 11:51
Yasuwe :
0 0

Umwaka wa 2020 ntabwo usanzwe kandi ufite icyo usobanuye cyane haba ku Bushinwa, u Rwanda n’Isi muri rusange. Mu gihe Covid-19 igishegesha isi, u Bushinwa n’u Rwanda byakomeje gufatanya mu guhangana n’ingaruka zayo, kubyaza umusaruro amahirwe, gukuraho imbogamizi, guteza imbere ubwizerane n’ubufatanye bwungukira impande zombi ndetse no guteza imbere imibereho myiza y’abaturage b’ibihugu byombi.

U Bushinwa n’u Rwanda byakoranye bya hafi mu bufatanye no kurwanya Covid-19. U Bushinwa ntabwo buzibagirwa inkunga yavuye mu Rwanda mu gihe bwari bwugarijwe cyane n’icyorezo. Icyo gihe Perezida Paul Kagame n’Umunyamabanga Mukuru wa FPR Inkotanyi François Ngarambe bohereje ubutumwa bwo kwifatanya na Guverinoma y’u Bushinwa ndetse n’ishyaka Communist Party.

Icyo gihe Minisiteri y’Ububanyi n’amahanga y’u Rwanda yasohoye itangazo ritera ingabo mu bitugu u Bushinwa. Abanyarwanda bigize ihuriro ryabize mu Bushinwa(Rwanda-China Alumni Organization) bakoze amashusho adasanzwe (video), boherereza Abashinwa babagaragariza ko babashyigikiye kandi babifuriza amahirwe.

Guhera muri Werurwe ubwo u Rwanda rwatangizaga urugamba rwo kurwanya Covid-19, u Bushinwa nabwo bwararushyigikiye n’umutima mwiza. Mu buryo butandukanye kandi mu nzego zose, Guverinoma y’u Bushinwa n’abaturage bayo batanze inkunga y’ibikoresho byifashishwa kwa muganga bihabwa RBC, RPF, RDF, Inteko Ishinga Amategeko ndetse n’ibiribwa ku miryango itishoboye.

Inzobere mu buvuzi z’Abashinwa zasangiye ubunararibonye na bagenzi babo b’Abanyarwanda haba mu guhangana n’icyorezo, gusuzuma no kuvura. Ibi byerekana umubano udasanzwe uri hagati y’ibihugu byombi no mu bihe bikomeye.

Mu nama idasanzwe yahuje u Bushinwa na Afurika ivuga ku bufatanye mu kurwanya Covid-19, ubwo hizihizwaga imyaka 75 ishize Umuryango w’Abibumbye ushinzwe, haba Perezida Xi Jinping na Perezida Paul Kagame bagarutse ku bufatanye n’umubano mwiza nk’inzira rukumbi yo guhashya icyorezo, bamagana akato no kwitana amazina byagiye bijyanishwa n’icyo cyorezo, ahubwo bashyigikira uruhare rwa OMS mu guhangana nacyo ku isi, no gushyigikira urujya n’uruza rw’ibicuruzwa bigamije kuzahura ubukungu.

Tariki 8 Ukwakira, u Bushinwa bwinjiye muri COVAX (ubufatanye mpuzamahanga mu kubona ibipimo, imiti n’inkingo bya Covid-19). Bwijeje ko inkingo ziri gukorerwa mu Bushinwa niziboneka zizagezwa kuri bose ndetse zikagezwa kare mu bihugu bikiri mu nzira y’amajyambere. Ni igitekerezo cyakiriwe neza mu muryango mpuzamahanga, by’umwihariko ibihugu bya Afurika kuko twese twemeza ko ubufatanye mpuzamahanga aribwo buzatuma dutsinda uru rugamba rwo kurwanya icyorezo.

Biturutse ku buyobozi bwiza no gufata ingamba zikomeye mu guhangana na Covid-19, u Bushinwa n’u Rwanda ni bimwe mu bihugu bike byabashije guhangana neza n’icyorezo. Nk’igihugu cyabanje gushegeshwa na Covid-19, u Bushinwa buzi neza akamaro ko kwizera inzego, kugeza ubuvuzi kuri bose, gushyigikira abakora mu rwego rw’ubuzima no gutanga amakuru y’ukuri muri uru rugamba. U Bushinwa bushimira u Rwanda ibyo rumaze kugeraho muri urwo rugamba. U Rwanda n’u Bushinwa byeretse Isi uko ubufatanye n’umuhate byageza ku gutsinda burundu Covid-19, bikaba byaranditse ipaji nshya mu mubano w’ibihugu byombi.

Nubwo ari ibihugu kimwe kiri kure y’ikindi, u Bushinwa n’u Rwanda nk’ibihugu bikiri mu nzira y’Amajyambere bishyize imbere guhashya ubukene no guteza imbere ubukungu. Twese dusangiye intego yo kugera ku burumbuke n’imibereho myiza y’abaturage bacu. Kuri ubu, u Bushinwa n’u Rwanda bifite umukoro wo kurwanya virusi ariko nako bizahura ubukungu no kurinda abaturage.

Nubwo virus yazanye imbogamizi mu mubano, ubufatanye buracyari ku isonga. Abafatanyabikorwa mu bihugu byombi bakomeje kubana hafi no gutumunaho hifashishijwe uburyo butandukanye, ibintu byagize uruhare mu gukomeza kw’imishinga itandukanye nk’urugomero rw’amashayarazi rwa Nyabarongo II, kuvugurura no kwagura ibitaro bya Masaka, Uburezi bwifashishije ikoranabuhanga n’ibindi.

Mu korohereza ingendo no kongera gufungura ubukungu, RwandAir yasubukuye ingendo ziva i Kigali zerekeza Guangzhou. Urubuga eWTP (electronic World Trade Platform), rufasha ibigo bito n’ibiciriritse gukora ubucuruzi bwambukiranya imipaka binyuze mu ikoranabuhanga narwo rwakoze akazi gakomeye mu gihe cy’icyorezo.

Muri Gicurasi umwaka ushize, igikorwa cyateguwe na Alibaba Group ku bufatanye na Ambasade y’u Rwanda mu Bushinwa, cyatumye hagurisha dupaki 3000 tw’icyayi mu isegonda rimwe. Binyuze kuri e-WTP, abahinzi b’abanyarwanda ubu babasha guhabwa amadolari agera kuri ane yiyongera ku kilo ku rubuga rwa T-mall, kubera ko bihita bibonwa n’abaguzi bo mu Bushinwa.

Tariki 28 Nzeri 2020, hifashishijwe ikoranabuhanga habaye inama ya munani ya Komite ihuza u Rwanda n’u Bushinwa ku bukungu n’ubucuruzi (Rwanda-China Joint Committee on Economic, Technical and Trade). Iyi nama ni iya mbere y’ubwo bwoko yari ihuje u Bushinwa n’igihugu cya Afurika uhereye igihe Covid-19 yatangiriye.

Abantu 13 muri Guverinoma y’u Rwanda barayitabiriye baganira na bagenzi babo ku ngingo zijyanye n’umubano w’ibihugu byombi haba mu bucuruzi, ibikorwa remezo, ishoramari n’inkunga z’iterambere bijyanye n’icyerecyezo cy’u Rwanda cya 2050 na gahunda y’u Bushinwa ya Belt and Road initiative. Havuzwe kandi ku guteza imbere uburyo bwo guha ibyangombwa abanyarwanda bohereza mu Bushinwa ibikomoka ku buhinzi, ubufatanye mu bukungu bushingiye ku ikoranabuhanga n’ibindi. Ibi byose biri mu bizongera umubano w’ibihugu byombi nyuma ya Coronavirus.

Umwaka utaha, hazizihizwa imyaka 50 ishize u Rwanda n’u Bushinwa bigiranye umubano mu bya dipolomasi. Nubwo hari byinshi byahindutse kubera icyorezo cya Coronavirus, nta kibazo byagize ku mubano w’ibihugu byombi. Uretse kwizihiza uyu mubano, uzaba umwanya wo gufungura amapaji mashya mu bufatanye mu iterambere n’uburumbuke hagamijwe iterambere ry’abaturage bafite intego imwe y’ahazaza ha muntu.

RAO Hongwei, Ambasaderi wa Repulika ya rubanda y’u Bushinwa mu Rwanda

Ambasaderi Hongwei yashimye ubufatanye bwaranze u Rwanda n'u Bushinwa mu guhangana n'icyorezo cya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .