00:00:00 IGIHE NETWORK KN KINYARWANDA EN ENGLISH FR FRANCAIS

Infantino ashaka ko Igikombe cy’Isi kiba buri myaka itatu

Yanditswe na Eric Tony Ukurikiyimfura
Kuya 20 Ukuboza 2022 saa 12:35
Yasuwe :

Perezida wa FIFA, Gianni Infantino, ashaka ko Igikombe cy’Isi kizajya kiba buri myaka itatu nka kimwe mu bigize gahunda y’igihe kirekire yo kuvugurura iri rushanwa rihuza ibihugu byose byo ku Isi.

Uburyo irushanwa ryakiriwe na Qatar ryagenze neza mu kibuga ndetse no mu buryo bwo gucuruza, byakuruye cyane Perezida wa FIFA, Gianni Infantino, uherutse kuvuga ko Igikombe cy’Isi cy’Amakipe kizajya kitabirwa n’amakipe 32 guhera mu 2025 nubwo hari benshi batabishyigikiye barimo abakinnyi, amakipe n’impuzamashyirahamwe za ruhago.

Infantino yasanze gutegura Igikombe cy’Isi hagati mu itumba ry’i Burayi byaba umuvuno w’impinduka ku buryo umukino wakomeza gukura no gukwira hirya no hino ku Isi.

Nubwo hari impungenge ku buzima bw’abakinnyi kubera imvune nyinshi zagaragaye muri Qatar, umupira w’amaguru watanze ibyishimo bidansanzwe ndetse iri rushanwa ryinjije miliyari 6,2£ arutaho miliyoni 840£ ayinjijwe mu Gikombe cy’Isi cyabereye mu Burusiya mu 2018.

Intego ya Infantino ni ugushyiraho uburyo bushya bwo gukina iri rushanwa, Igikombe cy’Isi kikajya kiba buri myaka itatu, Igikombe cy’Isi cy’Amakipe n’andi marushanwa yo ku migabane akaba mu yindi myaka.

Gusa, nta mpinduka zishoboka kugeza Igikombe Cy’Isi cya 2030 kirangiye kuko ibiganiro hagati y’abafatanyabikorwa ku ngengabihe y’amarushanwa yo hagati ya 2024 na 2030 biri hafi kurangira nubwo hari ukundi kuganira kwatangiye mu gikari.

Infantino yihaye igihe gihagije cyo kugira ngo ashyire mu bikorwa izi mpinduka, dore ko mu cyumweru gishize yashimangiye ko yifuza kuba Perezida wa FIFA muri manda eshatu, byatuma ageza mu 2031 akiri umuyobozi wayo.

Uyu mugabo w’imyaka 52 azahura n’intambara itoroshye yo kugira ngo uburyo bwo gukina Igikombe cy’Isi mu myaka itatu bwemerwe nubwo ashyigikiwe na Afurika ndetse na Asia.

UEFA n’Impuzamashyirahamwe ya Ruhago muri Amerika y’Epfo (CONMEBOL) zahurije hamwe mu kwanga igikerezo cyo gutegura Igikombe cy’Isi buri myaka ibiri, cyari kiyobowe na Arsène Wenger, ndetse kuri ubu zishobora no kwanga iki gitekerezo gishya cya FIFA.

Daily Mail dukesha iyi nkuru, yanditse ko FIFA yanze kugira icyo ibivugaho.

Perezida wa FIFA, Gianni Infantino, ashaka ko Igikombe cy'Isi cyajya kiba muri myaka itatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .