Uko ubuhanzi busabana n’umurage bikarimbisha imijyi

Yanditswe na Mutangana Steven
Kuya 29 Ukuboza 2019 saa 10:13
Yasuwe :
0 0

Mu mijyi itandukanye ku Isi, iyateye imbere uhasanga ibihangano by’ubugeni mberajisho bishushanyije, bibaje cyangwa bibumbye. Biranga bimwe mu bigize umurage ndangamuco na ndangamateka y’igihugu irimo. Bituma uwo murage uhora wibukwa, ukaba ubuzima bw’abenegihugu.

Abenegihugu banezezwa no guhora babona amateka yabo muri ibyo bihangano, abakuru bakayaraga abato. Abahanzi bahabwa umurimo, bagahuza ubumenyi bafite n’ibyifuzwa mu mitunganyirize y’umujyi.

Ba mukerarugendo bongera amasaha bamara mu mujyi urimo amashusho manini, kuko bafata igihe cyo kwitegereza, kuhifotoreza no kumenya amateka y’icyo amashusho avuze, bakagira amatsiko y’ibindi biranga amateka y’igihugu basuye. Bityo, bikagira uruhare mu bukerarugendo bushingiye ku muco. Umujyi ufite amashusho nkayo uba urimbye bishingiye ku muco.

Amashusho meza ari Kimihurura, Rusororo, Kicukiro…

Muri iyi minsi, imbuga nkoranyambaga n’itangazamakuru risanzwe biragaragaza amashusho abumbye, Umujyi wa Kigali washyize mu masangano y’imihanda mu Karere ka Kicukiro. Ayo mashusho agaragaza ababyinnyi n’umukaraza, yakunzwe cyane nk’uko bigenda bigaragara mu binyamakuru. Muri iki gihangano, umurage ndangamuco w’imbyino n’ingoma bya Kinyarwanda byahawe agaciro.

Ahandi hari amashusho meza nk’aya agaragaza umurage w’imbyino za Kinyarwanda, ni kuri Intare Conference Arena, i Rusororo mu Karere ka Gasabo. Hagaragara umubyinnyi w’umugore, intore n’umukaraza.

Imbyino za Kinyarwanda ntizikunzwe mu Rwanda honyine no mu mahanga barazikunda. Kubyina Kinyarwanda tubibona guhera mu muryango, ku ishuri no mu birori bihuza abantu benshi, aho usanga abari mu itorero ndangamuco babigize umwuga babyungukiramo ariko n’Abanyarwanda muri rusange bagaragaza umunezero mu kubyina. Abana bakajyanamo n’abakuru.

Imbyino ntizitana n’ingoma n’ubwo tuzi ko ingoma yakoreshejwe no mu mihango itandukanye mu muco w’Abanyarwanda. Kubigaragaza mu mashusho meza nk’ariya ni igikorwa cyiza cyabera urugero n’indi mijyi iri hirya no hino mu gihugu.

Andi mashusho manini ari ku Ngoro y’Umurage y’Amateka y’Urugamba rwo guhagarika Jenoside yakorewe Abatutsi, Kimihurura mu Karere ka Gasabo. Ku Ngoro Ishinga Amategeko aho iyi ngoro y’umurage iherereye, uko hasuwe, niko hafatirwa ifoto y’urwibutso, ba mukerarugendo bagahabwa ibisobanuro byimbitse kuri yo. Ubuhanga yakoranywe ni ntagereranywa.

Ubwo ibiro bishya by’akarere ka Gasabo byubakwaga, naho abantu bagaragaje ko bishimiye ko hashyizwe igihangano kigaragaza agaseke nka kimwe mu bigize umurage ndangamuco w’Abanyarwanda.

Imitunganyirize y’imijyi ihuza ubwubatsi n’umurage

Mu kurimbisha Umujyi wa Kigali kandi, hamaze igihe huzuye inzu nini ifatwa n’ikirango mu murwa mukuru, nayo yubatswe hazirikanwa umurage ndangamuco w’imyubakire y’Abanyarwanda. Iyo ni Kigali Convention Centre iri Kimihurura.

Uwakoze igishushanyo cy’iyi nzu, Prof Roland Dieterle, akigera bwa mbere mu Rwanda, yabanje gusura ingoro y’umurage w’u Rwanda iri i Huye, abahakorera bamusobanurira byinshi ku muco n’imibereho by’Abanyarwanda. Yasuye kandi n’ingoro y’umurage iri i Nyanza yitegereza uko ingoro y’umwami yari yubatse mu kinyejana cya 19, imitako ya Kinyarwanda, ububoshyi n’ibindi byamubereye isoko mu gutunganya igishushanyo cya Kigali Convention Centre. Uyitegereje usanga ibyuma biri inyuma bisa n’ibisobekeranye nka kumwe ubisanga ku insika z’inzu za kinyarwanda za kera.

Birashoboka ko ubwo Prof Roland Dieterle yitegerezaga ababoshyi b’inkangara n’urugo rwa Kinyarwanda i Nyanza yaba yaragize igitekerezo cyo guhuza insika za Kinyarwanda n’imitako igezweho kuri iyi nzu yari agiye gukorera igishushanyo mbonera.

Impuguke mu by’Ubukungu n’Umuco, akaba n’Umwarimu muri za kaminuza i Burayi, Françoise Benhamou, mu gitabo yanditse ku bukungu bw’umurage ndangamuco (Economie du patrimoine culturel, Editions La Découverte, Paris, 2012) yagaragaje ko mu gihe iterambere rijyana n’imyubakire igezweho mu mijyi, ba nyirukugenga imitunganyirize y’iyo mijyi badakwiye kwirengagiza ko umurage ndangamuco wahuzwa n’imyubakire igezweho.

Guha umwanya umurage ndangamuco mu mitunganyirize y’imijyi mu Rwanda uko bigenda bifata intera niko bizarushaho guha agaciro umuco mu iterambere ry’Igihugu.

Horana Imana murage mwiza…

Mutangana Steven
Umusomyi wa IGIHE.COM

Iki kibumbano kiriho intore n'ababyinnyi ni igishya kiri kubakwa mu masangano y'imihanda ya Sonatubes mu Karere ka Kicukiro
Izo ntore n'umukaraza, ni ikibumbano kiri ku Ngoro ya FPR Inkotanyi i Rusororo ku nyubako izwi nka Intare Arena
Iki kibumbano kiri ku Ngoro y'Inteko Ishinga Amategeko kikaba gishushanya urugamba rwo guhagarika Jenoside yakorewe Abatutsi
Ibiro bishya by'Akarere ka Gasabo hejuru hariho agaseke nka kimwe mu bikoresho by'ibanze by'Abanyarwanda bo hambere
Kigali Convention Center yubatswe mu ishusho y'inzu za Kinyarwanda zo hambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza